Alalambula Bonse Abamubombela
Palameni Kuli Lesa
Alalambula Bonse Abamubombela
BONSE tulatemwa nga ca kuti umuntu atutasha nga twamucitila icisuma nangu twamupeela ubupe, maka maka nga ca kuti uwatutasha muntu uo twatemwa. Ukwabula no kutwishika, Lesa wesu Yehova, e o twatemwa sana ukucila umuntu uuli onse. Bushe alatasha pa fyo twesha na maka ukumubombela? Natulande pa fyo acitile kuli Ebede-meleke, uwabikile ubumi bwakwe mu kapoosa mweo pa kuti apusushe kasesema wa kwa Lesa.—Belengeni Yeremia 38:7-13 na 39:16-18.
Bushe Ebede-meleke ali nani? Afwile ali ni cilolo uwalebomba mwi sano lya Mfumu Sidekia, mu Yuda. * Ebede-meleke aikeleko pa nshita imo ine na Yeremia, uo Lesa atumine ku kuyasoka abaYuda abashali na cishinka pa bonaushi ubwali no kwisa. Nangu ca kutila ilingi alebomba na bacilolo abashaletiina Lesa, ena alemutiina kabili alicindike sana Yeremia. Ebede-meleke uwali ne mibele iisuma alyeshiwe ilyo bacilolo ababipa babepeshe Yeremia ukuti aleimina ubuteko kabili bamupoosele mu cishima ca matipa pa kuti afwe. (Yeremia 38:4-6) Bushe Ebede-meleke acitile shani?
Ebede-meleke alishipile, tatiinine ukukandwa kuli bacilolo. Aile kuli Sidekia no kuyamweba pa fyo bafyengele Yeremia pa kumupoosa mu cishima ca matipa. Aebele imfumu ukuti: “Aba bantu nabalufyanya . . . kuli Yeremia.” Nalimo pa kulanda aya mashiwi, Ebede-meleke afwile alesonta na bacilolo abapoosele Yeremia mu cishima. (Yeremia 38:9) Ifyo Ebede-meleke alefwaya fyalibombele, Sidekia aebele abaume 30 ukuya na Ebede-meleke ku kufumya Yeremia mu cishima.
Ebede-meleke alilangile imibele na imbi iisuma, e kutila icikuuku. Abuulile “insalu shapwa ne nsamu, no kufiishisha kuli Yeremia mu cishima ku ntambo.” Mulandu nshi abuulile insalu ne nsamu? Alefwaya ukuti Yeremia ashibike mu mapa pa kuti intambo tashimucenene ilyo balemufumya mu cishima.—Yeremia 38:11-13.
Yehova alimwene ifyo Ebede-meleke acitile. Bushe alimutashishe pa fyo abombele? Lesa abomfeshe Yeremia ukweba Ebede-meleke ukuti umusumba wa Yuda wali mupepi no konaulwa. Kabili Yehova aebele Ebede-meleke ukuti ali no kumupususha. Atile: “Nkakupokolola . . . Tawakapeelwe mu minwe ya bantu . . . Nkakupususha . . . Tawakafwe ku lupanga iyo . . . Ukapususha umweo obe.” Mulandu nshi Yehova alaile ukuti ali no kupususha Ebede-meleke? Yehova amwebele ukuti: “Pantu walintetekela.” (Yeremia 39:16-18) Yehova alishibe ukuti ico Ebede-meleke acitile ifi, te kufwaya fye ukupususha Yeremia lelo ni co alitetekele na Lesa.
Ili lyashi litusambilisha ukuti Yehova alatasha pa fyo tumubombela. Baibolo itweba ukuti alebukisha umulimo onse uo tumubombela, nangu ucepe shani, cikulu fye ico twaubombela mulandu wa kuti twalimutetekela. (Marko 12:41-44) Bushe teti mutemwe ukupalama kuli Lesa wa musango yu, uutasha? Nga kuti mwatemwa, ninshi mukashininkisha ukuti amashiwi ya mu Baibolo ya cine, ayatila: “Alalambula abamufwaisha.”—AbaHebere 11:6.
Amalembo ya kubelenga mu May:
[Futunoti]
^ para. 4 Ebede-meleke ali ni “mutungwi.” (Yeremia 38:7) Nangu ca kuti ili ishiwi lilosha ku mwaume uo batungula, balelibomfya na kuli bacilolo abalebombela mwi sano lya mfumu.
