Palameni Kuli Lesa Uumfwa Amapepo

ABANTU abengi abatila balisumina muli Lesa, balafilwa ukulondolola bwino umulandu basuminina muli ena. Kabili te kuti balondolole umulandu aba mu mipepele bacitila ifyabipa nelyo umulandu Lesa asuminishisha abantu ukulacula. Ico bengacita fye, kupepa kuli Lesa uo bashaishiba no kwishiba.

Lelo imwe, kuti mwapalama kuli Lesa ukucila ukulapepela fye ico cine. Kuti mwaba ne citetekelo nga mwaishiba bwino Lesa kabili ici kuti calenga mwamutemwa no kumucindika. Icitetekelo ca cine cashimpwa pa bushininkisho. (AbaHebere 11:1) Nga mwasambilila icine pali Lesa, kuti mwamwishiba bwino kabili kuti mulelanda nankwe nga cibusa wenu. Natulande pa bantu bamo abalepepa nangu ca kuti baletwishika nga Lesa e ko aba.

◼ Ba Patricia, abo tulandilepo mu cipande ca kubalilapo batile: “Bushiku bumo, nali na banandi, abaali nalimo 10, kabili batendeke ukulanda pa mipepele yalekanalekana. Naebele abanandi ukuti nacifuma pa ng’anda pantu nshacilafwaya ukukutika ku fyo batata, abatila Lesa takwaba, bacilalanshanya na ba Nte abaciisa pa ng’anda. Lelo umunandi umo atile, ‘Nalimo ifyo ba Nte basambilisha fya cine.’

“Umbi na o atile: ‘Bushe te kuti ciwame ukuti bushiku bumo tukayepepako pa kuti tukayemona nga ca kuti ifyo basambilisha fya cine?’ E co, twaliile. Nangu ca kuti twaletwishika ifyo ba Nte balesambilisha, bamo twalitwalilile ukulalongana pantu baletupokelela bwino.

“Lelo bushiku bumo pa Mulungu, balandile ilyashi limo ilyalengele ukuti njaluke mu fyo naletontonkanya pali Lesa. Abalandile ilyashi balilondolwele icalenga abantu ukulacula. Nshaishibe ukuti abantu abo Lesa abalilepo ukubumba bali abapwililika no kuti ulubembu ne mfwa fyaingilile mu muntu umo no kusalanganina ku bantu bonse. Balondolwele no kuti ico Yesu afwilile, ni pa kuti abantu bakabe abapwililika na kabili nga filya fine abantunse ba kubalilapo baali. * (Abena Roma 5:12, 18, 19) Ilyo line fye, naishilemona ukuti ifyo balelanda fya cine. Naishiletontonkanya ukuti, ‘Cine cine kwaliba Lesa uutusakamana.’ Nalitwalilile ukusambilila Baibolo kabili tapakokwele naishileishiba icishinka ico nshabalile njishiba ica kutila kuti napepa kuli Lesa pantu e ko aba.”

◼ Ba Allan, abo tulandilepo mu cipande ca kubalilapo  batile: “Bushiku bumo ba Nte baishile pa ng’anda pa mwesu, kabili umwina mwandi alibengishe mu ng’anda pantu alitemenwe ifyo balandile ukuti abantu bakekala umuyayaya pe sonde. Nalifulilwe icine cine. E ico nalifumine mu muputule wa kutuushishamo umwali ba Nte kabili naitile umukashi wandi ku kicini no kumukalipila sana. Namwebele ukuti, ‘Ifi balelanda fya bufi!’

“Anjaswike ati, ‘Kabashinineni ukuti ifyo balelanda fya bufi.’

“Kwena, nalifililwe ukubashinina. Baali ne cikuuku sana kabili banshiliile icitabo icilanda pa fyo ifya mweo fyaishilebako, nampo nga fyasangwike fye nelyo kwali uwafipangile. Ifyo balondolola muli ici citabo fyaleumfwika bwino sana kabili mwali no bushininkisho ubwingi ubwalelangilila ukuti ifyo balandamo fya cine. E ico napingwilepo ukuti mfwile ukwishibilapo na fimbi pali Lesa. Natendeke ukusambilila Baibolo ne Nte sha kwa Yehova, kabili tapakokwele naishileiluka ukuti ifyo Baibolo isambilisha fyalipusana sana ne fyo naletontonkanya pa mipepele. Ilyo natendeke ukwishiba Yehova, natampile ukupepa kuli ena mu kulungatika. Nalikweteko imisango imo iishaweme, e ico nalipepele kuli Yehova ukuti angafwe. Nalishininkisha ukuti Yehova alyasuka amapepo yandi.”

 ◼ Ba Andrew abekala ku England batile: “Nangu ca kuti nshalesumina mu fintu icisuminesumine kabili nalitemenwe na sayansi, icisambilisho ca kusanguka cena nacisuminine fye pantu abantu balelanda ukuti ca cine. Pa mulandu wa fintu ifyabipa ificitika, nalikeene ukusumina ukuti Lesa e ko aba.

“Lelo, limo naletontonkanya ati: ‘Nga ca kuti Lesa e ko aba, ninshi mfwile ukwishiba umulandu twabela pano calo. Mulandu nshi pano calo pafulila bumpulamafunde ne nkondo?’ Nga ndi na mafya, limo nalepepa, nangu line nshaishibe uo nalepepako ukuti angafwe.

