Sambilileni Icebo ca kwa Lesa

Bushe Tulingile Ukwibukisha Shani Imfwa ya kwa Yesu?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Bushe tulingile ukwibukisha shani imfwa ya kwa Yesu?

Yesu aebele abasambi bakwe ukulaibukisha imfwa yakwe ukubomfya umukate no mwangashi. Umukate waleimininako umubili wa kwa Yesu e lyo umwangashi waleimininako umulopa wakwe.—Belengeni Luka 22:19, 20.

Umukate uo Yesu abomfeshe wali uushatutumuka, tamwali icitutumushi. Mu Baibolo, icitutumushi ilingi cimininako ulubembu. Kanshi uyu umukate umushali icitutumushi walilingile ukwimininako umubili wapwililika uwa kwa Yesu. Apeele umubili wakwe nge lambo, kabili ili lambo lyapyene pa malambo ya nama ayo abantu baletuula ilyo balekonka Amafunde ya kwa Mose. (AbaHebere 10:5, 9, 10) Umwangashi waleimininako umulopa wa kwa Yesu uwacindama uwasuumine ilyo atufwilile pa membu shesu.—Belengeni 1 Petro 1:19; 2:24; 3:18.

2. Ni lilali tulingile ukulaibukisha imfwa ya kwa Yesu?

Yesu afwile pa Nisani 14, ubushiku balesefeshapo Ica Kucilila. Ku baYuda ubushiku bwaletendeka icungulo cilya akasuba kawa. Icungulo bushiku ilyo Yesu talafwa, alile ica kulya ca pa Ca Kucilila na batumwa bakwe kabili pa numa atendeke umulaalilo wa kwibukisha imfwa yakwe.—Belengeni Luka 22:14, 15.

Muno nshiku, abantu ba kwa Lesa bebukisha ifyo Lesa acita ku kupususha abantu bonse pe sonde ku lubembu ne mfwa ukupitila mwi lambo lya kwa Yesu. (Ukufuma 12:5-7, 13, 17) Nga filya fine Ica Kucilila calebako fye umuku umo mu mwaka, ne Cibukisho ca mfwa ya kwa Yesu na co cine cibako fye umuku umo mu mwaka pa Nisani 14, cilya akasuba kawa ukulingana no kupenda inshita ukwa mu Baibolo.—Belengeni Yohane 1:29.

  3. Ni bani balingile ukulyako umukate no kunwako umwangashi?

Ilyo Yesu apeele abasambi bakwe umwangashi, atile: “Iyi kapu cipangano cipya.” (1 Abena Korinti 11:25) Icipangano cipya capyene icipangano ca Mafunde ya kwa Mose, umo Lesa alaile abena Israele ukuti nga bakulamumfwila, bali no kuba abantu bakwe. (Ukufuma 19:5, 6) Lelo abena Israele tabaumfwilile Lesa. E ico Yehova abikileko icipangano cipya.—Belengeni Yeremia 31:31.

Ukubomfya ici icipangano cipya umwaba fye abantu abanono, Yehova alalenga abantu abengi ukupaalwa. Ababa muli ici icipangano banono, baba fye 144,000. Yehova akabomfya aba bene ku kupaala iminshipendwa ya bantu aba mu nko shonse no kubapeela umweo wa muyayaya muli paradaise pano isonde. Muno nshiku, bamo ababa mu cipangano cipya balebombela Yehova pano isonde. Aba bene fye, e balyako umukate no kunwako umwangashi pantu kapu ya mwangashi imininako “icipangano cipya.”—Belengeni Luka 12:32; Ukusokolola 14:1, 3.

4. Tunonkelamo shani mu kwibukisha imfwa ya kwa Yesu?

Ukwibukisha imfwa ya kwa Yesu cila mwaka kulenga tuletasha nga nshi pa fyo Yehova aba no kutemwa ukukalamba. Atumine Umwana wakwe ukwisatufwila pa membu shesu. Kanshi nga twasangwa ku Cibukisho, tufwile ukutontonkanya sana pa fyo imfwa ya kwa Yesu yacindama kuli ifwe. Tufwile ukutontonkanya na pa fyo twingalanga ukuti tulatasha pa fyo Yehova na Yesu batucitila.—Belengeni Yohane 3:16; 2 Abena Korinti 5:14, 15.

Nga mulefwaya ukwishibilapo na fimbi, belengeni amabula 206-208 mu citabo ca Bushse Cinshi Baibolo Isambilisha icalembwa ne Nte sha kwa Yehova.