Baibolo Ilaalula Abantu

CINSHI calengele umwaume uwapondokele imipepele iyo abafyashi bakwe bamukushishemo ukuti atendeke ukupepa na kabili? Cali shani pa kuti umwaume umo asange umufyashi umusuma uo alefwaisha mu bumi bwakwe bonse? Belengeni ifyo abene bashimika.

“Nalingile Ukubwelela Kuli Yehova.”—ELIE KHALIL

UMWAKA BAFYELWE: 1976

ICALO: CYPRUS

IFYO BALI: UMWANA WALUBILE

INKULILO YANDI: Nafyalilwe mu Cyprus lelo nakuliile ku Australia. Abafyashi bandi ni Nte sha kwa Yehova, kabili balyeseshe na maka ukunsambilisha ukutemwa Yehova ne Cebo cakwe Baibolo. Lelo ilyo naishileba umulumendo, naishilesanguka cintomfwa. Ubushiku, nalefyuka no kuya mu kwangala na banandi abalumendo na bakashana. Twaleiba imyotoka kabili twalekwata amafya ayengi pa mulandu na bucintomfwa.

Pa kubala, nalecita ifi fintu mu bumfisolo pantu nshalefwaya ukufulwisha abafyashi bandi. Lelo mu kuya kwa nshita nalilekele ukusakamana icili conse. Natendeke ukwangala na bantu abakalamba sana pali ine abashatemenwe Yehova kabili balengele ukuti imbe fye icibebebe. Nasukile naeba abafyashi bandi ukuti nshalefwaya ukulaya nabo mu kupepa. Abafyashi bandi balyeseshe na maka ukungafwa lelo nalikaninine fye. Ici calibaputwile umusana.

Ilyo nafumine pa ng’anda natendeke ukubomfya imiti ikola, kabili nalelima no kushitisha sana ibange. Natendeke ukucita ubulalelale kabili nalepoosa inshita iikalamba ku kwangala mu fikuulwa fya bwalwa. Na kabili natendeke ukufulwa bwangu. Nga ca kuti umo alanda fimo nelyo ukucita ifyo nshitemenwe, nalefulwa sana kabili ilingi nalepaatila abantu nelyo ukubapuma. Na kuba, nalecita filya fine ifyo bamfundile ukuti nshifwile ukucita ngo Mwina Kristu.

IFYO BAIBOLO YA-ALWILE UBUMI BWANDI: Naishiletemwana no mulumendo umo uwalebomfya imiti iikola uo bawishi bafwile ninshi ali fye umwaice. Twalelanda amalyashi ica kuti twalelaala ubushiku sana. Limo nga tuleshimika ubushiku, alenjeba ifyo alefuluka sana bawishi. Apo ukufuma fye ku bwaice nalishibe ukuti abafwa bakabuuka, natendeke ukumushimikilako pa fyo Yesu abuushishe abafwa ne fyo alaile ukuti ku ntanshi akesabuusha abafwa na kabili. (Yohane 5:28, 29) Nalemweba ukuti: “Elenganya ifyo cikawama ilyo ukamona bawiso na kabili. Bonse fye kuti twaba ne shuko lya kwisaikala mu Paradaise pano isonde.” Aya mashiwi yalimufikile sana pa mutima.

 Limo umunandi alenjipusha ifipusho pa nshiku sha kulekelesha nangu pa fyo abantu basumina ukuti muli Lesa umo mwaba batatu. Nalebomfya Baibolo yakwe no kumulanga amalembo ayalanda icine pali Yehova Lesa, pali Yesu e lyo na pa nshiku sha kulekelesha. (Yohane 14:28; 2 Timote 3:1-5) Icalecitika ca kuti nga nashimikilako umunandi pa fya kwa Lesa e lyo naletontonkanya sana pali Yehova.

Panono panono, icine ca mu Baibolo ico abafyashi bandi bamfundile calitendeke ukukula na kabili. Ku ca kumwenako, limo nga ndi na banandi ku parte tulebomfya ne miti ikola, naletampa ukutontonkanya pali Yehova. Abanandi abengi balelanda ukuti balitemwa Lesa, lelo ifyo balecita fyalelanga ukuti tabamutemenwe. Nshalefwaya ukuba nga bena, e ico nalilwike ico nalingile ukucita. Nalingile ukubwelela kuli Yehova.

Kwena calyanguka ukwishiba ifyo umuntu alingile ukucita, nomba pa kucita ifyo fine e paba akantu. Tacayafishe ukuleka ifintu fimo. Nalilekele ukubomfya imiti ikola, ukwangala na banandi ababipa, kabili natendeke ukusambilila Baibolo na eluda Nte.

