“Ifya Kale Fikalabwa”
Palameni Kuli Lesa
“Ifya Kale Fikalabwa”
NGA twaibukisha utushita utusuma ilyo twali pamo na bantu twatemwa tulasansamuka sana. Lelo nga twaibukisha ifintu ifyabipa ifyatucitikile, tulomfwa ububi icine cine. Nga ca kutila mulomfwa ububi nga mwaibukisha ifyabipa ifyamucitikile kale, nalimo kuti mwatontonkanya amuti, ‘Bushe nkatala nkalabeko kuli ifi fintu?’ Icasuko icingatusansamusha caba mu mashiwi yalembele kasesema Esaya.—Belengeni Esaya 65:17.
Yehova afwaya ukufumyapo ifilenga ukuti ifyabipa filecitika. Akacita shani? Akafumyapo ici calo cabipa no kupyanikapo icalo icisuma nga nshi. Ukupitila muli Esaya, Yehova alaya ukuti: “Ndepanga imyulu ipya ne sonde lipya.” Ukwishiba ubu bulayo kuti kwalenga twaba ne subilo.
Bushe imyulu ipya cinshi? Baibolo ilanda pa fintu fibili ifingatwafwa ukwishiba imyulu ipya. Ica kubalilapo, bakalemba bambi babili aba Baibolo balilandapo pa myulu ipya, kabili bonse babili babomfeshe ishiwi lya kuti imyulu ipya pa kulanda pa kwaluka kukalamba ukukacitika pano isonde. (2 Petro 3:13; Ukusokolola 21:1-4) Ica bubili, muli Baibolo ishiwi lya kuti “imyulu” kuti lyapilibula imitekele, nelyo ubuteko. (Esaya 14:4, 12; Daniele 4:25, 26) Kanshi imyulu ipya, buteko ubupya ubukalenga ifintu pe sonde ukulungama. Kwaba fye ubuteko bumo ubukacita ifi, no bu, Bufumu bwa kwa Lesa, ubuteko bwa ku muulu ubo Yesu atusambilishe ukulapepela. Ubu Bufumu bukalenga ukufwaya kwa kwa Lesa ukwalungama ukucitika pano isonde ponse.—Mateo 6:9, 10.
Bushe isonde lipya cinshi? Natulande pa fishinka fibili ifya mu Baibolo ifyalatwafwa ukwishiba isonde lipya. Ica kubalilapo, muli Baibolo ishiwi lya kuti “isonde” limo lilosha ku bantu, te sonde twaikalapo. (Amalumbo 96:1) Ica bubili, Baibolo yasobela ukuti ilyo Lesa akalateka, abantunse aba cishinka bakasambilila ubulungami, ubukaba pe sonde lyonse fye. (Esaya 26:9) Kanshi isonde lipya lilosha ku bantu abakalanakila ukuteka kwa kwa Lesa no kulakonka amafunde yakwe ayalungama.
Bushe mwamona ifyo Yehova akacita pa kufumyapo ifilenga ukuti ifyabipa filecitika? Nomba line Yehova ali no kufikilisha ubulayo bwakwe ubwa kuleta imyulu ipya ne sonde lipya, ilyo akaleta isonde lipya umukaba ubulungami. * Mu calo cipya, tamwakabe ifintu ifitulenga ukulaumfwa ububi nga twafitontonkanyapo, pamo nga ukulwala, ukucula na matontonkanyo, na fimbipo. Abantunse aba cishinka bakaipakisha ubumi, kabili lyonse bakalaibukisha fye ifintu ifisuma.
Nomba cikaba shani ku fintu ifitusakamika pali ino nshita? Ukupitila muli Esaya, Yehova atwalilila ukutulaya ukuti: “Ifya kale fikalabwa, kabili tafyakese na mu mutima.” Mu kuya kwa nshita, fyonse ifitusakamika muli cino calo tukafilabako. Bushe na imwe kuti mwatemwa ukuba muli ici calo? Nga kuti mwatemwa, kuti cawama nga mwasambilile ifyo mwingapalama kuli Lesa uwatulaya ifi fintu!
Amalembo ya Kubelenga mu March:
[Futunoti]
^ para. 7 Nga mulefwaya ukwishibilapo na fimbi pa Bufumu bwa kwa Lesa ne fyo buli no kucita nomba line, belengeni ifipandwa 3, 8, na 9 mu citabo citila Bushe Cinshi Baibolo Isambilisha? Abalemba ici citabo ni Nte sha kwa Yehova.
[Amashiwi pe bula 19]
Yehova afwaya ukufumyapo ifilenga ukuti ifyabipa filecitika
