Nani Uukutika ku Mapepo?

NGA kwaliba uukutika ku mapepo ninshi ukwabula no kutwishika e ufwile ukuba Kabumba. Pantu na kuba, nani engeshiba amatontonkanyo yenu ukucila pa wapangile bongobongo yenu? Bushe kuti kwaba umbi ukucila pali Kabumba uwingasuka amapepo no kwafwa abantunse ilyo balekabila ubwafwilisho? Nomba nalimo kuti mwaipusha ukuti, ‘Bushe kwaliba imilandu ine ine iya kucetekelela ukuti kwaliba Kabumba?’

Abantu abengi batontonkanya ukuti pa kusumina ukuti Kabumba e ko aba, umuntu tafwile ukusumina mu fya sayansi. Lelo ubu bufi ubwafiita fititi. Tontonkanyeni pali uku kufwailisha kwakonkapo.

◼ Ilyo abafwailisha ifintu baipwishe ba profesa aba mu fya sayansi 1,646 ababa pa mayuniversiti 21 ayacindama sana mu United States, abali fye nalimo 550 e balandile ukuti “nshasumina muli Lesa.”

Icishinka ca kuti basayantisiti abengi balisumina ukuti Lesa e ko aba.

Ubushininkisho bwa Kuti Kabumba E ko Aba

Bushe tufwile ukusumina fye ukuti kwaliba uumfwa amapepo ukwabula no bushininkisho ubuli bonse? Awe nakalya. Filya bamo batontonkanya ukutila kuti wasumina mu cintu nangu tapali ubushininkisho, fya bufi. Baibolo ilondolola ukuti icitetekelo “bushininkisho bwa kuti ifintu nangu tafilamoneka, fya cine.” (AbaHebere 11:1) Ku ca kumwenako, umwela taumoneka lelo kuti mwamona ifyo ucita. Nga ulepuupa ulalenga imiti ukutenkana. Ici cilalenga mwashininkisha ukuti umwela e ko waba nangu taumoneka. Ifi fine e fyo caba na kuli Lesa, nangu ca kutila tatumumona, kuti twashininkisha ukuti e ko aba nga twamona ubushininkisho.

Ni kwi twingasanga ubushininkisho ubwa kuti Lesa e ko aba? Tatufwile ukuya no kutali. Baibolo  itila: “Ing’anda yonse muntu akuula, lelo uwapangile ifintu fyonse ni Lesa.” (AbaHebere 3:4) Bushe tamulesumina ukuti aya mashiwi ya cine? Nalimo nga mwatontonkanya pa fyo ifyabumbwa mu muulu na pe sonde fyateyanishiwa bwino, pa fyo ubumi bwatendeke, nangu pa fyo bongobongo ya bantunse yapikana ukucila pa fintu fyonse ifyabumbwa, kuti mwasondwelela ukuti kufwile kwaliba umo uwacila abantunse uwalengele ukuti ifi fyonse fibeko. *

Lelo ukumona fye ifyo Lesa abumba kweka te kuti kutusambilishe fyonse pali Lesa. Ukulamona fye ifyo abumba kuti twakupashanya ku nshindo sha muntu uuli ku nse ya ng’anda. Ukwishiba kwena kuti mwaishiba ukuti pa nse pali umuntu, nomba teti mwishibe uulipo. Nga mulefwaya ukumwishiba, mulingile ukwisula iciibi pa kuti mumumone. Ifi fine e fyo tufwile ukucita nga tulefwaya ukwishiba uwabumbile ifintu fyonse.

Baibolo yaba kwati ciibi icingalenga twaishiba Lesa. Nga mwabelenga Baibolo no kumona ifyo ukusesema kwabamo kwafikilishiwa, mukashininkisha ukuti Lesa e ko aba. * E lyo cimbi ca kutila, amalyashi yaba mu Baibolo ayalanda pa fyo Lesa alesunga abantu yalatulanga imibele iyo Lesa, uumfwa amapepo, akwata.

Bushe Lesa Uumfwa Amapepo Aba Shani?

