“Mwe Yehova, . . . Mwalinjishiba”
Palameni Kuli Lesa
“Mwe Yehova, . . . Mwalinjishiba”
“NGA kwaliba ico umuntu engafilwa ukushipikisha, kwishiba ukuti takwaba nangu umo uumusakamana.” * Bushe mwalitala amumfwapo kwati takwaba nangu umo uumusakamana nelyo uwishiba ifyo mulepitamo, pali bufi ukwishiba ifyo muleumfwa? Nga e fyo mumfwa ninshi aya mashiwi kuti yamusansamusha, aya kuti: Yehova alasakamana nga nshi abamupepa kabili aleshiba fyonse ifibacitikila mu bumi cila bushiku. Ifi e fyo tusanga mu mashiwi Davidi alembele mu Amalumbo 139.
Davidi alicetekele ukuti Lesa alimubikileko amano ica kuti atile: “Mwe Yehova, mwafwayafwaya muli ine, kabili mwalinjishiba.” (Icikomo 1) Davidi abomfeshe insoselo iisuma nga nshi. Ishiwi lya ciHebere ilyo bapilibula ukuti “ukufwayafwaya” kuti lyalosha na ku kwimba ulubwe (Yobo 28:3), ku kubebeta icalo (Abapingushi 18:2), nelyo ku kuceeceeta umulandu pa kuti beshibe bwino ifishinka (Amalango 13:14). Ca cine, Yehova alitwishiba bwino sana, caba kwati aliceeceeta fyonse fye pali ifwe. Filya Davidi abomfeshe ishiwi lya kuti “ine,” fitusambilisha ukuti Lesa alabika amano ku babomfi bakwe. Alafwayafwaya muli bena no kwishiba umubomfi wakwe umo na umo.
Davidi alondolwele ifyo Lesa abika amano ku kufwayafwaya mu babomfi bakwe ilyo atile: “Imwe mwaishiba ukwikala kwandi no kwima kwandi. Mwaishiba amatontonkanyo yandi nangu mwaba ukutali.” (Icikomo 2) Kuti twatila Yehova aba “ukutali,” e kutila mu muulu. Na lyo line, aleshiba nga twaikala, nalimo cilya akasuba kawa pa numa ya kubombesha, kabili aleshiba ilyo twaima ulucelo no kutwalilila ukubomba imilimo yesu iya cila bushiku. Aleshiba ne fyo tutontonkanya, ifyo tufwaisha, na mapange yesu. Bushe ukwishiba ukuti Lesa alaceeceeta ababomfi bakwe kwalilengele Davidi ukumfwa umwenso? Awe nakalya, Davidi alombele ukuti Lesa alemuceeceeta. (Icikomo 23, 24) Mulandu nshi?
Davidi alishibe ukuti Yehova amona fye ubusuma mu bamupepa. Alembele ukuti: “Mulamona ukuya kwandi no kusendama kwandi, kabili mwalishiba imibele yandi yonse.” (Icikomo 3) Cila bushiku Yehova alamona ‘imibele yesu,’ ifilubo fyesu ne milimo yesu iisuma. Bushe abika amano ku fibi nelyo ku fisuma ifyo tucita? Ishiwi lya ciHebere ilyo bapilibula ukuti “mulamona” kuti lyapilibula na “ukwela,” nga filya shibulimi ela ingano pa kuti afumyemo imisungu. Ishiwi lya kuti “mwalishiba,” mu ciHebere kuti lyapilibula “ukutemwa.” Yehova nga aleceeceeta ifyo abamupepa basosa no kucita cila bushiku, abika fye amano ku fisuma. Mulandu nshi? Alatemwa ifyo besha na maka pa kuti bamusekeshe.
Amalumbo 139 yatusambilisha ukuti Yehova alasakamana nga nshi abamupepa. Alafwayafwaya muli bena kabili alabacingilila ilyo balebomba imilimo yabo cila bushiku. Kanshi aleshiba amafya bapitamo, kabili aleshiba ifyo basakamikwa ne fyo bomfwa ilyo balecula. Bushe te kuti mutemwe ukulapepa Lesa wa musango yu uusakamana abamupepa? Nga kuti mwatemwa, muleibukisha ukuti: Yehova “takalabe umulimo wenu no kutemwa uko mwalangile kwi shina lyakwe.”—AbaHebere 6:10.
Amalembo ya kubelenga mu September:
[Futunoti]
^ para. 3 Uwalembele aya mashiwi ni Arthur H. Stainback.
