Palameni Kuli Lesa

“Lekeni Tubwelele Kuli Imwe”

Bushe kale mwalebombela Yehova? Bushe mulatontonkanya pa kutampa ukumubombela na kabili lelo mulatwishika nga ca kutila kuti amupokelela? Mukwai belengeni cino cipande ne cikonkelepo. Ni mwe maka maka balembeele ifi fipande.

UMWANAKASHI umo uwalekele ukubombela Lesa atile: “Nalipepele kuli Yehova ukuti ndefwaya ukubwelela kuli ena no kuti anjelele pa fyo namukalifya.” Bushe aya mashiwi yamulenga ukumfwila uyu mwanakashi uluse? Bushe mulatontonkanyapo ukuti: ‘Bushe Lesa omfwa shani pa bantu abaleka ukumubombela? Bushe alibalabako? Bushe alafwaya ukuti “babwelele kuli ena”?’ Pa kwasuka aya mepusho, lekeni tulande pa mashiwi Yeremia alembele. Ukwabula no kutwishika, ukwishiba amasuko kuli aya mepusho kwalamusansamusha.—Belengeni Yeremia 31:18-20.

Umfweni ifyo cali ilyo Yeremia alembele aya mashiwi. Imyaka iingi ninshi Yeremia talabako, Yehova alekele ubufumu bwa mikowa 10 ubwa kwa Israele ukusendwa muli bunkole ku bena Asiria mu 740 B.C.E. * Lesa alekele ukuti abena Israele babasende muli bunkole pantu alefwaya ukubasalapula pa fyo balebembuka no kusuula ukusoka uko bakasesema balebasoka lyonse. (2 Ishamfumu 17:5-18) Bushe abantu balilapile pa mulandu na mafya bakwete ilyo babasendele muli bunkole ku calo ca kutali no kuleka ukupepa Lesa wabo? Bushe Yehova alibalabileko? Bushe ali no kubaleka ukuti babwelele kuli ena?

“Nalilangulwike”

Ilyo bali muli bunkole, abantu balikutulwike ukuti ifyo bacitile fyalibipile kabili balilapiile, na Yehova alimwene ukuti balilapiile icine cine. Umfweni ifyo Yehova alondolwele ifyo abena Israele, abo baleita no kuti Efraimu, abali muli bunkole baleumfwa ne fyo bacitile.

Yehova atile: “Ning’umfwa Efraimu aleililila ubulanda.” (Icikomo 18) Alyumfwile ilyo abena Israele baleilishanya pa fyafumine mu kubembuka kwabo. Umuntu umo uwasoma atile, amashiwi ya kuti “aleililila ubulanda,” kuti yapilibula “ukukunta umutwe pa mulandu wa bulanda.” Abena Israele bali kwati mwana cintomfwa uulekunta umutwe ilyo aletontonkanya pa mafya ailetelele kabili alefuluka ifyo aleikala bwino pa bafyashi bakwe ilyo ashilapondoka. (Luka 15:11-17) Finshi abena Israele balelanda?

“Namunsalapula, . . . ngo mwana wa ng’ombe uo bashasambilisha.” (Icikomo 18) Abena Israele balimwene ukuti balilingile ukusalapulwa. Pantu na kuba bali kwati mwana wa ng’ombe uo bashasambilisha. Icitabo cimo catila, iyi nsosele ipilibula ukuti bali kwati kana ka ng’ombe “akashailasapo ku ca kusonkwelako pa mulandu wa kuti takatala akatalamapo ilyo bakakulikile kwi koli.”

“Nengeni ukupilibuka, na ine nkabwela, pantu ni mwe Yehova Lesa wandi.” (Icikomo 18) Bali-icefeshe  kabili baliliile kuli Lesa. Balebembukila Lesa, lelo nomba balemupapata ukuti babwelele kuli ena. Muli Baibolo ya Contemporary English Version bapilibula ici icikomo ukuti: “Ni mwe Lesa wesu, lekeni tubwelele kuli imwe.”

“Nalilangulwike. . . . Nalyumfwile insoni no kuseebana.” (Icikomo 19) Abantu balyumfwile ububi pantu balibembwike. Balisumine ukuti balibembwike kabili e mulandu baleculila. Balyumfwile sana insoni no kuseebana, kabili cali kwati baleyuma pa cifuba.—Luka 15:18, 19, 21.