Baibolo ilanda ukuti Lesa, uumfwa amapepo e ko aba, kabili kuti mwamwishiba. Kanshi apo e ko aba, ukwabula no kutwishika kuti akutika ku  mapepo yesu no kutumfwa. Tulasansamuka nga twabelenga aya mashiwi ayalanda pali Lesa aya kuti: “Mwe bomfwa ipepo, kuli imwe e ko abantunse bakesa.” (Amalumbo 65:2) Alakutika ku mapepo ya bantu abacetekela ukuti alasuka amapepo. Kabili alikwata ne shina. Baibolo itila: “Yehova aba ukutali na babifi, lelo alomfwa ipepo lya balungami.”—Amapinda 15:29.

Yehova ni “Lesa wa kutemwa” kabili ni “Lesa wa nsansa.” (2 Abena Korinti 13:11; 1 Timote 1:11) Ifyo tucita filamukuma. Baibolo ilanda ifyo Yehova aumfwile ilyo ububifi bwafulile sana pano isonde, itila: “Aumfwile ubulanda mu mutima wakwe.” (Ukutendeka 6:5, 6) Ifi bamo balanda ukuti Lesa e walenga ukuti kube ukucula pa kuti eshe abantu, bufi ubwafita fititi. Baibolo itila: “Lesa wa cine te kuti acite ifyabipa.” (Yobo 34:10) Lelo nalimo mulatontonkanyapo ukuti, ‘Nga ca kutila Lesa ni Kabumba wa maka yonse, cinshi asuminishisha abantu ukulacula?’

Yehova alipeela abantunse ubuntungwa bwa kuisalila ico balefwaya, ne ci cilanga ukuti alitucindika. Bushe tatwatemwa ifi atupeela ubuntungwa bwa kuisalila ifyo tulefwaya ukulaikala? Lelo ica bulanda ca kutila, abantu abengi tababomfya bwino ubu ubuntungwa Lesa atupeela, ne ci calenga ukuti balecula no kulenga bambi ukuculilamo. Nomba icipusho icacindama ico tulingile ukutontonkanyapo sana ni ci: Bushe Lesa kuti apwisha shani ukucula nga ca kutila tapokele abantu ubuntungwa abapeela ubwa kuisalila ukucita ifyo balefwaya? Ici e cipusho twala-asuka mu cipande cikonkelepo.

[Amafutunoti]

[Akabokoshi pe bula 5]

Bushe Ifyabipa Ificita aba Mipepele E Fyalenga Muletwishika Nga Lesa E ko Aba?

Ica bulanda ca kuti aba mipepele e balenga abantu abengi ukulatwishika nga kwaliba Lesa uwa cikuuku, uumfwa amapepo. Ifi aba mu mipepele baitumpa mu nkondo, mu kusansa kwa tupondo, no kutekelesha abacusha nelyo ukucenda abana, fyalenga abantu abatemwa ukupepa ukulalanda ukuti: “Nshasumina ukuti Lesa e ko aba.”

Mulandu nshi ilingi aba mu mipepele bacitila ifyabipa? Mulandu wa kutila abantu ababipa balabomfya imipepele ku kucitilamo ifyabipa. Baibolo yasobele ukuti abantu ababipa bakabomfya imipepele ya Bena Kristu ku kucita ifintu ifyo Lesa apata. Umutumwa Paulo aebele bakangalila Abena Kristu ukuti: “Muli imwe mukema abantu abakalasambilisha ifyanyongana pa kuti bongole abasambi, balebakonka.”—Imilimo 20:29, 30.

Lesa alipata sana imipepele ya bufi. Na kuba, Icebo ca kwa Lesa Baibolo, cilanda ukuti imipepele ya bufi yaba no mulandu wa “mulopa . . . uwa bantu bonse [abaipaiwa] pe sonde.” (Ukusokolola 18:24) Pa mulandu wa kuti imipepele ya bufi yalifilwa ukusambilisha abantu pali Lesa wa cine, uwaba sana no kutemwa, iyi mipepele yaliba no mulandu wa mulopa kuli Lesa.—1 Yohane 4:8.

Uumfwa ipepo alomfwila ubulanda ababa mu mipepele iititikisha abantu. Nomba line, ukutemwa uko Lesa atemwa abantu kuli no kumulenga ukubomfya Yesu, ukupingula Abena Kristu ba bumbimunda bonse. Yesu atile: “Abengi muli bulya bushiku bakatila kuli ine, ‘Mwe Shikulu, mwe Shikulu, bushe tatwasesemene mwi shina lyenu?’ . . . Lelo nkabebelapo nkatila: Nshatalile imwishiba! Fumeni apa, mwe bampulamafunde mwe.”—Mateo 7:22, 23.