Bushe Baibolo Yaba fye nge Fitabo Fimbi?

“Amalembo yonse aya mushilo yafuma kuli Lesa kabili ya mulimo . . . , pa kuti umuntu wa kwa Lesa abe uwafikapo bwino bwino, uwaipangasha icine cine ukubomba umulimo onse uusuma.”—2 TIMOTE 3:16, 17.

ABANTU bamo tabasumina ifi Baibolo yalanda. Inga imwe mutontonkanyapo shani? Bushe mumona ukuti Baibolo . . .

• Citabo fye icisuma icalembwa bwino?

• Citabo fye ica mushilo nge fitabo fimbi?

• Citabo umwaba inshimi isho twingasambililako?

• Cebo ca kwa Lesa?

Icipusho na cimbi ca kutila, Bushe ifyo mwasumina pali Baibolo fyalicindama? Umfweni ifyo Baibolo iine ilanda. Itila: “Fyonse ifyalembelwe kale fyalembelwe ku kutufunda, pa kuti mu kushipikisha kwesu na mu cisansamushi ca mu Malembo tube ne subilo.” (Abena Roma 15:4) Kanshi ico Baibolo yalembelwe kutufunda, ukutusansamusha, no kutulenga ukuba ne subilo.

Nga ca kuti Baibolo libuuku fye ilisuma ilyalembwa bwino nelyo libuuku fye ilya mushilo nga mabuuku yambi, bushe imwe no lupwa lwenu kuti mulekonka ifyalembwamo, maka maka nga ca kutila fyalipusana ne fyo mwaishiba ukuti e fyalungama? Nga ca kuti mu Baibolo mwalembwa fye inshimi, bushe kuti yamusansamusha no kumulenga ukuba ne subilo?

Abantu imintapendwa abasambilila Baibolo balishininkisha ukuti Cebo ca kwa Lesa, icapusanako ne fitabo fimbi. Cinshi calenga bashininkishe? Bushe Baibolo yapusana shani ne fitabo fimbi? Mukwai belengeni ifipande fyakonkapo ifilelanda pa fintu 5 ifyalenga Baibolo ukupusanako ne fitabo fimbi.