Ifyo Mwingacita Nga Mwaponenwa na Kayofi

Apo utuyofi tulefulilako fye kabili tuleipaya na bantu abengi nga nshi, bushe kuti mwacita shani nga mwaponenwa na kayofi? Natulande pali fimo ifyo mwingacita.

Mwilaikala mu ncende umwingacitika utuyofi. Baibolo itila: “Uwasalapuka nga amona ububi alabelama, lelo imbulwa mano shena shiya fye no kukandwa.” (Amapinda 22:3) Uku kufunda kwa mano kuti kwatwafwa. Nga ca kutila batusoka ukuti nomba line ku ncende twikala kwalaba mulamba, ulupili lwalapuulika, kwalaisa icikuuku ca mwela icikalamba nelyo kankungwe, kuti cawama ukufuma kuli iyo ncende no kufulumukila kumbi. Ubumi bwalicindama ukucila ing’anda nelyo ifipe.

Kuli bamo, nalimo kuti cabangukila ukusalapo ukukanaikala mu ncende umucitika sana utuyofi. Umuntu umo uwasoma atile: “Ilingi line utuyofi tucitikila mu ncende shimo shine. Ni mu ncende fye ishinono e mucitika sana utuyofi kabili utuyofi utukalamba utukacitika ku ntanshi, tukacitikila muli ishi shine incende.” Na kuba, ifi fine e fyo caba maka maka mu ncende pamo nga shilya shapalama kuli babemba ne mimana nelyo ku ncende ukuba ifinkukuma. Nga ca kutila mwasalapo ukukanaikala muli ishi ncende nelyo mwakuukila ku ncende imbi, ifintu kuti fyabako eyefilya.

Ipekanyeni. Lelo nangu mwingacita fyonse ifikabilwa, nalimo kuti mwaponenwa na masanso ayabula ukwenekela. Nomba kuti cayanguka ukucitapo cimo nga ca kutila mwali-ipekanya. Nga mwaipekanya ninshi mwacita filya amashiwi yaba pa Amapinda 22:3 ayo tulandilepo kale yatufunda. Bushe mwalilongela limo ifintu ifyacindama mu cola ica kuti nga kwacitika akayofi kuti mwasenda fye no kufulumuka? Ulupapulo lwa 1-2-3 of Disaster Education lwatila, muli ici cola kuti mwabikamo imiti iyo mwingabomfya umo nga alwala nelyo aicena, amenshi ya mu mabotolo, ne fya kulya ifishonaika bwangu e lyo ne fitupa ifyacindama. Na kabili kuti cawama nga ca kutila mwalanshenye ngo lupwa pa masanso ayengacitika ku ncende mwikalila ne fyo mwingacita nga yalicitike.

Twalilileni ukuba cibusa wa kwa Lesa. Ukuba cibusa wa kwa Lesa kuti kwamwafwa ilyo mwaba na mafya ayali yonse. Baibolo ilanda pali Lesa ukuti ni “Shifwe wa nkumbu kabili Lesa wa cisansamushi conse, uutusansamusha mu macushi yesu yonse.” Icikomo cimbi na co camulondolola ukuti ni Lesa “uusansamusha abali no bulanda.”—2 Abena Korinti 1:3, 4; 7:6.

Ca cine, Lesa alishiba fyonse ificitikila abamutetekela. Ni Lesa uwaba no kutemwa kabili alasansamusha abantu bakwe mu nshila ishalekanalekana. (1 Yohane 4:8) Ukupepela umupashi wa mushilo uwakwata amaka kuti kwamwafwa mu  mafya yonse ukucila ukupepa ukuti Lesa acite icisungusho. Umupashi wa mushilo kuti walenga mwaibukisha amalembo ya mu Baibolo ayengamusansamusha ilyo mulepita mu mafya. Cine cine, ababomfi ba kwa Lesa aba cishinka kuti baumfwa nge fyaumfwile Davidi, imfumu ya Israele uwatile: “Nangu nga naenda mu mupokapoka umwafiita fititi, nshitiina ububi, pantu muli na ine; inkonto yenu no mutambu wenu e finsansamusha.”—Amalumbo 23:4.

Abena Kristu balafwana. Mu nshita ya batumwa, kasesema Umwina Kristu Agabu aseseme ukuti, “icipowe icikalamba cali mupepi no kupona mu fyalo fyonse pano isonde; ico, na kuba, caponene mu nshita ya kwa Klaudi.” Abasambi abengi aba kwa Yesu abali muYudea baliponenwe ne ci cipowe. Bushe abasambi abali mu ncende shimbi bacitile shani ilyo baumfwile ukuti Abena Kristu banabo baliponenwe ne cipowe? Baibolo itila: “Umusambi umo na umo atumine ifya kukumbusuka ku ba bwananyina abaikele mu Yudea ukulingana na po akwatile.” (Imilimo 11:28, 29) Balilangile ukuti balitemenwe aba bwananyina ilyo batumine ifya kubakumbusuka.

Na muno nshiku mwine, e fyo ababomfi ba kwa Lesa bacita nga ca kutila bamunyinabo baponenwa na kayofi. Inte sha kwa Yehova balishibikwa ukuti balafwa Abena Kristu banabo. Ku ca kumwenako, ilyo icinkukuma icikalamba cacitike mu Chile pa 27 February 2010, Inte sha kwa Yehova tabaikete na ku cani, baliile mu kwafwa abasanshilwe. Ba Karla abo ing’anda yaonaike ku cinkukuma, batile: “Nalitemenwe nga nshi kabili nalikoseleshiwe, pantu ubushiku fye bwakonkelepo, [ba Nte banensu] ukufuma mu ncende shalekanalekana balishile mu kutwafwa. Ukwabula no kutwishika, Yehova alitusansamwishe ilyo abomfeshe aba bamunyinefwe abaitemenwe fye ukwisa mu kutwafwa. Nalimwene ukuti Yehova alintemwa kabili alansakamana.” Ba Shikulu ba ba Karla, abashili Nte ya kwa Yehova, balimwene ifyo babafwile, kabili batile: “Nshabala monapo ica musango yu ku bantu mpepa nabo.” Ifyo bamwene fyalengele ukuti bebe Inte sha kwa Yehova ukuti balebasambilisha Baibolo.

Ukwampana pamo na bantu abatemwa Lesa kuti kwamwafwa sana nga mwaponenwa na mafya. Lelo bushe kukaba inshita ilyo utuyofi tukapwa? Natumone ifyo Baibolo yalandapo.

[Icikope pe bula 6]

Bushe mwalilongela limo ifintu ifyacindama mu cola ica kuti nga kwacitika akayofi kuti mwasenda fye no kufulumuka?

[Icikope pe bula 7]

Ukupepela umupashi wa mushilo uwakwata amaka kuti kwamwafwa mu mafya yonse ukucila ukupepa ukuti Lesa acite icisungusho

[Icikope pe bula 7]

Abena Kristu balafwana nga kwacitika akayofi

[Icikope pe bula 7]

“Nalimwene ukuti Yehova alintemwa kabili alansakamana”