Lelo calyafishe ukuleka ifintu fimbi pamo nga, ukufulwa bwangu. Limo nale-eshako ukukanafulwa bwangu, lelo limbi nalefilwa ukuilama. Naleumfwa sana ububi ica musango yu nga cacitika, nalemona kwati te kuti njaluke. Nalifuupwilwe sana, e ico nalandile na eluda uwalensambilisha Baibolo. Uyu eluda ali wa cikuuku kabili uwatekanya, alenkoselesha nga nshi. Bushiku bumo anjebele ukubelenga icipande cimo ica mu Ulupungu lwa kwa Kalinda icalelanda pa fyo cacindama ukukananenuka. * Twalanshenye pa fyo nalingile ukulacita nga ca kuti nafulwa. Panono panono, nalilekele ukufulwa bwangu, ne cangafwile ca kuti nalekonka ifyo ici cipande calandile kabili nalepepa sana kuli Yehova. Awe nasukile nabatishiwa mu April 2000 no kuba Inte ya kwa Yehova. Ala abafyashi bandi balitemenwe icine cine.

IFYO NANONKELAMO: Ino nshita nshicula na matontonkanyo, naliba na kampingu yasanguluka pantu nalishiba ukuti nshikowesha umubili wandi ku miti ikola nelyo ku bulalelale. Pali ino nshita, ndasanga insansa muli fyonse ifyo ncita, nampo nga ndebomba, ndi ku kulongana, nelyo ndeangala. Ino nshita nalishiba ifyacindama sana mu bumi.

Ndatasha sana Yehova pa kumpeela abafyashi abashalekele ukunkoselesha. Na kabili ndatontonkanya pa mashiwi Yesu alandile pali Yohane 6:44 ukuti: “Takuli uwingesa kuli ine kano Tata uwantumine, amukula.” Nalitemwa nga nshi ukwishiba ukuti ico nabwelela kuli Yehova ni co umwine alinkula na kabili.

 “Nalefwaisha Ukukwata Batata aba Kunsakamana.”—MARCO ANTONIO ALVAREZ SOTO

UMWAKA BAFYELWE: 1977

ICALO: CHILE

IFYO BALI: BALELISHA INYIMBO SHA CONGO ISHA BACINTOMFWA

INKULILO YANDI: Bamayo e bankushishe, twaleikala mu musumba uusuma uwa Punta Arenas, uwabela ku kapinda ka ku kulyo aka South America. Abafyashi bandi bapaatukene ilyo nali ne myaka 5, ici calengele ndemona ukuti batata balindekeleshe. Nalefwaisha ukukwata batata aba kunsakamana.

Bamayo balesambilila Baibolo ne Nte sha kwa Yehova, kabili balensenda ku kulongana ku Ng’anda ya Bufumu. Lelo nshatemenwe ukulongana, ilingi nga tuleya mu kulongana nalefulwa sana ica kuti limo nalelila no kulila. Ilyo nali ne myaka 13, nalilekele ukulongana.

Pali iyi nshita natendeke ukutemwa inyimbo, kabili naishileiluka ukuti nalikwete ica bupe ca kulisha ifilimba no kwimba. Ilyo nali ne myaka 15, natendeke ukulisha inyimbo sha congo isha bacintomfwa mu fikuulwa fya bwalwa, pa mitebeto, na ku maparte. Ukwangala na baishibishe ukwimba no kulisha ifilimba kwalengele ukuti ntemwe sana inyimbo ishalumbuka. Natendeke ukusambilila ifya kulisha no kwimba inyimbo pe sukulu lyali mwi tauni naleikala. Ilyo nali ne myaka 20, nakuukile ku musumba ukalamba uwa Santiago, ku kulundapo amasambililo. Na kabili nalitwalilile ukuba mwi bumba lya balelisha inyimbo sha congo isha bacintomfwa.

Lelo inshita yonse iyi nshali ne nsansa. E ico natendeke ukunwesha ubwalwa no kubomfya imiti ikola na banandi abo twalelisha nabo ifilimba. Nshaleumfwa, kabili ifyo nalemoneka e fyalelanga ukuti nali cintomfwa. Nalefwala ifya kufwala ifyafiita, naleteeka imyefu, kabili nali ne cunsu ica kuti ni cikanga umushishi ufike na mu musana.

Imisango nakwete yalengele ukuti ndelwa sana ulubuli kabili ilingi balenjikata kuli bakapokola. Bushiku bumo ilyo nakolelwe, nasanshile abaume batatu abaleshitisha imiti ikola abalencusha kabili abalecusha na banandi. Balingumine icabipisha ica kuti balincenene ku mubango wa kanwa.

Lelo icankalipe sana cintu abanandi bacitile. Bushiku bumo naishileishiba ukuti umukashana nale-enda nankwe aleyangala no munandi pa myaka iingi, kabili abanandi bonse balishibe nomba tabanjebeleko. Ala calimponeshe pa musao.

Nalibwelelemo ku Punta Arenas, kabili natendeke ukusambilisha abantu ifya kulisha inyimbo kabili nalebomba no mulimo wa kulisha icilimba ca nsale ico beta ukuti cello. Nalitwalilile ukulisha no kukopa inyimbo sha congo isha bacintomfwa. Naishibene na Sussan, umukashana uwayemba kabili twatendeke ukwikala pamo. Ilyo papitile inshita, Sussan aishileishiba ukuti banyina basumine ukuti muli Lesa umo mwaba batatu, lelo ine nasumine ukuti kwaba fye Lesa umo. Anjipwishe ukuti: “Nomba ninshi icishinka ni cili kwi?” Namwaswike ati nalishiba ukutila icisambilisho ca kuti muli Lesa umo mwaba batatu ca bufi, nomba nshaishibe fye amalembo ya kumubelengela. Lelo nalishibe abengamulondolwela. Namwebele ukuti Inte sha kwa Yehova kuti bamulanga icine ca mu Baibolo. Lyena nalipepele kuli Lesa ukuti angafwe, icintu ico nshabalile ncita pa myaka iingi.

