Ababelenga Ino Magazini Balepusha Ukuti . . .

Bushe Nani Watumine “Ulutanda”?

▪ Bushe mwalimonapo ifikope ifyo balenga nelyo ifyangalo umo balanga imfumu shitatu nelyo aba mano abaile mu kumona Yesu ilyo afyelwe ninshi nalaala mu ca kuliilamo ifitekwa? Muli ili lyashi, abantu batila Lesa abomfeshe ulutanda ukutungulula aba bantu kwi cinka mu Betelehemu. Abana bamo balisungila na mashina ya ishi shamfumu shitatu, ukuti ni Melchior, Caspar na Baltazar. Lelo bushe ifyo abantu abengi baishiba pali ili lyashi filomfwana ne fyo Baibolo ilanda? Awe. Ifingi ifyo balanda te fya cine.

Ica kubalilapo fye, bushe aba baume bali ni bani? Mu lulimi lwa ciGriki umo Baibolo yalembelwe, tabalanda ukuti balya bantu baali ni mfumu nelyo ukuti baali baume ba mano. Baali ni ba Magi nelyo abalebukila ku ntanda. Ukwabula no kutwishika, aba bantu bali basenshi abalebukila ku ntanda. Baibolo tayalanda amashina yabo nelyo impendwa yabo.

Ica bubili ca kutila, ni lilali baile mu kumona Yesu? Tabaile mu kumumona ilyo ali akanya ninshi ali mu ca kuliilamo ifitekwa. Twaishiba shani? Mateo uwalembeleko amabuuku ya Mbila Nsuma atile: “Ilyo baingile mu ng’anda, bamwene umwana na Maria nyina.” (Mateo 2:11) Nga mwamona, ili ilembo lyalanda ukuti ilyo ba Magi baile mu kumona Yesu, tali akanya, alikulileko. Pali iyi nshita, Yosefe na Maria tabaleikala mwi cinka; lelo baleikala mu ng’anda.

Ica butatu ca kutila, nani watumine lulya “lutanda” ulwatungulwile abalebukila ku ntanda? Bashimapepo basambilisha ukuti ni Lesa e walutumine. Lelo bushe ca cine e walutumine? Mwilaba ukuti “ulutanda” talwabalilepo ukutungulula ba magi ku Betelehemu. Lelo lwabatungulwile ku Mfumu Herode mu Yerusalemu. Balyebele imfumu ya bufuba kabili iyaleipaya abantu ukwali Yesu no kuyeba ukuti uyu mwana ali no kwisaba “imfumu ya baYuda.” Ici calengele ukuti Herode apate sana uyu mwana. (Mateo 2:2) Herode abomfeshe ubucenjeshi, aebele abalebukila ku ntanda ukuti bakese mweba bwino bwino ukwali uyu mwana pa kuti na o akayemufukamina. Lyena “ulutanda” lwatungulwile ababukila ku ntanda kuli Yosefe na Maria. Kanshi ifyo ababukila ku ntanda bacitile nga fyalengele ukuti bepaishe Yesu Lesa akanamucingilila. Ilyo ababukila ku ntanda bakeene ukubwelela kuli Herode ku kumweba ukwali uyu mwana, Herode alifulilwe sana ica kuti afumishe icipope ca kutila abana bonse abaume abali ne myaka ibili no kucepako mu Betelehemu na mu ncende shali mupepi babepaye.—Mateo 2:16.

Pa numa, Yehova alandile pali Yesu ukuti, “Umwana wandi, uwatemwikwa, uo nsekelamo.” (Mateo 3:17) Taleni tontonkanyeni: Bushe Lesa uwaba no kutemwa, Shifwe uwalungama, kuti abomfya ababukila ku ntanda kabili abomfwana ne mipashi ukuba intumi shakwe libe ninshi Amafunde yakwe yalikaanya ukucita ifya musango yu? (Amalango 18:10) Bushe kuti abomfya ulutanda ku kubatungulula kuli Herode umuntu umubi kabili kepaya no kumweba amashiwi aya kulenga ulupato lwakwe no bufuba ukukulilako? Bushe Lesa kuti abomfya ulutanda lumo lwine na babukila ku ntanda ku kubalanga ukwali umwana wakwe?

Natulangilile: Tutile umukalamba wa bashilika atuma umushilika wakwe uwacenjela ukuya ku kubomba umulimo umo mu calo ca balwani. Bushe kuti asokolwela abalwani ukuli umushilika wakwe? Awe nakalya! E fyo na Yehova acitile, atumine Umwana wakwe muli cino calo icabipa. Bushe mulemona ukuti Lesa ena nga alisokolwelele Herode Imfumu yabipa ukwali Umwana wakwe uushali na maka ya kuicingilila? Nakalya!

Nomba ninshi nani watumine lulya “lutanda”? Tontonkanyeni: Bushe nani walefwaisha ukuti Yesu bamwipaye, pa kuti ekula no kubomba umulimo aishile pano calo? Nani afwaya sana ukulufya abantu kabili uulenga ukuti balebepa, ukwipayana, no kulacita ulukaakala? Ni Satana Kaseebanya. Yesu umwine amulondolwele ukuti, “wa bufi kabili e wishi wa bufi,” amwitile no kuti ni ‘kepaya wa bantu ukufuma pa kutendeka.’—Yohane 8:44.