Abrahamu Ali ne Citetekelo
Abrahamu Ali ne Citetekelo
Bushiku bumo Abrahamu aiminine pa nse ubushiku ninshi nakutalala tondolo. Ilyo aloleshe mu muulu umwaiswile intanda, atontonkenye pa bulayo bwa kwa Lesa ubwa kuti abana bakwe bali no kufula nge fyafulile intanda amwene. (Ukutendeka 15:5) Intanda isho amwene, shamwibukishe ubulayo Yehova amulaile. Na kabili shalengele ashininkishe ukuti ifyo bamulaile fikafikilishiwa. Na kuba, nga ca kutila Yehova alikwata amaka ya kubumba fyonse ifyaba mu muulu na pe sonde, bushe kuti afilwa ukulenga Abrahamu na Sara ukukwata umwana? Ifi e fyalengele ukuti Abrahamu abe ne citetekelo.
BUSHE ISHIWI LYA KUTI ICITETEKELO LYALOLA MWI? Ukulingana ne fyo Baibolo yalanda, “icitetekelo” kusubila nga nshi ukuti icintu cimo cikacitika nangu ca kutila tacilati cicitike. Icitetekelo ca musango yu cashimpwa pa bushininkisho bwa cine cine. Umuntu uwakwata icitetekelo abika sana amano ku kufikilishiwa kwa fintu Yehova alaya, kabili kuli ena caba kwati no kufikilishiwa fyalifikilishiwa kale.
BUSHE ABRAHAMU ALANGILE SHANI UKUTI ALI NE CITETEKELO? Abrahamu alilangishe ukuti alisubile mu fyo Lesa alaile. Citetekelo e calengele ukuti Abrahamu afume mu calo afyalilwemo, ukusubila ukuti Yehova ali no kumulanga ukwa kuya nge fyo amwebele. Citetekelo e calengele ukuti Abrahamu ale-endauka mu Kanaani, no kusubila ukuti bushiku bumo, abana bakwe bali no kwikala muli ici calo. Kabili citetekelo e calengele ukuti Abrahamu omfwile Lesa no kufwaya ukupeela Isaki ilambo, ukusubila ukuti Yehova nga alefwaya, ali no kumubuusha.—AbaHebere 11:8, 9, 17-19.
Abrahamu abikile amano ku fyali no kucitika ku ntanshi ukucila ku fyo ifintu fyali kale. Nangu ca kuti nalimo Abrahamu na Sara baleipakisha ukwikala bwino mu Uri ukucila ifyo baikele mu Kanaani, ‘tabalefuluka icifulo uko bafumine.’ (AbaHebere 11:15) Lelo babikile amano ku fyo Lesa aali no kubapaala ku ntanshi capamo na bana babo.—AbaHebere 11:16.
Bushe kwali icalengele Abrahamu ukuba ne citetekelo? Ukwabula no kutwishika, e ko cali. Yehova alifikilishe fyonse ifyo alaile. Mu kuya kwa nshita, abana ba kwa Abrahamu balifulile no kuba uluko ulo baleita ati abena Israele. Abena Israele basukile batendeka ukwikala mu Kanaani, muli cilya cine calo Yehova alaile ukupeela Abrahamu.—Yoshua 11:23.
FINSHI TWINGASAMBILILAKO? Kuti twacetekela ukuti Yehova akafikilisha ifyo alaya. Nangu ca kutila fimo kuti filemoneka kwati te kuti ficitike, twalicetekela ukuti “Lesa kuti acita ifintu fyonse.”—Mateo 19:26.
Ifyo Abrahamu acitile fitusambilisha ukuti, tatufwile ukubika amano ku fyo ifintu fyali kale, lelo ku fyo tukaipakisha ku ntanshi. Ifi fine e fyo ba Jason basambilila ukucita. Ba Jason balilwala ubulwele ububi ubwalenga ukuti babe no bulebe. Batile: “Kwena ukulanda fye icishinka, inshita shimo ndatontonkanya pa fyo nali kale. Fimo ifyo mfuluka sana fintu fye ifinono pamo nga, ukukumbatila umukashi wandi, Amanda.”
Na lyo line, ba Jason balicetekela sana ukuti Yehova akafikilisha ifyo alaya, ukubikako no bulayo bwa kwalula isonde ukuba paradaise no bwa kuti abantunse ba cishinka bakaba no mweo wa muyayaya ukwabula ukulwala. * (Amalumbo 37:10, 11, 29; Esaya 35:5, 6; Ukusokolola 21:3, 4) Ba Jason balandile no kutila: “Lyonse ndaicinkulako ukuti ku ntanshi ifintu fikawama. Nomba line fye, amasakamika, amafya, ubulanda, no kuipeela umulandu, fyonse fikafumishiwapo umuyayaya.” Ala ba Jason baliba ne citetekelo cakosa kwati fye fintu na Abrahamu ali, kabili tulingile ukubapashanya!
[Futunoti]
^ para. 9 Nga mulefwaya ukwishibilapo na fimbi pali paradaise iikaba pano pene pe sonde, belengeni ifipandwa 3, 7, na 8 mu citabo citila, Bushe Cinshi Baibolo Isambilisha? Abalemba ici citabo ni Nte sha kwa Yehova.
