Ababelenga Ino Magazini Balepusha Ukuti . . .

Bushe Armagedone Cinshi?

▪ Abengi nga baumfwa ishiwi lya kuti “Armagedone” batontonkanya pa bonaushi ubukalamba, pamo nga inkondo ya manyukiliya, utuyofi utwingakuma ifyalo ifingi, nelyo akayofi akengabako pa mulandu wa kukaba kwe sonde nelyo ukutalala ukucila mu cipimo. Mu Baibolo ili shiwi talilanda pali ifi fintu. Nomba bushe Baibolo itila Armagedone cinshi?

Ishiwi “Armagedone” (“Har–Magedon”) lisangwa mwi buuku lya mu Baibolo ilya Ukusokolola. Lipilibula inkondo iyaibela, “inkondo ya bushiku bukalamba ubwa kwa Lesa Wa Maka Yonse,” umo “ishamfumu sha ba pano isonde shonse” shikalonganikwa ku kulwa na Lesa ubulwi bwa kulekeleshako. Amalembo na yambi ayengi yalilanda pali iyi nkondo.—Ukusokolola 16:14-16; Esekiele 38:22, 23; Yoele 3:12-14; Luka 21:34, 35; 2 Petro 3:11, 12.

Bushe iyi nkondo isanshamo finshi? Ukubomfya amashiwi ya mampalanya, ibuuku lya Ukusokolola litweba ukuti: “Ishamfumu sha pe sonde na mabumba ya shiko nafilongana ku kulwa no waikala pali kabalwe ne bumba lyakwe.” Uyu “waikala pali kabalwe” Mwana wa kwa Lesa, Yesu Kristu, uo Lesa asonta ukutungulula iminshipendwa ya bamalaika ku kucimfya abalwani ba kwa Lesa. (Ukusokolola 19:11-16, 19-21) Pali Yeremia 25:33 Baibolo yalilanda ifyo abantu abashipepa Lesa abakonaulwa bakafula, yatila: “Mu bushiku ubo abakepaiwa kuli Yehova, bakakumana pano isonde, ukufuma ku mpela ukufika na ku mpela.”

Mulandu nshi inkondo ya Armagedone ilingile ukwishila? Inko shalikaana ukulatekwa na Lesa, shifwaya fye ukulaiteka ishine. (Amalumbo 24:1) Bucipondoka bwabo bwalilondololwa pa Amalumbo 2:2 apatila: “Ishamfumu sha pano isonde shaima na bashimucindikwa balongana pa kuti bemine Yehova no wasubwa wakwe.”

Aba bacipondoka baba kwati bantu abaikala pa mpanga iishili yabo e lyo balabomfya bubi bubi ifintu fyabapo kabili balafyonaula. Inko muno nshiku shileonaula isonde no kulikowesha. Icebo ca kwa Lesa calisobele ukuti ifi fintu ifyabipa fikalacitika, catila: “Inko shena shakalipa, no bukali [bwa kwa Lesa] bwaisa.” Lyena Lesa “akonaula abaleonaula isonde.” (Ukusokolola 11:18) Armagedone e nshila Lesa akabomfya pa kuti ifibumbwa fyonse fikeshibe uwakwata insambu sha kuteka abantunse.—Amalumbo 83:18.

Bushe Armagedone ikesa lilali? Umwana wa kwa Lesa alandile apabuuta ukuti: “Ulwa bushiku bulya ne nshita takuli uwaishiba, nangu ni bamalaika ba mu muulu nangu Mwana, kano fye Tata.” (Mateo 24:36) Na lyo line, ilyo Imfumu Iicimfya Yesu Kristu alelanda pali Armagedone, alandile na ya mashiwi ya kutusoka ayatila: “Moneni! ndeisa ngo mupuupu. Alipaalwa uulelola.” (Ukusokolola 16:15) Kanshi iyi nkondo iikaba mu calo conse yalyampana no kubapo kwa kwa Kristu. Ukusesema kwa mu Baibolo kulanga ukuti ukubapo kwa kwa Kristu e ino ine nshita tuleikalamo.

Abakafwa pa Armagedone babifi abashifwaya ukwaluka, kabili kukaba “ibumba ilikalamba” ilya bakapusuka. (Ukusokolola 7:9-14) Bakamonako uko aya mashiwi yakafikilishiwa, ayatila: “Pashala fye panono no mubifi takabepo; awe ukalolekesha apo aali, no kusanga talipo. Lelo abafuuka e bakekala mu calo, kabili bakasekelela nga nshi pantu umutende ukafula.”—Amalumbo 37:10, 11.

[Amashiwi pe bula 10]

“Abafuuka e bakekala mu calo, kabili bakasekelela nga nshi pantu umutende ukafula”