Abena Israele balilapiile. Bali sana no bulanda, baliyebelele imembu shabo kuli Lesa, kabili balilekele ukucita ifyabipa. Bushe Lesa aali no kubabelela uluse? Bushe aali no kubapokelela?

“Kabili Nkamubelela Uluse”

Yehova alitemenwe sana abena Israele. Atile: “Nimba Wishi wa kwa Israele; kabili Efraimu e beli lyandi.” (Yeremia 31:9) Ukwabula no kutwishika, wishi uwaba no kutemwa te kuti akane ukupokelela umwana wakwe uwalapila ukufuma pa nshi ya mutima! Umfweni ifyo Yehova alangile ukuti ali ni Wishi uwatemenwe abantu bakwe.

“Bushe Efraimu mwana uwatemwikwa kuli ine? Bushe mwana uo natemwisha? Pantu filya fine namukalipile, no kumwibukisha e fyo nkamwibukisha.” (Icikomo 20) Ala mwandini aya mashiwi yasuma icine cine! Nga filya fine umufyashi uwaba ne funde kabili uwatemwa abana bakwe acita, e fyo na Lesa ‘alekalipila’ abana bakwe, e kutila alebasoka lyonse pa fyabipa ifyo balecita. Ilyo bakaninine fye ukumfwa, abalekele ukuti babasende muli bunkole, ne ci calengele ukuti baitalushe kuli ena. Nangu ca kutila alibalekele ukuti baye muli bunkole pa kuti abasalapule, tabalabileko nakalya. Wishi uwaba no kutemwa talaba abana bakwe. Inga Yehova ena aumfwile shani ilyo amwene ukuti abana bakwe nabalapila mu cine cine?

“E mulandu wine umutima wandi ulemufulukila. Kabili nkamubelela uluse.” (Icikomo 20) Yehova alefuluka sana abana bakwe. Pa mulandu wa kuti balilapiile icine cine, Lesa alibabelele uluse kabili alefwaisha ukuti babwelele kuli ena. Nga filya fyacitile wishi wa mu cilangililo ca mwana walubile ico Yesu alandile, Yehova ‘alyumfwile uluse’ kabili alefwaya abana bakwe ukubwelela kuli ena.—Luka 15:20.

“Nalitemwa Icine Cine ifi Yehova Ampokelela!”

Amashiwi yaba pali Yeremia 31:18-20 yalatulenga ukwishiba ifyo Yehova akwatisha inkumbu no luse. Lesa talaba abantu abaleka ukumubombela. Bushe aba musango yu nga balefwaya ukubwelela kuli Lesa kuti abapokelela na kabili? Lesa ‘ali-iteyanya ukwelela.’ (Amalumbo 86:5) Yehova te kuti akaane abantu abalapila ukufuma pa nshi ya mutima. (Amalumbo 51:17) Alafwaya nga nshi ukubapokelela.—Luka 15:22-24.

Umwanakashi uo twacilandapo pa kubala, apingwilepo ukubwelela kuli Yehova kabili aile ku Ng’anda ya Bufumu iya Nte sha kwa Yehova. Intanshi alilwishishe pa kuti aleke ukulatontonkanya ukuti Yehova te kuti amwelele. Atile: “Naleimona ukuti ndi mubi icine cine.” Lelo baeluda balimukoseleshe kabili balimwafwile ukutendeka ukubombela Lesa na kabili. Alitashishe nga nshi ukufuma pa nshi ya mutima kabili atile, “Nalitemwa icine cine ifi Yehova ampokelela mu cilonganino na kabili!”

Nga ca kutila mwalileka ukubombela Yehova kabili muletontonkanya ukutendeka ukumubombela na kabili, tulemukoselesha ukuya ku Ng’anda ya Bufumu iya Nte sha kwa Yehova iyabela mupepi no ko mwikalila. Muleibukisha ukuti Yehova aliba ne nkumbu kabili wa luse ku bantu abalapila abatila kuli ena, “Lekeni tubwelele kuli imwe.”

Amalembo ya kubelenga mu April:

◼ Yeremia 17-31

[Futunoti]