Ababelenga Ino Magazini Balepusha Ukuti . . .

Bushe Icalo Cikapwa mu 2012?

▪ Pa mulabasa wa BBC batile: “Abantu abengi abasumina ukuti icalo cikonaika bakuukile mu mushi umo uwa mu France. Basumina ukuti icalo cikapwa pa 21 December 2012, ilyo imyaka 5,125 ikapwa ukulingana na kalenda ya kale iya bena Maya.”

Nangu ca kutila bashimapepo, na baitunga ukuti ni basayantisti, e lyo na bantu bambi abasobela ifikacitika ku ntanshi beba abantu ukuti isonde likonaika, isonde talyakonaike nakalya. Ca cine, isonde talyakonaike mu 2012. Na kuba, likabako umuyayaya.

Baibolo itweba ukuti: “Inkulo imo ilepita, ne nkulo imbi ileisa; lelo isonde lyaikalilila fye umuyayaya.” (Lukala Milandu 1:4) Na kabili tontonkanyeni pa mwalola amashiwi yaba pali Esaya 45:18, ayatila: “Yehova, . . . Kapanga we sonde kabili Kalenga wa liko, uwalipampamike, ushalipangiile apa fye, lelo uwalipangiile ukuti lileikalwamo, atila: ‘Nine Yehova, kabili takwaba umbi.’”

Bushe umufyashi uwatemwa umwana wakwe kuti apoosa inshita iikalamba ukupanga icintu icisuma ica kwangasha umwana, e lyo cilya umwana ayangashako fye panono, umufyashi aconaula? Umufyashi uwingacita ica musango yu ninshi alikaluka icine cine! Mu nshila imo ine, ico Lesa apangile isonde ni co alefwaya abana bakwe ukuti baleikalamo. Lesa aebele Adamu na Efa ukuti: “Fyaleni, fuleni, kumaneni pe sonde no kulimapo.” Pa numa, “Lesa amwene ifyo apangile kabili moneni! nafiwama nga nshi.” (Ukutendeka 1:27, 28, 31) Lesa talaba umulandu apangiile isonde; takaleke isonde ukonaika. Yehova alanda ukuti ifyo alaya fikacitika, atila: “[Icebo candi] tacakabwelele kuli ine ukwabula ukucita nangu cimo, lelo cikacita ico mfwaya, kabili cikafikilisha ico nacitumina.”—Esaya 55:11.

Lelo, Yehova “akonaula abaleonaula isonde.” (Ukusokolola 11:18) Alitulaya mu Cebo cakwe ukuti: “Abalungama e bakekala pa calo, na ba kaele e bakashalapo. Lelo ababifi, bakalofiwa mu calo; na ba bufi, bakabafumpulamo.”—Amapinda 2:21, 22.

Bushe ni lilali ifi fikacitika? Takwaba umuntu nangu umo uwaishiba. Yesu atile: “Lelo takuli uwaishiba ubushiku bulya nelyo inshita, nangu fye ni bamalaika mu muulu nangu fye Mwana, kano Tata e waishiba.” (Marko 13:32) Inte sha kwa Yehova tabalanda ukuti balishiba ubushiku Lesa akonaula ababipa. Nangu ca kutila balamona “icishibilo” icilanga ukuti impela ili mupepi kabili balisumina no kuti abantunse baleikala mu “nshiku sha kulekelesha” isho Baibolo yalandapo, tabaishiba ubushiku “impela” ya calo ikesa. (Marko 13:4-8, 33; 2 Timote 3:1) Balishiba ukuti ni Shifwe uwa ku muulu no Mwana wakwe epela e baishiba ilyo impela ikesa.

Lelo ilyo impela ishilaisa, Inte sha kwa Yehova balabombesha ukushimikila imbila nsuma ya Bufumu bwa kwa Lesa, ubuteko ubwa ku muulu ubukateka isonde no kulenga ukuti likabe paradaise umo ‘abalungama bakekala umuyayaya.’—Amalumbo 37:29.

[Abatusuminishe ukubomfya icikope pe bula 10]

Image Science and Analysis Laboratory, NASA-Johnson Space Center