“Bushiku bumo umuntu umo apeele umwina mwandi trakiti iyo Inte sha kwa Yehova balemba, iitila Bushe Ici Calo Cikapusunsuka? Ici e cipusho naletontonkanyapo lyonse. Iyi trakiti yalengele ndetontonkanya pali Baibolo ukuti, ‘Bushe muli Baibolo kuti nasangamo amasuko yene yene?’ Inshita imbi ilyo nali pa cuti, umuntu umo ampeele icitabo icitila, Baibolo—Cebo ca kwa Lesa Nelyo ca Muntu? Ilyo naishibe ukuti ifyaba muli Baibolo filomfwana na sayansi ya cine, e lyo namwene ukuti mfwile ukusambilila na fimbi ifya mu Baibolo. E ico, ilyo Nte umo anjipwishe nga kuti natemwa ukulasambilila Baibolo, nalisumine. Ilyo natendeke ukwishiba ukufwaya kwa kwa Yehova, naishileishiba ukuti Yehova e ko aba, kabili kuti namweba icili conse ukwabula umwenso.”

◼ Ba Jan abakuliile mu mipepele ya ba Protestanti ku London, batile: “Ubumbimunda bwaba mu mipepele e lyo ne fyo ubucushi bwafula pano calo fyalengele ukuti ndeke ukupepa. Na kabili nalilekele ukuya mu kusambilila ku koleji kabili natendeke ukwimba inyimbo no kulisha ifilimba fya nsale pa kuti ndekwata indalama. Ilyo naleimba inyimbo no kulisha ifilimba, e lyo naishileishibana na ba Pat. Ba Pat bakuliile mu Katolika lelo baishileleka ukupepa kwati nine.

“Twaleikala mu ng’anda iyashele icipompa pamo na bambi abalekele amasukulu abatemenwe imipepele ya ku fyalo fya ku Asia. Ilingi ubushiku, twalepoosa inshita iikalamba tulelanshanya ico twabela pa calo. Nangu ca kutila ine na ba Pat tatwasumine ukuti Lesa e ko aba, twalishibe ukuti kufwile kwalibako ‘amaka yamo’ ayalenga ukuti ifya mweo fitwalilile ukubako.

“Ilyo twakukiile ku kapinda ka ku kuso aka England mu kufwaya incito ya kwimba inyimbo, umwana wesu umwaume alifyelwe. Bushiku bumo umwana alilwele kabili natendeke ukupepa kuli Lesa uo nshasumine ukuti e ko aba. Tapakokwele, twatendeke ukupusana na ba Pat, kabili nalibashiile, nasenda no mwana. Na uno wine muku nalipepele, naletontonkanya ukuti nalimo kuti kwaba uwingakutika ipepo lyandi no kungafwa. Nshaishibe ukuti ba Pat nabo balepepa.

“Bulya bwine bushiku, ba Nte babili baile pa ng’anda ya ba Pat kabili babalangile ifyebo fimo ifya mu Baibolo ifyali no kubafwa mu mikalile yabo. Ba Pat balintumine foni no kunjipusha nga kuti natemwa ba Nte baletusambilishisha pamo Baibolo. Tapakokwele, twasambilile ukuti pa kulenga Lesa ukusekelela, tulingile ukulembesha icupo cesu. Calitukosele ukulembesha icupo pantu twalepusana sana.

“Twalefwaya ukwishibilapo na fimbi pa fyo ukusesema kwa mu Baibolo kulefikilishiwa, umulandu abantu baculila, na pa Bufumu bwa kwa Lesa. Mu kupita kwa nshita, twaishileishiba ukuti Lesa alatusakamana, kabili twalefwaya ukulacita ifyo afwaya. E ico twalyupene ukulingana ne funde. Ifyo Baibolo ifunda fyalitwafwa ukukusha bwino abana besu batatu. Twalishininkisha ukuti Yehova alikutike ku mapepo yesu.”

Bebeteni Ubushininkisho mwe Bene

Abantu twalandapo muli cino cipande tabalufiwe ku fisambilisho fya bufi, balisambilile umulandu Lesa asuminishisha ukucula. Kabili ifi fine e fyo na bantu abengi nga nshi baacita. Bushe namumona ukuti icalengele aba bonse twalandapo ukushininkisha ukuti Yehova alomfwa amapepo, ni co balisambilile no kwishiba bwino ifyo Baibolo ilanda?

Bushe kuti mwatemwa ukwishiba ubushininkisho ubulanga ukuti Lesa e ko aba? Inte sha kwa Yehova bakatemwa nga nshi ukumwafwa ukwishiba icine pali Yehova ne fyo mwingapalama kuli Lesa, ‘uumfwa ipepo.’—Amalumbo 65:2.

[Futunoti]

[Amashiwi pe bula 10]

“Ilyo natendeke ukwishiba ukufwaya kwa kwa Yehova, naishileishiba ukuti Yehova e ko aba, kabili kuti namweba icili conse ukwabula umwenso”

[Icikope pe bula 9]

Icitetekelo ca cine cashimpwa pa bushininkisho no kufwaya ukwishiba icine pali Lesa