Yesu Kuti Ayasuka Shani?

Abantu abengi abatemwa ifya mapepo batila aba mu mipepele bafwile ukuitumpa na mu mapolitiki. Basumina ukuti imipepele kuti ya-afwilisha mu kupwisha amafya ya bantu. Lelo bambi nabo basumina ukuti aba mipepele tabalingile ukuitumpa mu mapolitiki nelyo mu fikansa fya calo. Inga imwe mutontonkanyapo shani? Bushe aba mipepele balingile ukuitumpa mu fikansa fya calo?

YESU KRISTU bamulondolola ukuti “e muntu uo aba mipepele bacindika sana.” Tutile twaipusha Yesu ukuti, Bushe aba mipepele bafwile ukuitumpa mu fikansa fya calo? Bushe kuti ayasuka shani? Ilyo ali pano calo, ayaswike ici cipusho mu fyo alelanda ne fyo alecita. Ku ca kumwenako, ilyo alelanda Ilyashi lya pa Lupili ilyaishibikwa sana, Yesu alandile pa fintu ifingafwa abasambi bakwe ukwishiba ifyo balingile ukulacita mu bwikashi. Natulande pali fimo ifyo alandilepo.

 Imikalile Yabo Ilakuma Bambi

Yesu alondolwele ifyo abasambi bakwe balingile ukulamona icalo. Atile: “Muli mucele wa pano isonde; lelo umucele nga wafumuka, bushe ukalowa shani na kabili? Tapali uko bengaubomfya kano fye uku-upoosa ku nse na bantu balaunyantapo. Muli lubuuto lwa ba muli ici calo. . . . Lekeni ulubuuto lwenu lubalikile ku bantu, pa kuti bamone imilimo yenu iisuma no kucindika Shinwe uwaba mu muulu.” (Mateo 5:13-16) Mulandu nshi Yesu apashanishishe abasambi bakwe ku mucele na ku lubuuto?

Amashiwi Yesu alandile yalangilila ukuti abasambi bakwe baba ngo mucele te ku bantu fye abanono lelo kuli bonse. Baba ngo lubuuto te ku bantu fye aba mpendwa, lelo ku bantu bonse abafwaya ukwishiba Lesa. Ilyo Yesu alandile ici cilangililo, alelangilila ukuti abasambi bakwe tabalingile ukufuma mu calo. Mulandu nshi twalandila ifi?

Umucele te kuti ulenge ifya kulya ukukanaonaika nga tabaubikileko. Inyali te kuti ibuutushe mu muputule nga ca kutila tamuibikilemo. E mulandu wine Yesu ashaebele abasambi bakwe ukuyaikala ku ncende imbi pa kuti baleikala fye abasumina beka beka, kabili tabakoseleshe ukuti balingile ukuitalusha ku bantu banabo. Lelo nga filya fine mulingile ukubika umucele ku fya kulya, no kubika inyali mu muputule pa kuti mubuute, e fyo ne mikalile ya Bena Kristu ilingile ukukuma abantu banabo.

“Te ba Muli Ici Calo”

Lelo ifi Yesu alandile ukuti abasambi bakwe bafwile ukulaba pamo na bantu banabo kuti calenga twaipusha icipusho cacindama pa fyo Abena Kristu balingile ukumona ukuibimba mu fikansa fya calo. Mulandu nshi twingepushisha ici cipusho? Pantu ilyo kwashele fye inshiku ishinono ukuti Yesu afwe, apepeeleko abasambi bakwe kuli Lesa ukuti: “Nshilemulomba ukuti mubafumye muli ici calo, lelo ukuti mulebacingilila ku mubifi. Te ba muli ici calo, ifyo na ine nshili wa muli ici calo.” (Yohane 17:15, 16) Lelo bushe Abena Kristu kuti bakaana shani ukuba aba muli ici calo nga ca kutila balingile ukulabombela pamo na bantu banabo? Pa kwasuka ici cipusho, natulande pa mepusho na yambi yatatu:

• Bushe Yesu aleitumpa mu fikansa fya calo?

• Bushe Abena Kristu muno nshiku balingile ukuitumpa mu fikansa fya calo?

• Bushe ifyo Abena Kristu basambilisha fikuma shani abekalacalo?

[Amashiwi pe bula 4]

Yesu alilandile fye apabuuta ukuti talefwaya abasambi bakwe ukuitalusha ku bantu banabo