Bushe Kwaliba Uukutika ku Mapepo?

“Naletwishika nga ca kutila Lesa e ko aba. Lelo ukupepa kwena nalepepa limo limo. Naletwishika nga ca kuti kwali uwalekutika ku mapepo yandi, lelo nalikwete isubilo lya kutila kwali uwalekutika. Nshali ne nsansa kabili nshaishibe ne co nabela pano calo. Naletiina ukusumina muli Lesa pantu naletontonkanya ukuti abantu abashaicetekela e basumina muli Lesa.”—BA PATRICIA, * ABA KU IRELAND.

BUSHE na imwe mwalibala amumfwapo nga ba Patricia? Bushe mulapepa kuli Lesa nangu ca kutila mulatwishika nga e ko aba? Nga e fyo caba, ishibeni ukuti te imwe mweka mutwishika. Natulande pa fya kumwenako fyakonkapo.

◼ Ilyo baipwishe abantu 2,200 mu Britain, abali 484 balisumine ukuti kwaliba Lesa uwapangile isonde kabili uukutika ku mapepo. Lelo pali aba bantu baipwishe, abali fye 1,210 e bapepa kuli Lesa limo limo.

◼ Ilyo baipwishe abantu 10,000 ukufuma mu fyalo fyalekanalekana, mupepi na bantu 3,000 abatile tabasumina muli Lesa, balapepa kuli Lesa.

Mulandu Nshi Batwishikila?

Umwaume umo uwa ku England, uwe shina lya Allan atile: “Umulandu nalelandila ukuti nshasumina muli Lesa, ni co naletontonkanya ukuti ico imipepele yabelako kufwaya fye ukulaeba abantu ifya kucita, e lyo no kufwaya ukupanga indalama. Kabili naletontonkanya no kuti Lesa nga e ko aba, ulufyengo te kuti lufule ifi. Na lyo line, limo naleikala tondolo no kupepa. Na kabili naleyipusha ukuti, ‘Bushe cali shani pa kuti imbeko?’”

Umuntu onse uutontonkanya ifi alikwata imilandu iyalenga ukuti aletwishika nampo nga Lesa alasuka amapepo nelyo iyo. Ilingi line icilenga abantu ukulatwishika, mulandu wa kukanaishiba amasuko ku mepusho pamo nga yakonkapo:

◼ Bushe Kabumba e ko aba?

◼ Mulandu nshi imipepele ilingi ilengela ifyabipa ukulacitika?

◼ Mulandu nshi Lesa asuminishisha ukucula?

Nga mwaishibe amasuko kuli aya mepusho, bushe kuti mwacetekela ukuti cine cine kwaliba uukutika ku mapepo yenu?

[Futunoti]