Bushe Ukupupa Imipashi Kwalibipa?

Ukufuma fye ku bukashana, ba Barbara * balemona ifimonwa, baleumfwa amashiwi ya bantu, kabili balishininkishe ukuti balelanda na balupwa abafwa. Ba Barbara na bena mwabo ba Joachim balebelenga ifitabo ifyalelanda pa mipashi, kabili balishileishiba sana ukwilula ifikope pa makardi ya tarot ifilanga ifikacitikila abantu ku ntanshi. Aya makardi yabalangile ukuti bakakwata indalama ishingi, na cine balishilekwata indalama ishingi mu bukwebo bwabo. Bushiku bumo, amakardi yabalangile ukuti abantu ababipa bali no kwisa pa ng’anda kabili yabalangile ne fyo balingile ukuicingilila.

NANGU ca kutila abantu bamona abasumina mu fya mipashi ukuti bashala mu fya kale, ukumfwana ne mipashi kwaliseeka sana. Abantu abengi balafwala impinga, balabomfya ifipampa fya kubukilako, no kwipusha ku bomfwana ne mipashi pa kuti beshibe ifikabacitikila ku ntanshi nelyo ifyo bengaicingilila ku fyabipa. Muli magazini ya ku Germany iyo beta ukuti Focus mwali icipande caleti “Kompyuta na Lusifa,” icatile: “Ifyo balebika pa Intaneti filelenga abantu ukulatemwa sana ifya mipashi.”

Bushe mwalishiba ukuti Baibolo yalilandapo pa fya mipashi? Ifyo yalandapo nalimo kuti fyamupapusha.

Ifyo Baibolo Yalanda pa Kupupa Imipashi

Ifunde Lesa apeele abantu bakwe abena Israele lyatile: “Ekasangwa muli imwe . . . onse uubuka imbuko, uucita ifinjelengwe nelyo onse uusobela ifya ku ntanshi nelyo ing’anga, nelyo uulowa nelyo uwipusha ku umfwana ne mipashi nelyo ku waishibisha ifya kusobela nelyo onse uwipusha ku bafwa. Pantu onse uucita ifi fintu wa bunani kuli Yehova.” (Amalango 18:10-12) Mulandu nshi Yehova akaanishe abantu bakwe ukulapupa imipashi nangu fye panono?

Nge fyo ilyashi tubalilepo ukulanda lilelanga, abantu abengi basumina ukutila kuti balanda na bafwa no kuti ifyebo ifyo bapokelela fifuma ku bafwa. Icalenga abantu ukusumina ifi mulandu wa kuti imipepele iingi isambilisha ukuti abantu nga bafwa balaya ukwikala imipashi. Lelo ifi te fyo Baibolo isambilisha, itila: “Abafwa, tabaishiba akantu nangu kamo.” (Lukala Milandu 9:5) Ilondolola ukuti abafwa baba kwati bantu abaleele utulo utukalamba, tabeshiba icili conse icilecitika. *  (Mateo 9:18, 24; Yohane 11:11-14) Nalimo kuti mwaipusha ukuti, nga ca kutila abafwa tabaishiba akantu nangu kamo, ninshi abatila balalanda na bafwa ni bani balanda nabo?

Ukumfwana ne Mipashi

Amalyashi yaba mu mabuuku ya Mbila Nsuma yalangilila ukuti ilyo Yesu ali pano calo alilandilepo ne mipashi. Pali Marko 1:23, 24 patila, “umupashi wakowela” waebele Yesu ukuti: “Nimwishiba bwino.” Ukwabula no kutwishika, na imwe bene imipashi yalimwishiba bwino. Lelo bushe imwe iyi mipashi mwaliishiba?

Ilyo Lesa talapanga abantunse, apangile iminshipendwa ya bana abaume, nelyo bamalaika. (Yobo 38:4-7) Aba bamalaika balicila sana pa fyo fwe bantunse twaba. (AbaHebere 2:6, 7) Balikwata sana amaka kabili balicenjela nga nshi, kabili bapangilwe ukulacita ukufwaya kwa kwa Lesa. Uwaimbile amalumbo atile: “Cindikeni Yehova, mwe bamalaika bakwe, mwe mpalume, mwe bacita ifyo asosa.”—Amalumbo 103:20.

