Ukulanshanya Ilyashi lya mu Baibolo—Bushe Yesu ni Lesa?

INTE SHA KWA YEHOVA balatemwa sana ukulanshanya Baibolo na bantu. Bushe kwaliba ilyashi ilyo Baibolo yalandapo ilyo mufwaisha ukwishiba? Bushe mulafwaya ukwishiba ifyo Inte sha kwa Yehova basuminamo nelyo umulandu bashicitilako ifintu fimo? Nga mulafwaya ukwishiba, mukabepushe nga bamutandalila. Bakatemwa sana ukulanshanya na imwe.

Ifi e fyo Inte sha kwa Yehova balanshanya na bantu. Natutile Nte we shina lya kuti Karen aya mu kushimikila pa ng’anda ya mwanakashi we shina lya kuti Samantha.

Bushe ca Cine Tamwasumina Muli Yesu?

Samantha: Ba pasta besu batweba ukuti mwe Nte sha kwa Yehova tamwasumina muli Yesu. Bushe ca cine?

Karen: Ukulanda fye icishinka, twalisumina muli Yesu. Na kuba, twasumina ukuti ukutetekela Yesu kwalicindama pa kuti tukapusuke.

Samantha: Na ine wine e fyo nasumina.

Karen: Kanshi imwe na ine twasumina ukuti ukutetekela Yesu kwalicindama. Nomba nalimo kuti mwatila, ‘Nga ca kutila Inte sha kwa Yehova balisumina muli Yesu, mulandu nshi abantu balandila ukuti tabasumina muli Yesu?’

Samantha: Ico ca cine, na ine ndafwaisha ukwishiba.

Karen: Fingi twingalanda pali ili lyashi ba Samantha, nomba kuti nalanda fye ukuti twalisumina muli Yesu, lelo tatwasumina fyonse ifyo abantu balanda pali ena.

Samantha: Finshi fimo ifyo abantu balanda pali Yesu ifyo mushasumina?

Karen: Abantu bamo basosa ukuti Yesu ali fye muntu umusuma. Lelo te fyo twasumina.

Samantha: Na ine wine te fyo nasumina.

Karen: Kanshi na pa pene twasumina cimo cine. Cimbi ca kutila Inte sha kwa Yehova tabasumina mu fyo abantu basambilisha ifyapusana ne fyo Yesu umwine alandile pali ena na Wishi.

Samantha: Mwalosha mwi?

Karen: Mu macalici ayengi basambilisha ukuti Yesu ni Lesa. Nalimo na imwe bene e fyo mwasambilila.

Samantha: Ca cine, ba pasta besu batusambilisha ukuti Lesa na Yesu balilingana.

Karen: Lelo bushe kuti mwasumina ukutila inshila iisuma iya kwishibilamo icine pali Yesu kumona ifyo umwine alandile?

Samantha: Ee, iyo e nshila iisuma.

Finshi Yesu Alandile?

Karen: Natulande pa cikomo cimo ica mu Baibolo icingatwafwa ukumfwikisha ili lyashi. Moneni amashiwi yaba pali Yohane 6:38. Yesu atile: ‘Nafuma ku muulu te ku kucita ukufwaya kwandi, lelo ni ku kucita ukufwaya kwa wantumine.’ Aya mashiwi alandile kuti yatupelenganya nga ca kutila Yesu ni Lesa.

Samantha: Mwalosha mwi?

Karen: Nga mwamona, Yesu tatile afumine ku muulu ku kwisa mu kucita ukufwaya kwakwe.

 Samantha: Mwalungika, atile aishile mu kucita ukufwaya kwa Wamutumine.

Karen: Nomba bushe Yesu nga ni Lesa, ninshi nani wamutumine ukwisa pano calo? Kabili mulandu nshi asuminine ukulacita ukufwaya kwa Wamutumine?

Samantha: Naumfwako panono ico mulelandapo. Nomba nshilemona ukuti ili ilembo fye limo kuti lyalenga nashininkisha ukuti Yesu te Lesa.

Karen: Umfweni na fimbi ifyo Yesu alandile ifyapalana ne fi twalandapo. Alandile ifi mu cipandwa 7 mwi buuku limo line ilya kwa Yohane. Belengeni Yohane 7:16.

