Kalata Ukufuma ku Mexico

“Bushe Yehova Alitutemwa Nangu ca Kuti Tuli Bena India?”

BA MELESIO abalanda ici O’dam, abekala ku mpili, limo limo baleya mu musumba ku kufwaya incito. Nga baya mu musumba, balelongana na ba Nte kabili pa kubwelelamo balesendako ne mpapulo sha kuyapeelako abantu. Balombele ukuti Nte umo akabatandalile no kuyabasambilishako na fimbi ifyaba mu Baibolo.

Abena O’dam abekala ukutali sana no musumba, babela ku citungu ca mpili ica Sierras mu Mexico. Ukufuma uko bekalila no kwabela icilonganino ca Nte sha kwa Yehova paba amakilomita 240. Twapingwilepo ukuyatandalila aba bantu.

Twafwaile motoka, amatenti, ne fya kulaalapo, kabili twasendele ifya kulya na mafuta ya muli motoka ifya kubomfya pa nshiku shitatu, e fyo twaimine ubulendo ukufuma mu musumba wa Durango. Twaimine ulucelocelo ne nshita ya 04:00 hrs, kabili twaendele ama-awala 8 ukutumbika ulupili mu musebo wa lukungu mpaka twafika apo umusebo wapwila. Apa e patendekela icitungu ca O’dam. Ku ntanshi kwaba umukonko uukalamba no lupili na lumbi.

Twashile motoka pa mushi umo ifi, kabili e fyo twatwalilile ukwenda pa ma-awala yatatu ukutentemuka umukonko, ninshi natusenda ne fipe. Ilyo twafikile pa nshi, twapangile inkambi, twateeba ne nkuni sha kukosesha umulilo uwa kutiinishako inama mpanga, kabili pa kuti wishima, twalecinjanya ukulaala, twaleti aba nga balaalako ama-awala yatatu bambi babuuka pa kuti balesonkelesha pa mulilo.

Ubushiku bwakonkelepo lucelocelo, twatampile ukutumbika ulupili. Mwali inshila ishingi, kabili twalilubile imiku iingi. Umo pali ifwe alishibeko ici O’dam, kanshi twaleshimikila ku bantu abo twalesanga pa mayanda mu nshila. Icatupapwishe ca kuti, abantu baletweba ukuti ku Los Arenales uko twaleya, kwali bamo abaleti ni Nte sha kwa Yehova kabili balelongana mu kusambilila Baibolo. Ili lyashi lyalitupapwishe lelo lyalitukoseshe.

Twasukile twafika ku Los Arenales, ninshi na makasa nayafimba. Muli iyi ncende mwaba amayanda ayatalukana aya matafwali ne mitenge ya fibokoshi, takwaba isukulu nelyo amalaiti.  Aba bantu bapiina icine cine ifi baikala ukutali sana na bantu bambi, balya fye utumikate bapangila na mataba no twa kulya tumbi. Twasangile ba Melesio, abaume abapololoka bwino kabili balitemenwe nga nshi pa kutumona. Batusendele ku ng’anda yabo iinono kabili batwebele ukuti cila bushiku balepepa kuli Yehova ukuti akatume Inte shakwe ku kusambilisha ulupwa lwabo Baibolo na bena O’dam banabo. Balemona ukuti te kuti basuke amepusho yonse ayo abantu bakwete.

Abena O’dam balapepa sana imipashi. Babomfya ifintu pamo nga amasako ya kwa cembe na mafupa, balapepa ifintu pamo nga amenshi, umulilo na fimbi ifyabumbwa, kabili balatiina ing’anga ishibacusha. Ba Melesio balondolwele ukuti inshita imo ilyo baile ku musumba no kusambilila ukutila Yehova e Lesa wa cine, balipoosele ifilubi fyabo fyonse. Abekalamushi bale-enekela ukuti balesa babo balaipaya ba Melesio. Ilyo bamwene ukuti tapali icacitike, bailwike ukuti Yehova alikwatishapo amaka ukucila balesa babo. Ici calengele ukuti na bo baleya mu kusambilila Baibolo ba Melesio nga balesambilisha ulupwa lwabo, ukubomfya ulupapulo lwa Nte sha kwa Yehova.

Ba Melesio batile: “Nabebele ukuti intanshi bafwile ukoca ifishimba fyonse ne filubi ifyo bakwete.” Abengi balilekele ukutiina imipashi, kabili abalesangwa mu kusambilila Baibolo balifulileko, balicilile pali 80. Twalipapile pa kumfwa ifi, ne ci calengele ukuti bulya bwine bushiku twite abantu ukwisa mu kulongana. Twatumine abantu abaile na bakabalwe ku kuyaita abaleisa lyonse pa ng’anda ya ba Melesio ku kusambilila Baibolo. Nangu ca kuti cali ni mu kati ka mulungu na bantu twabetile fye mu kampampa, abantu 25 balishile, bamo baishile na makasa, bambi baishile pa mpunda.

Twalanshenye na bantu pa mepusho ya mu Baibolo ayo bakwete kabili ba Melesio e balepilibwila mu ci O’dam. Baipwishe amepusho pamo nga: “Bushe Yehova alitutemwa nangu ca kuti tuli bena India?” “Bushe alomfwa amapepo tupepa mu ci O’dam?” “Bushe Yehova akatucingilila ilyo Armagedone ikesa nangu ca kutila twikala ukutali sana ne misumba?” Twalitemenwe nga nshi ukusambilisha aba bantu abaicefya ifyo Baibolo ilanda ukuti Yehova alasakamana abafuuka, te mulandu no mutundu wabo nelyo uko bekala. Batupaapete ukuti tukabatumine umuntu uwa kwisabasambilisha na fimbi.

Pa numa, twalile ifya kulya twaishile na fyo pamo ne fi fibusa twapangile. Bwalilile, kabili kwalitalele nga nshi, lelo twalitemenwe sana ilyo batwebele ukuyalaala mu cikuulwa ico balekuula. Ilyo bwacele balitushindike uko twashile motoka ukubomfya inshila iipi, kabili e fyo twabwelelemo ku Durango, ninshi natunaka lelo twali ne nsansa nga nshi.

Ala caliweme sana ukumonana na aba bantu ba mitima ya cishinka, nangu ca kuti abengi tabaishiba ukubelenga nelyo ukulanda iciSpanish, balafwaya sana ukusambilila pali Lesa wa cine no kumupepa! Ukutula apo twailileko, ba Nte na bambi 6 baliyako, kabili baikeleko imilungu itatu. Basambilishe abantu 45 abafwaya ukubombela Yehova. Aba bonse balasangwa ku kulongana lyonse.

Na cimbi icisuma ca kuti, mu Los Arenales mwaba fye ituuka limo lelo balileka ukushitishamo fwaka. No mulandu wa kuti abantu abengi balesambilila Baibolo kabili bonse balileka ukupeepa fwaka. Kabili balilembesha ne fyupo fyabo.

[Icikope pe bula 24]

Ba Melesio na bena mwabo, abana babo bane, na bapongoshi babo

[Ifikope pe bula 25]

Balesambilila Baibolo e lyo uku balelongana mu Los Arenales

[Abatusuminishe Ukubomfya Icikope pe bula 25]

Servicio Postal Mexicano, Correos de Mexico