Baibolo yalanda ukuti mu kuya kwa nshita, bamalaika bamo batendeke ukulaumfwana na bantunse mu nshila iyo Lesa ashabasuminishe. Mulandu nshi balecitila ifi? Malaika wabalilepo ukucita ifi abepele Adamu na Efa, no kubalenga ukupondokela Lesa wabo kabili Kabumba. Ifi acitile fyalengele ukuti abe Satana Kaseebanya, uwa lwambo kabili uukaanya Lesa.—Ukutendeka 3:1-6.

Pa numa, bamalaika bambi “bashile ififulo fyabo ifyabalinga” mu muulu, bafwele imibili ya bantunse no kuupa abanakashi abayemba pano calo. (Yuda 6; Ukutendeka 6:1, 2) Aba bamalaika bacipondoka na bana babo amapaka balecusha sana abantunse, ica kuti pa calo “pafulile ubunkalwe.” Nalimo mwalishiba ifyo Baibolo ilanda ukuti Lesa alyonawile ilya nkulo yabipa kabili iyakaluka ilyo aletele Ilyeshi mu nshiku sha kwa Noa.—Ukutendeka 6:3, 4, 11-13.

Ilyeshi lyalengele bamalaika babipa ukufuula imibili ya buntunse no kubwelela ku muulu. Lelo Kabumba tabasuminishe ukubwelela ku “fifulo fyabo” ifya pa kutendeka. Lelo ababikile ku cifulo ca mampalanya icasuulwa ico bapashanya ku “filindi fya mfifi.” (2 Petro 2:4, 5) Baibolo ita bamalaika abapondweke ukuti “ifibanda.” (Yakobo 2:19) Ifi fine fibanda e filenga abantu ukalafwaya ukulaumfwana ne mipashi.

Finshi Ifibanda Fifwaya?

Ica kubalilapo ico ifibanda ifyumfwana na bantu fifwaya, kubafumya ku kupepa Lesa wa cine Yehova. Ifya bupe nelyo amaka ayo abengi abomfwana ne mipashi baitunga ukukwata, yalenga fye abantu ukukanaishiba icine pali Lesa no kukanaba ifibusa fyakwe.

Ica bubili, kuti twacishibila ku fyo Satana, umukalamba wa fibanda acitile kuli Yesu. Satana apeele Yesu “amabufumu yonse aya pano calo no bucindami bwa yako.” Cinshi Satana alefwaya Yesu ukucita pa kuti bamupeele aya mabufumu? Aebele Yesu ukuti: ‘Fukama no kumpepa.’ Ca cine, Satana ne fibanda bafwaya ukulabapepa. Lelo Yesu alikeene ukusuula Lesa no kupepa kwa cine.—Mateo 4:8-10.

 Muno nshiku, te lingi ifibanda filanda na bantu mu kulungatika nga filya fyacitile kuli Yesu. Lelo fifwaya ukubeleleka abashicenjele ku fintu ifimoneka kwati tafyabipa, ifintu pamo nga ukubuka, ukusobela ifya ku ntanshi na fimbipo. Te kwesha ukubelelekwa ku fintu fya musango yu! Tatulingile ukulamona kwati ishi ni nshila fye isha kumfwaninamo ne mipashi. Ifibanda fibomfya ifya mipashi ku kubeleleka abantu pa kuti fibafumye ku kupepa Yehova. Nga fyafilwa ukubabeleleka, ilingi filabacusha sana. Nga e fyo caba kuli imwe, kuti mwacita shani pa kuti fileke ukumucusha?