Samantha: “Na o Yesu abaswike ati: ‘Ifyo nsambilisha te fyandi iyo, lelo fya wantumine.’”

Karen: Mwabelenga bwino ba Samantha. Ukulingana na ya mashiwi twabelenga, bushe Yesu alesambilisha ifya mu mutwe wakwe?

Samantha: Awe, atile ifyo alesambilisha fyafumine ku Wamutumine.

Karen: Cishinka. Lelo ici kuti calenga twaipusha ukuti: ‘Nani watumine Yesu? Ni kwi afumishe icine ico alesambilisha?’ Bushe uwamutumine tafwile ukuba umukalamba pali ena? Pantu na kuba, umuntu uutuma umubiye ninshi e mukalamba.

Samantha: Ico ca cine. Nshabelengapo ili lembo.

Karen: Umfweni na ya mashiwi Yesu alandile ayaba pali Yohane 14:28, atile: “Namumfwa ifyo nandile, nati, ndeya kabili nkabwela kuli imwe. Nga mwalintemwa, nga mwasekelela ukuti ndeya kuli Tata, pantu Tata mukalamba pali ine.” Ukulingana ne ci cikomo, bushe kuti mwatila Yesu aleimona ukuti alilingana na Wishi?

Samantha: Kwena, umwine atile Wishi mukalamba pali ena. Ndesubila aleimona ukuti talingene na Lesa.

Karen: Mwalungika. Natulande na pa mashiwi yambi ayo Yesu aebele abasambi bakwe ayalembwa pali Mateo 28:18. Ili lembo litila: “Nabampela amaka yonse mu muulu na pano isonde.” Bushe Yesu alandile ukuti ukufuma na kale alikwete amaka yonse?

Samantha: Awe, atile balimupeele amaka.

Karen: Nomba nga ca kutila Yesu ni Lesa, kuti bamupeela shani amaka na yambi? Kabili ninshi nani wamupeele ayo amaka?

Samantha: Kwena mfwile ukutontonkanyapo pali aya mashiwi.

Alelanda Kuli Bani?

Karen: Kuli icintu cimo icingapapusha sana nga ca kutila Yesu ni Lesa.

Samanta: Cinshi ico cine?

Karen: Cintu cacitike ilyo Yesu alebatishiwa. Moneni ilyashi lyalembwa pali Luka 3:21, 22. Belengenipo mukwai.

Samanta: “Nomba ilyo abantu bonse babatishiwe, Yesu na o alibatishiwe. Kabili ilyo alepepa, umuulu waliswike no mupashi wa mushilo uwalemoneka kwati ni nkunda waikile pali ena, ne shiwi lyafumine mu muulu aliti: ‘Uli Mwana wandi uo natemwa; ni we nsekelelamo.’”

Karen: Bushe namumona ico Yesu alecita ilyo alebatishiwa?

Samantha: Alepepa.

Karen: Ca cine. Nomba kuti twaipusha ukuti, ‘Nga ca kutila Yesu ni Lesa, ninshi ni kuli ani alepepa?’

Samantha: Mwaipusha bwino. Nkayaipusha ba pasta.

Karen: Kuli na cimbi ico twingatontonkanyapo. Ilyo Yesu afumine mu menshi, kwali uwalandile ukufuma ku muulu. Bushe mwacumfwa ifyo alandile?

Samantha: Atile Yesu Mwana wakwe, alimutemwa, kabili e o asekelamo.

Karen: Mwa-asuka bwino. Nomba nga ca kuti Yesu ni Lesa, ninshi nani walandile aya mashiwi ukufuma ku muulu?

Samantha: Nshabala ntontonkanyapo pali aya mashiwi.

Mulandu Nshi Aleitila Lesa ati “Tata” E lyo Umwine ati “Umwana”?

Karen: Cimbi ico tulingile ukutontonkanyapo ni ci: Natubelenga ukuti Yesu alelanda  pali Lesa ukuti Tata wa ku muulu. Kabili ilyo Yesu abatishiwe, ishiwi ilyafumine ku muulu lyatile Yesu Mwana wandi. Na kuba, Yesu umwine aleyita ukuti Mwana wa kwa Lesa. Tutile mulefwaya ukunondolwela ukuti abantu babili balilingana, cilangililo nshi mwingabomfya?

