Sambilileni Icebo ca kwa Lesa

Bushe Baibolo Yalisobela Ifikacitika ku Ntanshi?

Ici cipande cilelanda pa mepusho ayo nalimo mufwaisha ukwishiba kabili cilemulanga napo mwingasanga amasuko muli Baibolo yenu. Inte sha kwa Yehova kuti batemwa nga nshi ukulanshanya na imwe ayo masuko.

1. Bushe Baibolo yalisobela ifintu mu kulungatika?

Lesa Uwa Maka Yonse eka fye e wingeshiba ifikacitika ku ntanshi. (Amose 3:7) Ku ca kumwenako, kale sana alisobele ukuti Mesia, nelyo Kristu, akesa. Mesia aali no kufuma mu lupwa lwa kwa Abrahamu, umwaume wa citetekelo. Aali no kuba kateka uwali no kulenga abantu bonse aba cumfwila ukuba no bumi bwapwililika na kabili, ukwabula ukulwala. (Ukutendeka 22:18; Esaya 53:4, 5) Uyu Mwana walailwe aali no kufuma mu Betelehemu.—Belengeni Mika 5:2.

Yesu e waishileba Mesia. Imyaka 700 mu kubangilila, Baibolo yalisobele ukuti Mesia aali no kufyalwa kuli nacisungu no kuti abantu bali no kumusuula. Aali no kupeela umweo wakwe pa mulandu wa membu sha bantu abengi, kabili bali no kumushiika pamo na bakankaala. (Esaya 7:14; 53:3, 9, 12) Na kabili, ukucila imyaka 500 mu kubangilila, Baibolo yasobele ukuti aali no kwingila mu Yerusalemu ninshi nanina pa mpunda no kuti bali no kumufutuka pa ndalama sha silfere 30. Fyonse ifyo Baibolo yasobele fyalifikilishiwe.—Belengeni Sekaria 9:9; 11:12.

2. Bushe Lesa alasobela ne nshita ilyo ukusesema kukafikilishiwa?

Imyaka ukucila 500 mu kubangilila, Baibolo yalisobele umwaka uo Mesia ali no kumoneka. Ukufuma kale, ukufika fye na lintu Mesia amoneke, inshita baleipendela mu milungu ya myaka, icilepilibula ukuti “umulungu” umo walepele imyaka 7. Iyi milungu yali no kuba 7 ukubikapo na imbi 62, yonse pamo yali no kuba imilungu 69 iya myaka, e kutila imyaka 483. Ni lilali iyi myaka yatendeke? Ukulingana ne fyo Baibolo ilanda, iyi myaka yatendeke ilyo umubomfi wa kwa Lesa Nehemia afikile mu Yerusalemu no kutendeka ukukuula umusumba cipya cipya. Ilyashi lya kale ilya bena Persia litila uyu mwaka wali ni mu 455 B.C.E. (Nehemia 2:1-5) Ilyo papitile imyaka 483, Yesu alibatishiwe no kuba Mesia, mu mwaka wa 29 C.E., pa nshita ilya ine Baibolo yasobele.—Belengeni Daniele 9:25.

  3. Bushe ukusesema kwa mu Baibolo kulefikilishiwa muno nshiku?

Yesu alisobele ifintu ifyacindama ifyali no kulacitika muno nshiku. Asobele pa mbila nsuma iya Bufumu bwa kwa Lesa ubukalenga abantu abatemwa Lesa ukwikala umutende. Ubu Bufumu bukonaula cino calo cabipa.—Belengeni Mateo 24:14, 21, 22.

Ukusesema kwa mu Baibolo kwalilondolola bwino bwino ifyo ifintu fikaba ilyo impela ya calo ikaba mupepi. Baibolo yalisobele ukuti abantu bakalaonaula isonde, ukupusanako ne fyo abantu bengenekela ifintu ukuba ilyo kwaba ubuyantanshi mu calo. Amafya ayesako pa mulandu wa nkondo, ifipowe, ifinkukuma, ne fikuko, yakafulilako. (Luka 21:11; Ukusokolola 11:18) Abantu bakaba ne mibele yabipa. Muli ishi shine inshiku shayafya, abasambi ba kwa Yesu bakulashimikila imbila nsuma iya Bufumu bwa kwa Lesa ku nko shonse.—Belengeni Mateo 24:3, 7, 8; 2 Timote 3:1-5.

4. Bushe ifintu ku ntanshi fikaba shani ku bantunse?

Lesa Wa Maka Yonse ali no kucitila abantunse aba cumfwila ifintu ifisuma nga nshi. Yesu Kristu, Mesia, pamo na basalwa bakwe, bakalateka isonde ukufuma mu muulu. Yesu na basalwa bakwe e bapanga Ubufumu ubukateka pa myaka 1,000. Abafwa bakabuuka kabili bakakwata ishuko lya kupingwilwa ku mweo wa muyayaya. Na kabili, Ubufumu bukondapa bonse abakaba no mweo. Ukulwala ne mfwa tafyakabeko nakalya.—Belengeni Ukusokolola 5:10; 20:6, 12; 21:4, 5.

Nga mulefwaya ukwishibilapo na fimbi, belengeni amabula 23-25 na 197-201 mu citabo ca Bushe Cinshi Baibolo Isambilisha?