Mulandu Nshi Lesa Uumfwa Amapepo Asuminishisha Ukucula?

NANGU ca kutila abantu bamo balapepa, balatwishika nga ca kuti Lesa e ko aba. Mulandu nshi batwishikila? Nalimo ni pa mulandu wa kuti balamona uko abantu bacula sana muno calo. Bushe mwalibala amutontonkanyapo umulandu Lesa asuminishisha ukucula?

Bushe ca cine Lesa apangile abantu ukuti babe ababembu kabili balecula, nge fi caba pali lelo? Te kuti tutemwe lesa uwingapanga abantu ukuti balecula fye. Natulangilile: Tutile mwashita motoka iipya kabili cilya muleiceeceeta, mwamona naikwebululwa ku numa. Bushe kuti mwatila ifi fine e fyo baipangile? Awe, iyo! Kuti mwatontonkanya ukuti abapangile motoka baipangile fye bwino lelo kufwile kwali fye umuntu umbi uwaikwebulwile.

E fyo caba na ku fintu ifyo Lesa apanga. Nga twamona ifyo afipanga bwino e lyo twamona na macushi yaba mu calo, bushe kuti twatila e fyo Lesa alefwaya? Baibolo isambilisha ukuti Lesa apangile abantunse ba kubalilapo abapwililika lelo pa numa balicitile ifintu ifyabaletelele. (Amalango 32:4, 5) Lelo icawama ca kuti Lesa alilaya ukuti ali no kufumyapo ukucula, ali no kulenga abantu ukuba abapwililika na kabili. Nomba mulandu nshi ashafumishapo ukucula pa myaka yonse iyi?

Mulandu Nshi Papitila Inshita Yalepa Ifi?

Umulandu uwalenga ukuti papite inshita yalepa ifi, wakuma uufwile ukuteka abantunse. Yehova tapangile abantunse ukuti baleiteka. E walingile ukulabateka. Baibolo itila: “[Umuntu] takwata amaka ya kutungulula intampulo shakwe.” (Yeremia 10:23) Ica bulanda ca kuti, abantunse ba kubalilapo basalilepo ukupondokela ukuteka kwa kwa Lesa. Pa mulandu wa kuti balipulile  mwi funde lya kwa Lesa, basangwike ababembu. (1 Yohane 3:4) Ne cafuminemo ca kutila, tabali abapwililika na kabili, bali-iletelele no kuletelela abana babo.

Pa myaka iingi nga nshi, Yehova alisuminisha abantunse ukulaiteka, kabili ifyacitika imyaka yonse iyi filanga ukuti abantunse tabakwata amaka ya kuiteka. Amabuteko yonse aya bantunse yalalenga abantu ukulacula. Takwaba ubuteko nangu bumo ubwafumyapo inkondo, bumpulamafunde, ulufyengo, nelyo amalwele.

Bushe Lesa Akapwisha Shani Ukucula?

Baibolo ilaya ukuti nomba line, Lesa ali no kuleta icalo cipya icalungama. (2 Petro 3:13) Ni balya fye abasalapo ukutemwa abantu banabo na Lesa e bo Lesa akasuminisha ukwikala muli ici calo.—Amalango 30:15, 16, 19, 20.

Na kabili Baibolo itila pa “bushiku bwa bupingushi” ubuli mupepi, Lesa akafumyapo ukucula konse na bonse abalenga tulecula. (2 Petro 3:7) Pa numa, Yesu Kristu, Kateka uo Lesa asala, akalateka abantunse aba cumfwila. (Daniele 7:13, 14) Bushe ifintu fikaba shani ilyo Yesu akalateka? Baibolo itila: “Abafuuka e bakekala mu calo, kabili bakasekelela nga nshi pantu umutende ukafula.”—Amalumbo 37:11.

Yesu, Imfumu ya ku muulu, akafumyapo ifyabipa fyonse, pamo no kulwala, ukukota, ne mfwa, ifyaishilebako ilyo abantunse babembukile Yehova, “intulo ya mweo.” (Amalumbo 36:9) Yesu akondapa bonse abafwaya ukuti alebateka. Ilyo akalateka, amalayo ayakonkapo ayo Baibolo yalaya, yakafikilishiwa:

◼ “Takuli umwikashi uukatila: ‘Nindwala.’ Abantu abakekala mu calo bantu abaelelwa imembu shabo.”—Esaya 33:24.

◼ “[Lesa] akafuuta ifilamba fyonse ku menso  yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:4.

Bushe tamusansamwike ukwishiba ukuti nomba line Lesa ali no kufikilisha ubulayo bwakwe ubwa kufumyapo ukucula konse? Kanshi, kuti twacetekela ukuti alomfwa amapepo yesu, nangu ca kutila pali ino nshita alisuminisha abantu ukucula.

Lesa e ko aba. Alakutika nga mwapepa, na lintu mulemweba fyonse ifilemucusha ne filelenga ukuti muleba no bulanda. Kabili alafwaisha ukuti mukaipakishe ukwikala mu calo umushakabe ukukalipwa kabili ilyo mushakaletwishika nga ca kuti Lesa e ko aba.