Bushe Ifyo Abena Kristu Basambilisha Fikuma Shani Imikalile ya Bantu?

MU FIPANDE fyafumako, natulanda pa milandu iyo Abena Kristu ba cine bashi-itumpila mu fikansa fya calo. Nomba bushe Abena Kristu kuti bacita shani pa kulanga ukuti balafwaya ukuwamya imikalile ya bantu mu ncende bekala? Inshila imo kukonka ifunde lya kwa Yesu ilya kuti: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo, mulebasambilisha ukulakonka fyonse ifyo namwebele.”—Mateo 28:19, 20.

Ukumfwila ifunde lya kwa Yesu ilya ‘kulenga aba nko shonse ukuba abasambi’ kwalyampana sana ne fyo afundile ukuti tufwile ukuba umucele no lubuuto lwa ba muli ici calo. (Mateo 5:13, 14) Fyayampana shani? Kabili bushe uyu mulimo kuti wakuma shani abantu?

Imbila Nsuma Ilacingilila Kabili Ilalenga Abantu Ukwiluka

Umucele ulalenga ifintu ukukanabola. Ifi fine e fyo ne mbila Yesu aebele abasambi bakwe ukulashimikila ku bantu aba nko shonse yaba. Bonse abasumina no kukonka ifyo Yesu asambilisha balaicingilila ku mibele iiseekele muno nshiku, iingabonaula. Baicingilila shani? Balasambilila ifyo bengataluka ku misango iingonaula ubumi bwabo pamo nga ukupeepa fwaka, kabili balasambilila ukuba ne mibele iisuma pamo nga ukutemwa, umutende, ukushishimisha, icikuuku, no busuma. (Abena Galatia 5:22, 23) Iyi mibele ilenga ukuti babe abantu abasuma mu bwikashi. Abena Kristu abebako bambi iyi mbila nsuma balabomba umulimo  uwacindama sana uwa kulenga ifintu ukuwaminako mu ncende bekala.

Inga cilya cilangililo Yesu alandile ica lubuuto? Nga filya fine umweshi ufumya amaka ya lubuuto ku kasuba pa kuti ubalike, na basambi ba kwa Kristu nabo bafumya “ulubuuto” kuli Yehova Lesa pa kuti babalike. Balenga ulubuuto ukubalika ilyo baleshimikila imbila nsuma iilenga abantu ukwishiba Lesa e lyo na pa kulanga imibele iisuma.—1 Petro 2:12.

Yesu na kabili alilondolwele bwino bwino ifyo ukuba umusambi kwa-ampana no kuba ulubuuto lwa bantu bonse ilyo atile: “Abantu tabasanika inyali no kuikupikapo umuseke, lelo baiteka pa ca kutekapo inyali, na yo isanikila bonse abali mu ng’anda. Kanshi na imwe lekeni ulubuuto lwenu lubalikile ku bantu.” Inyali iyo babikile pa ca kutekapo ilamoneka kuli bonse. E fyo caba na ku Bena Kristu ba cine, umulimo babomba uwa kushimikila ne milimo imbi iisuma iyo babomba ifwile ukulamoneka ku bantu. Mulandu nshi? Yesu atile abamona imilimo yabo iisuma, bakacindika Lesa, te Bena Kristu bakacindika iyo.—Mateo 5:14-16.

Bonse fye Balingile Ukulashimikila

Ilyo Yesu alandile ukuti: “Muli lubuuto lwa ba muli ici calo” no kuti “lekeni ulubuuto lwenu lubalikile abantu,” ale-eba abasambi bakwe bonse. Uyu mulimo Yesu apeele abasambi bakwe te kuti ubombwe na bantu abanono ababa mu mipepele iyalekanalekana. Lelo abasumina bonse bafwile ukuba “ulubuuto.” Inte sha kwa Yehova, abali 7 milioni, kabili ababa mu fyalo ukucila pali 235, basumina ukuti ba Nte bonse fye balingile ukulashimikila ku bantu imbila nsuma iyo Kristu afwaya abasambi bakwe ukubila.

Lyashi nshi ilikalamba ilyo Inte sha kwa Yehova bashimikila abantu? Ilyo Yesu apeele abasambi bakwe umulimo wa kushimikila, tabebelepo ukuya mu kubila pa kwalula imitekele nangu ifintu mu calo, nelyo ukuti aba mu macalici na ba mu buteko bafwile ukulabombela pamo. Lelo asobele ukuti: “Ne mbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse.” (Mateo 24:14) E ico, apo Abena Kristu ba cine balomfwila ifunde lya kwa Yesu, balashimikila abantu imbila nsuma iya Bufumu bwa kwa Lesa. Ubufumu bwa kwa Lesa, e buteko fye bweka ubukonaula imitekele yabipa iya kwa Satana no kuleta icalo cipya icalungama.

Na kuba, nga mwabelenga amalyashi yaba mu mabuuku ya Mbila Nsuma, mukasanga ukuti kwaliba ifintu fibili ifyacindama ifyo Yesu alecita ifyo na Bena Kristu muno nshiku bacita. Ifi e fyo twalalandapo mu cipande cikonkelepo.

[Amashiwi pe bula 8]

Bushe imbila nsuma iyo Abena Kristu babila yaba shani ngo mucele?

[Amashiwi pe bula 9]

Bushe imbila nsuma iya kwa Kristu yaba shani nge nyali umwafiita?