Sambilileni Icebo ca kwa Lesa

Ni Lilali Yesu Atendeke Ukuteka?

Ici cipande cilelanda pa mepusho ayo nalimo mufwaisha ukwishiba kabili cilemulanga napo mwingasanga amasuko muli Baibolo yenu. Inte sha kwa Yehova kuti batemwa nga nshi ukulanshanya na imwe ayo masuko.

1. Bufumu nshi Yesu bamulaile?

Lesa alaile ukuti uwa mu lupwa lwa Mfumu Davidi aali no kuteka umuyayaya pa cipuna ca bufumu bwa kwa Lesa. Uyu basobele ukuti aali no kuteka umuyayaya ni Yesu, kabili pali ino nshita ni Mfumu ya Bufumu bwa kwa Lesa mu muulu.—Belengeni Amalumbo 89:4; Luka 1:32, 33.

Ilyo Davidi aali fye umulumendo, Lesa alimusalile ukuba imfumu ya bantu bakwe, abena Israele. Lintu Davidi afwile, Solomone, uo Yehova asalile, e waikele pa “cipuna ca bufumu bwa kwa Yehova.” (1 Imilandu 28:4, 5; 29:23) Ilyo Solomone afwile, imfumu ishalekanalekana shalitekele mu Yerusalemu, lelo ishingi tashali ne cishinka. E ico, Yehova alekele abashilika ba bena Babiloni ukonaula Yerusalemu no kufumyapo imfumu yalipo. Ici cacitike mu 607 B.C.E. Ukufuma ulya mwaka, takwali imfumu nangu imo iya mu lupwa lwa kwa Davidi iyatekele mu Yerusalemu.—Belengeni Esekiele 21:27.

2. Ni pa myaka inga ishamfumu sha mu lupwa lwa kwa Davidi ishaleimininako Ubufumu bwa kwa Lesa shalekele ukuteka?

Pa numa fye ya konaulwa kwa Yerusalemu, Yehova aebele kasesema Daniele ukuti Lesa aali no kusala imfumu iyali no kulateka ukufuma ku muulu. Ni lilali iyi imfumu yali no kutendeka ukuteka?—Belengeni Daniele 7:13, 14.

Daniele alondolwele icimonwa umo Lesa alandile ukuti bateme icimuti icikalamba, nga filya fine Lesa alandile ukuti ubufumu bwa mu Yerusalemu babonaule no kubufumyapo. Lelo icishiki ca cimuti bali no kucisha mu mushili pa kuti cikapuuke pa numa ya “nshita 7.” Baibolo ilangilila ukuti inshita ya myaka itatu na hafu ni nshiku 1,260, kanshi “inshita 7” ni nshiku 2,520. (Ukusokolola 12:6, 14) Mu Baibolo, ilingi inshiku shimininako imyaka. (Impendwa 14:34) Kanshi pa myaka 2,520 takwali ishamfumu sha mu lupwa lwa kwa Davidi ishaleteka pa cipuna ca Bufumu bwa kwa Lesa.—Belengeni Daniele 4:10-17.

 3. Ni lilali Yesu bamubikile pa Bufumu?

Lesa abikile Yesu pa Bufumu mu muulu mu 1914, lilya line fye imyaka 2,520 yakumene ukutula apo baonawilile Yerusalemu. Ica kubalilapo ico Yesu acitile ilyo atendeke fye ukuteka, kutamfya Satana ne fibanda fyakwe ukufuma ku muulu. (Ukusokolola 12:7-10) Nangu ca kuti abantu tabamweneko ilyo Satana ne fibanda babatamfishe, ububifi ubwaba pano calo ukutula apo babatamfisha bwena tulabumona. (Ukusokolola 12:12) Ifintu ificitika ukutula mu 1914 filanga ukuti muli uyu wine mwaka e lyo Yesu atendeke ukuteka.—Belengeni Mateo 24:14; Luka 21:10, 11, 31.

4. Bushe ukuteka kwa kwa Yesu kwacindama shani kuli imwe?

Ukufikilishiwa kwa masesemo ayalanda pa kuteka kwa kwa Yesu kulenga mwacetekela ukuti Icebo ca kwa Lesa ca cine. Nomba line, Yesu ali no kubomfya amaka apeelwa aya kuteka ku kufumyapo ukucula konse.—Belengeni Amalumbo 72:8, 12, 13; Daniele 2:44.

Nga mulefwaya ukwishibilapo na fimbi, belengeni pa mabula 215 ukufika ku 218 mu citabo citila Bushe Cinshi Baibolo Isambilisha? icalembwa ne Nte sha kwa Yehova.

[Charti pa mabula 16, 17]

(Nga mulefwaya ukumona charti, moneni muli magazini)

October October

607 B.C.E. 1914 C.E.

← imyaka 2,520 →

1000 B.C.E. 1 B.C.E. 1 C.E. 1000 C.E. 2000 C.E.

← Imyaka 606 ne myeshi 3 →← imyaka 1,913 ne myeshi 9 →

Ubufumu bwa Pendeni: Lesa apeela Yesu

mu Yerusalemu Imyaka 606 ne myeshi 3 ubufumu na maka

bwaonaulwa + Imyaka 1,913 ne myeshi 9 kuteka inko

= Imyaka 2,520