Ilyo papitile fye inshiku ishinono, namwene umwaume umo uwalemoneka kwati nalimwishiba, kabili nalimwipwishe nga ca kuti ali ni Nte ya kwa Yehova. Nangu ca kutila alyumfwile umwenso pa mulandu ne fyo nalemoneka, alinjaswike amepusho namwipwishe pa fyo programu ya kulongana pa Ng’anda ya Bufumu yali. Ici cacitike calengele  nshininkishe ukuti Yehova alyaswike ipepo lyandi. Naliile ku kulongana ku Ng’anda ya Bufumu kabili naikalile ku fipuna fya ku numa pantu nshalefwaya umuntu nangu umo ukumona. Lelo abengi abalemona ilyo naleisa mu kulongana ninshi ndi fye umwaice balinjishibe. Balinsengele bwino kabili balinkumbatile ica kuti nalitemenwe nga nshi. Cali kwati nabwelela pa ng’anda ya bafyashi bandi. Ilyo namwene abalensambilisha Baibolo ilyo nali umwaice, nalibebele ukuti batampe ukunsambilisha na kabili.

IFYO BAIBOLO YA-ALWILE UBUMI BWANDI: Bushiku bumo, nabelengele Amapinda 27:11 ayatila: “We mwana wandi, ube na mano, kabili ulenge umutima wandi ukusekelela.” Nalitemenwe nga nshi ukwishiba ukuti umuntunse kuti alenga Kabumba wa muulu ne sonde ukusekelela. Naishileiluka ukuti Yehova e Tata uo nalefwaisha mu bumi bwandi!

Nalefwaya ukulasekesha Tata wa ku muulu no kulacita ifyo afwaya, lelo nalikunkwime ku miti ikola na ku bwalwa pa myaka iingi. Naishileumfwikisha amashiwi Yesu alandile ayaba pali Mateo 6:24, ayatila, “takuli uwingabombela bashikulu babili.” Ilyo nale-esha ukuleka ukucita ifyabipa, natontonkenye pa mashiwi yalembwa pali 1 Abena Korinti 15:33 apatila: “Mwilufiwa. Ukwampana pamo na babi kulonaula imibele isuma.” Nailwike ukuti te kuti ndeke imisango yabipa nga natwalilile ukwangala na banandi ababipa no kulaya ku fikuulwa ifyo natemenwe ukuyako. Ukufunda kwa mu Baibolo kwali fye ukwaololoka: Nalingile ukucitapo cimo pa kuti ndeke ukucita ifintu ifyalenenga ukulufyanya.—Mateo 5:30.

Ukuleka ukulisha inyimbo sha congo isha bacintomfwa kwalinkosele nga nshi pantu nalitemenwe sana ishi nyimbo. Lelo ifibusa fya mu cilonganino fyalingafwile kabili nasukile naleka. Nalilekele ukunwesha ubwalwa no kubomfya imiti ikola. Na kabili, nalibeyele umushishi ne myefu kabili nalilekele no kufwala ifya kufwala fyafiita. Ilyo naebele Sussan ukuti ndefwaya ukubeya umushishi, alipapile nga nshi ica kuti alefwaya ukwishiba ifyo naleya mu kucita ku Ng’anda ya Bufumu. Anjebele ati: “Ndekonka ku Ng’anda ya Bufumu njemona ifyabako!” Alitemenwe ifyo amwene kabili tapakokwele na o alitendeke ukusambilila Baibolo. Mu kuya kwa nshita, twasukile twaupana na Sussan ukulingana ne funde. Mu 2008, twalibatishiwe no kuba Inte sha kwa Yehova. Twalitemwa nga nshi ifi nomba tubombela Yehova pamo na bamayo.

IFYO NANONKELAMO: Nalileka ukucita ifintu fya mu calo ifishileta insansa sha cine cine kabili nshangala ne fibusa ifya bufi. Na ino ine nshita nalitemwa inyimbo, lelo te shonse nkutikako no kwimba. Ndalanda pa fyo napitamo ilyo ndefunda aba mu lupwa lwandi na bantu bambi, maka maka abalumendo na bakashana. Mfwaya ukubafwa ukwishiba ukuti ifingi ifyaba muli cino calo fimoneka kwati fisuma, lelo pa numa fisa mu kuba “fisooso fye.”—Abena Filipi 3:8.

Nalisanga ifibusa fya cine cine mu cilonganino ca Bena Kristu, umwaba abantu ababa no kutemwa no mutende. Ne cikalamba ca kutila, ifi napalama kuli Yehova, nalisuka nasanga Umufyashi wandi.

[Futunoti]

[Amashiwi pe bula 13]

‘Nalibwelela kuli Yehova pantu umwine alinkula na kabili’