Ababelenga Ino Magazini Balepusha Ukuti . . .

Bushe Lesa e Wapangile Satana Kaseebanya?

▪ Abantu bamo batila, apo Baibolo isosa ukuti Lesa e ‘wabumbile ifintu fyonse,’ ninshi e wapangile na Satana Kaseebanya. (Abena Efese 3:9; Ukusokolola 4:11) Baibolo ilalangilila bwino bwino ukuti Lesa te wamupangile.

Yehova abumbile malaika uwaishileba Satana. E ico pa kwishiba ifyo uyu mulwani mukalamba uwa kwa Lesa aishilebako, tufwile ukwishiba ifyo Baibolo ilanda pali Kabumba, Yehova. Baibolo ilanda pali Yehova ukuti: “Imilimo yakwe yalifikapo, pantu inshila shakwe shonse mulinganya. Lesa uwa cishinka, uushaba na lufyengo; alilungama kabili alitambalala.” (Amalango 32:3-5) Aya mashiwi yalenga twasondwelela ukuti pa kutendeka Satana ali uwapwililika kabili uwalungama, ali ni malaika wa kwa Lesa. Pali Yohane 8:44, Yesu atile Satana “tatwalilile mu cine,” ukulangilila ukuti inshita imo Satana ali wa cishinka kabili uwa kaele.

Lelo, nga filya fine caba kuli bamalaika na bantunse abo Yehova apanga, uyu malaika uwaishileba Satana alikwete ubuntungwa bwa kusala ukucita icalungama ne calubana. Ilyo asalilepo ukulwisha Lesa no kulenga abantu ba kubalilapo babili ukupondokela Lesa, aishileba Satana, icalola mu kuti “Kakaanya.”—Ukutendeka 3:1-5.

Na kabili, uyu malaika wabipa aishileba Kaseebanya, icipilibula ukuti “Uwa lwambo.” Satana e walandiile mu nsoka kabili mu bucenjeshi abepele Efa pa kuti atobe ifunde ilyo Kabumba abapeele. E mulandu wine Yesu aitile Satana ukuti “wishi wa bufi.”—Yohane 8:44.

Nomba cali shani pa kuti malaika uwapwililika atendeke ukutontonkanya pa fyabipa e lyo ninshi takwali na wa kumutunka? Afwile alekumbwa ilyo abantu balepepa Lesa, uo abantu balingile fye ukupepa, kabili amwene ukutila kuti alenga abantu ukupondokela Yehova pa kuti e o alebateka. Ukutwalilila ukutontonkanya pa kufwaya ukulateka abantu kwalengele ukuti asuke acite ifyo aletontonkanyapo. Ifi fine e fyo ibuuku lya kwa Yakobo lilondolola, litila: “Umuntu onse atunkwa ilyo ulunkumbwa lwakwe umwine lwamusembeleka no kumubeleleka. E lyo ulunkumbwa, ilyo lwaimita, lufyala ulubembu.”—Yakobo 1:14, 15; 1 Timote 3:6.

Natulangilile: Elenganyeni ukuti umuntu uulolekesha pa cipao ca kampani amona ukutila kuti afulunganya ifyalembwa pa kuti ebe indalama sha kampani. Uyu muntu nga alefwaya kuti aleka ukutontonkanya pali ifi apo pene fye. Lelo nga talekele ukutontonkanyapo, ukufwaisha ukwiba kuti kwakulilako, ica kutila kuti asuka aiba. Nga aiba, ninshi mwine fye e wafwaya ukuti abe kabolala. Nga ca kutila talandile ne cishinka pa mulandu acitile, ninshi aba no wa bufi. Ifi fine e fyo na malaika Lesa apangile acitile. Pa mulandu wa kukonkelela ulunkumbwa, abomfeshe ubuntungwa bwa kuisalila bubi bubi, abomfeshe ubufi no kupondokela Wishi, ne ci calengele abe Satana Kaseebanya.

Icawama ca kutila, Satana Kaseebanya bali no kumonaula pa nshita ya kwa Lesa umwine. (Abena Roma 16:20) Pali ino nshita, abapepa Yehova Lesa balafundwa pa fyo amapange ya kwa Satana yaba ne fyo bengaicingilila ku micenjelo yakwe. (2 Abena Korinti 2:11; Abena Efese 6:11) E ico kanshi, “kaaneni Satana Kaseebanya, na o akafulumuka kuli imwe.”—Yakobo 4:7.

[Amashiwi pe bula 21]

Ilyo malaika wapwililika asalilepo ukulwisha Lesa, aishileba Satana