Sambilileni Icebo ca kwa Lesa

Bushe Ubufumu bwa kwa Lesa Cinshi?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti batemwa nga nshi ukulanshanya na imwe aya masuko.

1. Bushe Ubufumu bwa kwa Lesa cinshi?

Ubufumu bwa kwa Lesa buteko ubwaba ku muulu. Bukapyana amabuteko yonse aya pano calo kabili bukalenga ukufwaya kwa kwa Lesa ukucitwa mu muulu na pano isonde. Kanshi Ubufumu bwa kwa Lesa e buteko fye ubusuma ubo abantu bonse bakabila.—Belengeni Daniele 2:44; Mateo 6:9, 10.

Ubufumu bonse bulakwata imfumu. Yehova asala Umwana wakwe, Yesu, ukuba Imfumu pa Bufumu Bwakwe.—Belengeni Luka 1:30-33.

2. Mulandu nshi Yesu alingila ukuba Imfumu?

Umwana wa kwa Lesa alilinga ukuba Imfumu pantu wa cikuuku, alitemwa icalungama, kabili alikwata na maka ya kwafwa abantu. (Mateo 11:28-30) Ilyo bamubuushishe ku bafwa, Yesu aile ku muulu no kwikala ku kwa kulyo kwa kwa Yehova alelolela ukuti bakamupeele ubufumu. (AbaHebere 10:12, 13) Pa numa Lesa alimupeele amaka ya kutendeka ukuteka mu muulu.—Belengeni Daniele 7:13, 14.

3. Ni bani bambi abakalateka na Yesu?

Lesa e usala ababa mwi bumba lya bantu abo beta ukuti “aba mushilo” pa kuti bakateke na Yesu mu muulu. (Daniele 7:27) Ababalilepo ukusalwa ukuba mwi bumba lya ba mushilo batumwa ba cishinka aba kwa Yesu. Na pali ino ine nshita Yehova alitwalilila ukusala abaume na banakashi aba cishinka aba kuba mwi bumba lya ba mushilo. Nga filya fine cali kuli Yesu, babuushiwa ne mibili ya mupashi.—Belengeni Yohane 14:1-3; 1 Abena Korinti 15:42-45.

Bantu banga bakaya ku muulu? Yesu abetile ukuti “umukuni unono.” (Luka 12:32) Bonse pamo bakaba 144,000, kabili bakateka icalo pamo na Yesu.—Belengeni Ukusokolola 5:9, 10; 14:1.

  4. Ni lilali Ubufumu bwa kwa Lesa bwatendeke ukuteka?

Yesu aishileba Imfumu mu 1914. * Ilyo fye atendeke ukuteka, apoosele Satana ne fibanda fyakwe pano isonde. (Ukusokolola 12:7-10, 12) Ukutula ilya nshita, amafya yalifulilako pano calo. Inkondo, ifinkukuma, ifipowe, ifikuko, na bumpulamafunde fyaba lubali lwa cishibilo icilanga ukuti tuli mu nshiku sha kulekelesha. (2 Timote 3:1-5) Bonse abafwaya ukwisatekwa no Bufumu bwa kwa Lesa balingile ukusambilila ifyo bengaba abasambi ba Mfumu Yesu.—Belengeni Luka 21:7, 10, 11, 31, 34, 35.

5. Finshi Ubufumu bwa kwa Lesa bulecita pali ino nshita kabili finshi bukacita ku ntanshi?

Ukupitila mu mulimo wa kushimikila imbila nsuma mwi sonde lyonse, Ubufumu bwa kwa Lesa buleafwa abantu abengi nga nshi mu fyalo fyonse ukusambilila inshila sha kwa Lesa. (Mateo 24:14) Ilyo bukonaula abantu babipa aba pali cino calo, bukacingilila “ibumba ilikalamba” ilya bantu ba cishinka abo Yesu akalateka.—Belengeni Ukusokolola 7:9, 10, 13-17.

Mu myaka 1,000, Ubufumu bukalenga icalo ukuba paradaise. Pa kulekelesha, Yesu akalubwila Ubufumu kuli Wishi. (1 Abena Korinti 15:24-26) Bushe kuliko bamo abo mwaishiba abo mwingatemwa ukwebako pa Bufumu bwa kwa Lesa?—Belengeni Amalumbo 37:10, 11, 29.

Nga mulefwaya ukwishibilapo na fimbi, belengeni ifipandwa 8 na 9 ifya mu citabo citila Bushe Cinshi Baibolo Isambilisha?, icalembwa ne Nte sha kwa Yehova.

[Futunoti]