Ababelenga Ino Magazini Balepusha Ukuti . . .

Bushe Baibolo Isambilisha Ukuti Muli Lesa Umo Mwaba Batatu?

▪ Kwaliba inshila ishingi isho abantu balondolwelamo icisambilisho ca kuti muli Lesa umo mwaba balesa batatu. Bamo batila: “Kwaba balesa batatu (Lesa Tata, Lesa Mwana, na Mweo Mutakatifu), batila bonse ba muyayaya, ba maka yonse, balilingana, bonse ni ba Lesa kabili baba muli umo.” Bushe ifi e fyo Baibolo isambilisha?

Abasumina ukuti muli Lesa umo mwaba batatu ilingi babomfya amashiwi Yesu alandile ayaba pali Mateo 28:19. Muli Baibolo ya Diocess of Mbala ili lembo litila: “Kanshi namukaye mulafunda imitundu yonse, mukalebabatisha kwi shina lya kwa Tata na Mwana na Mweo Mutakatifu.” Ca cine ukuti pali ili lembo balilumbulapo Tata, Umwana, na mweo mutakatifu (nelyo umupashi). Lelo ili lembo talyalandapo ukuti baba muli umo. Yesu aleeba abasambi bakwe abaYuda ukusambilisha no kubatisha abantu mwi shina lya kwa Tata, ilya Mwana, ne lya mupashi wa mushilo. Bushe finshi abaYuda basuminemo?

Ilyo Lesa apeele abena Israele Amafunde ayaba na muli Baibolo, abebele ukuti: “Wilaba na balesa bambi pa cinso candi.” (Amalango 5:7) Bushe bantu banga abalandile aya mashiwi? Amalango 6:4 yalilondolola bwino ukuti: “Umfweni mwe bana ba kwa Israele: Yehova Lesa wesu ni Yehova umo,” tabamo batatu iyo. Abena Israele e lintu fye bafumine mu busha mu Egupti, umo abantu balepepa imisango yalekanalekana iya balesa batatu, pamo nga Osiris, Isis, na Horus (abali ku kuso). E mulandu wine Lesa aebele abena Israele ukulapepa fye Lesa umo. Mulandu nshi cacindamine ukumfwila ili funde? Kafundisha umuYuda, Dr. J. H. Hertz atile: “Aya mashiwi ayaumfwika aya kupepa fye Lesa umo yalesuusha bonse abasumine mu kupepa balesa abengi . . . Muli Shema tamwaba icisambilisho ca kuti muli Lesa umo mwaba batatu pantu cilasaalula Lesa uwaba fye umo mpo.” *

Apo Yesu ali muYuda, na o balimusambilishe ukulakonka ili funde. Ilyo bamutunkile kuli Satana pa numa fye ya kubatishiwa, atile: “Fuma apa, we Satana! Pantu calilembwa ukuti, ‘Yehova Lesa obe e o ulepepa, kabili eka fye e o ulebombela.’” (Mateo 4:10; Amalango 6:13) Kuli ici cacitike, kuti twasambililako ifintu fibili. Ica kubalilapo, Satana alefwaya ukubeleleka Yesu ukuti apepe umuntu umbi ukucila Yehova. Nga ca kuti Yesu na o ali ni Lesa, ifi Satana amwebele nga tafyalolelemo. Ica bubili, mu mashiwi Yesu alandile calimoneke fye apabuuta ukuti kwaba fye Lesa umo uo tulingile ukupepa, pantu atile ulepepa “eka fye.” Nga ca kutila Yesu aba muli balesa batatu, nga atile ulepepa fye “ifwe.”

Umuntu nga aishiba Lesa bwino bwino kabili alefwaya no kumubombela, alabatishiwa “mwi shina lya kwa Tata ne lya Mwana ne lya mupashi wa mushilo.” (Mateo 28:19) Aleshiba ukuti Yehova e Wapulamo, aleshiba no mulimo Yesu Kristu akwata mu kufikilisha ubufwayo bwa kwa Yehova. (Amalumbo 83:18; Mateo 28:18) Na kabili aleshiba ifyo umupashi wa mushilo uwa kwa Lesa ubomba, uwaba e maka yakwe.—Ukutendeka 1:2; Abena Galatia 5:22, 23; 2 Petro 1:21.

Icisambilisho ca kuti muli Lesa umo mwaba batatu califulunganya abantu pa myaka iingi. Lelo Yesu alisambilishe abasambi bakwe bwino bwino no kubatungulula kuli Yehova, ‘Lesa wa cine eka.’—Yohane 17:3.

[Futunoti]

[Abatusuminishe ukubomfya icikope pe bula 23]

Musée du Louvre, Paris