Samantha: Kuti nabomfya icilangililo ca bantu babili abafyalwa inda imo.

Karen: Ca cine, nalimo kuti mwalanda na pali bampundu. Lelo Yesu alelanda pali Lesa ukuti Tata, e lyo alelanda na pa mwine ukuti Umwana. Bushe muletontonkanya ukuti cinshi Yesu alefwaya abantu ukwishiba?

Samantha: Nailuka ico mulelandapo. Yesu alelangilila ukuti Lesa mukalamba pali ena no kuti alikwatisha amaka ukumucila.

Karen: Ca cine ico. Tontonkanyeni pali ici: Mwacitontonkanya pa cilangililo icisuma ica bantu abalingana, e kutila abana abafyalwa inda imo nelyo bampundu. Nga ca kutila Yesu, Kasambilisha Mukalamba ali ni Lesa, bushe nga tabomfeshe icilangililo cimo cine nelyo cimbi icilanga ukuti alilingana na Lesa?

Samantha: Kwena nga alibomfeshe.

Karen: Lelo abomfeshe ishiwi lya kuti “Tata” ne lya kuti “Umwana” ku kulondolola ifyo aba na Lesa.

Samantha: Ici cishinka mwalanda cikankaala.

Bushe Abasambi ba Kubalilapo aba kwa Yesu Balandilepo Shani?

Karen: Ilyo nshilaya, kuti natemwa twalanshanya na cimbi pali ili lyashi nga namukwata akashita.

Samantha: Mukwai cili fye bwino.

Karen: Nga ca kutila ca cine Yesu ni Lesa, bushe tamuletontonkanya ukuti abasambi ba kwa Yesu nga balilandilepo?

Samantha: Kwena nga balilandilepo.

Karen: Lelo takwaba apali ponse muli Baibolo apo calembwa ukuti abasambi balesambilisha ukuti Yesu ni Lesa. Umfweni ifyo umutumwa Paulo, umo pa basambi ba kubalilapo aba kwa Yesu alembele. Pa Abena Filipi 2:9 alondolwele ifyo Lesa acitile pa numa ya mfwa no kubuushiwa kwa kwa Yesu, ukuti: “Lesa na o alimusansabike kabili mu cikuuku amupeele ishina ilyacila amashina yonse.” Bushe ukulingana ne ci cikomo, cinshi Lesa acitile kuli Yesu?

Samantha: Alimusansabike.

Karen: Ca cine. Nomba nga ca kuti Yesu alilingene na Lesa ilyo talafwa kabili nga ca kutila ilyo abuushiwe balimusansabike, bushe ici tacingalola mu kuti Yesu alicila Lesa ubukalamba? Lelo bushe kuti kwaba uwingacila Lesa?

Samantha: Kwena e mo cingalola. Nomba takuli uwingacila Lesa ubukalamba.

Karen: Cishinka ico mwalanda. E co ukulingana ne fi fyonse twalandapo, bushe kuti mwatila Baibolo isambilisha ukuti Yesu ni Lesa?

Samantha: Awe, kwena te fyo. Baibolo isambilisha ukuti Yesu Mwana wa kwa Lesa.

Karen: Ca cine. Namwishiba ba Samantha, Inte sha kwa Yehova balicindika sana Yesu. Twasumina ukuti imfwa yakwe nga Mesia e yalenga abantunse bonse aba citetekelo ukuba ne subilo lya kwisapusuka.

Samantha: Na ine wine ifi fine e fyo nasumina.

Karen: Nomba nalimo kuti mwatila, ‘Kuti twalanga shani Yesu ukuti tulatasha pa fyo atufwilile?’ *

Samantha: Na ine apo kwena ndatontonkanyapo.

Karen: Nga kuti mwatemwa, kuti nabwela pa kuti tukeselanshanya ifyo Baibolo ilandapo. Bushe mukabapo uyu mulungu uleisa ino ine nshita?

Samantha: Ee, nkabapo mukansanga.

Karen: Cawama sana, kanshi tukesamonana.

[Futunoti]