Ifyo Mwingacita pa Kuti Imipashi Ileke Ukumucusha

Mwikabepwa, imipashi iyumfwana na bantu ilwani ya kwa Lesa, ilolela fye ukonaulwa. (Yuda 6) Ni ncenjeshi kabili ya bufi, ilaifungushanya pa kuti cibe kwati abantu abafwa e balelanda. Bushe kuti mwaumfwa shani nga ca kutila mwaishibe ukuti umunenu ni ncenjeshi, tafwaya ukuti mulecita ifyo mwatemwa? Bushe kuti mwacita shani nga ca kuti mwaishileishiba ukuti umuntu mwapanga nankwe icibusa pa Intaneti ni ulya uulungana na bana? Ukumfwana ne fibanda kwalicilanapo ukubipa. Mulingile ukwesha na maka yonse ukuleka ukumfwana ne fibanda. Kuti mwacita shani?

Ilyo abena Efese basambilile ifyo Amalembo yalanda pa kupupa imipashi, bamo balyocele amabuuku yabo umwalembelwe ifya mipashi, nangu ca kutila yali aya mutengo sana. ‘Baliyocele pa menso ya bonse.’ (Imilimo 19:19, 20) Muno nshiku, te fitabo fye, impinga, ifipampa fya kubukilako ne fyapalako, ifyo abomfwana ne mipashi babomfya, lelo kwaliba na fimbi ifyapala Intaneti, ama DVD e lyo na fimbipo. Talukeni kuli fyonse ifingalenga mwatendeka ukupupa imipashi.

Ibukisheni ba Joachim na ba Barbara abo tulandilepo pa ntendekelo ya cino cipande. Ifikope fyali pa makardi ya tarot fyabalangile ukuti pa ng’anda yabo pali no kwisa abantu ababipa no kuti tabalingile ukukutika nangu ukupoka icili conse kuli bena. Lelo, ilyo ba Nte babili, ba Connie na ba Gudrun baile pa ng’anda yabo no kubeba ukuti balefwaya ukubashimikila imbila nsuma ya kwa Lesa, ba Joachim na ba Barbara basalilepo ukukutika kuli bena. Ilyo balelanshanya, basukile batendeka ukulanda pa fya mipashi, kabili ba Connie na ba Gudrun balilondolwele bwino bwino ukubomfya Baibolo. Ba Joachim na ba Barbara balitendeke ukulasambilila Baibolo lyonse.

Tapakokwele ba Joachim na ba Barbara bapingwilepo ukuleka ukumfwana ne fibanda. Ba Nte babebele ukuti ifibanda tafyakatemwe ifi baleka ukumfwana na fyo. Kabili ifi fine e fyo cali, ba Joachim na ba Barbara baliculile nga nshi pantu ifibanda fyalebacusha sana. Lyonse ubushiku baleumfwa umwenso ukufikila ilyo bakuukiile mu ng’anda imbi. Pa nshita yonse ifibanda fyalebacusha, amashiwi yaba pa Abena Filipi 4:13 yalebakosha, patila: “Muli fyonse ndi na maka pantu kuli uulenkosha.” Yehova alibapaalile pa fyo bakoselepo kabili ifibanda fyasukile fyaleka ukubacusha. Ino nshita ba Joachim na ba Barbara baliba ne nsansa kabili bapepa Lesa wa cine, Yehova.

Baibolo ikoselesha bonse abafwaya Yehova ukubapaala, ukuti: “Nakileni Lesa; lelo kaaneni Satana Kaseebanya, na o akafulumuka kuli imwe. Palameni kuli Lesa, na o akapalama kuli imwe.” (Yakobo 4:7, 8) Nga mulefwaya ifibanda ukuleka ukumucusha, Yehova Lesa kuti amwafwa. Ba Joachim na ba Barbara nga baibukisha ifyo balubuka ku kupupa imipashi, balasumina ukufuma pa nshi ya mitima yabo ukuti amashiwi yaba pa Amalumbo 121:2 ya cine, ayatila: “Ukungafwa kufuma kuli Yehova.”

[Amafutunoti]

[Amashiwi pe bula 21]

Ukupupa imipashi kulalenga abantu ukukanaba ifibusa fya kwa Lesa

[Amashiwi pe bula 22]

“Palameni kuli Lesa, na o akapalama kuli imwe.”—YAKOBO 4:7, 8