Amashiwi Ayengamupeela Umweo wa Muyayaya

“Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.”—YOHANE 17:3.

UKWISHIBA ifintu kuti kwapususha umuntu. Ilyo Nauhou, uwali ne myeshi 10 alwele, banyina, abalesakamana abalwele ku ncende baleikala mu Niger, balishibe ifya kucita. Bapangiile umwana wabo umuti; babuulile amenshi aya busaka, babikamo shuga no mucele, e lyo balemunwesha. Akabungwe ka UNICEF katile, banyina Nauhou “balicitilepo cimo bwangu bwangu pantu balishibe ifya kusakamana abalwele, ne ci calengele umwana ukupola bwangu.”

Ukwishiba ifyaba muli Baibolo na ko kuti kwapususha abantu. Mose, uwabalilepo ukulemba Baibolo, atile: “Te mashiwi ya fye ndemweba, lelo mweo wenu, kabili kuli aya mashiwi kuti mwalenga inshiku shenu ukufula mu calo.” (Amalango 32:47) Bushe cine cine Baibolo kuti yalenga inshiku shesu ukufula? Bushe kuti yaba shani umweo wesu?

Ifipande fisano ifitendekeleko, nafitulanga ukuti Baibolo citabo icaibela nga nshi pantu mwaliba ukusesema uko twingacetekela, mwaliba ilyashi lya kale ilya cine cine, ifyo ilanda pa bumi fya cine, ifyalembwamo filomfwana, kabili ifyo ifunda filatwafwa sana. Ifi fyonse filanga ukuti ca cine Baibolo yalipusana ne fitabo fimbi. Kanshi nga ca kutila ilalanda na pa fya kucita pa kukwata umweo wa muyayaya, bushe te kuti ciwame ukusambilila ifyabamo?

Tulemukoselesha ukusambilila ifyo ukwishiba bwino Baibolo kwingamulenga ukuba no mutende pali ino nshita ne fyo mwingesaba ne nsansa ku ntanshi. Inte sha kwa Yehova bakatemwa nga nshi ukumulanga ifyo mwingasanga uku kwishiba.

[Akabokoshi ne Cikope pe bula 9]

Na kabili Baibolo yali-ibela pantu e yasuka fye aya mepusho ayacindama:

• Cinshi twabela pano calo?

• Mulandu nshi ukucula kwafulila ifi?

• Bushe abantu natemenwe abafwa bakabuuka?

Kuti mwasanga amasuko kuli ifi fipusho muli Baibolo ukubomfya icitabo citila Bushe Cinshi Baibolo Isambilisha icalembwa ne Nte sha kwa Yehova.