Palameni Kuli Lesa

Yehova Alipata Ulufyengo

“UMUNTU atekela umuntu munankwe ku kumucusha.” (Lukala Milandu 8:9) Aya mashiwi ayalembelwe imyaka 3,000 iyapita yalalondolola bwino ifyo abantu muno calo baba. Abantu balitemwa ukubomfya amaka yabo bubi bubi te mulandu ne cifulo bakwata nelyo uko bekala. Ilingi line balacusha abalanda na bashakwata aba kubafwa. Bushe Yehova omfwa shani pali ulu lufyengo? Icasuko tucisanga pali Esekiele 22:6, 7, 31.—Belengeni.

Mu Mafunde Yehova apeele abena Israele, alibebele mu kulungatika ukuti intungulushi tashalingile ukubomfya amaka bubi bubi. Aali no kupaala fye uluko lwa bena Israele nga ca kutila intungulushi shali ne cikuuku kabili shalelangulukilako abapiina. (Amalango 27:19; 28:15, 45) Lelo, mu nshiku sha kwa Esekiele, intungulushi shali mu Yerusalemu na mu Yuda tashalebomfya bwino amaka. Finshi shalecita?

Intungulushi shalebomfya “ukuboko . . . ku kusuumya umulopa.” (Icikomo 6) Ishiwi lya kuti “ukuboko” lipilibula amaka. E mulandu wine muli Baibolo imbi mwabela amashiwi ya kuti: “Bacilolo ba mu Israele . . . babomfya amaka yabo ku kusuumya umulopa.” Bushe umulinganya wali no kubako shani apo intungulushi, ishalingile ukulakoselesha abantu ukukonka amafunde, e shalebomfya amaka bubi bubi no kwipaya abantu ba kaele?

Esekiele na kabili atile te ntungulushi fye ishali no mulandu, lelo na balya bene abalekonka intungulushi mu kukanaumfwila Amafunde ya kwa Yehova nabo bene bali no mulandu. Atile: “Wishi na nyina basaalulwa.” (Icikomo 7) Pa mulandu wa kuti abantu balisuulile icifulo Yehova apeela abafyashi mu lupwa, abantu balyonawile indupwa ishali no kulenga abena Israele ukuba uluko ulwakosa.—Ukufuma 20:12.

Abantu ababipa baleliila abalanda amasuku pa mutwe. Pa kukanaumfwila amafunde, balelanga ukuti balisuulile ukutemwa kwa kwa Lesa uko abatemenwe pa kubapeela aya Mafunde. Ku ca kumwenako, mu Mafunde Lesa abapeele, mwali ne funde lya kuti abena Israele tabalingile ukucusha abashali abena Israele abaleikala mu kati kabo. (Ukufuma 22:21; 23:9; Ubwina Lebi 19:33, 34) Lelo abantu ‘balecenjesha’ abalebeshi.—Icikomo 7.

Na kabili, balecusha abashakwete aba kubafwa, e kutila “abana ba nshiwa na bamukamfwilwa.” (Icikomo 7) Yehova alibika sana amano kuli balya abafwilwa abafyashi nelyo abena mwabo. Lesa alandile ukuti aali no kukanda bonse abalecusha abana ba nshiwa nelyo bamukamfwilwa.—Ukufuma 22:22-24.

Muli ifi fyonse ifyo abena Israele mu nshiku sha kwa Esekiele balecita, balisuulile Amafunde ya kwa Lesa ayashimpilwe pa kutemwa. Bushe cinshi Yehova aali no kucita? Atile: “Nkapongolwela ubukali bwandi pali bena.” (Icikomo 31) Na cine, mu 607 B.C.E., Yehova alekele abena Babiloni ukonaula Yerusalemu no kusenda abantu muli bunkole.

Tulasambililako amasambililo yabili ku mashiwi Esekiele alandile pali Yehova na pa fyo amona ulufyengo. Ica kubalilapo ca kuti, Lesa alipata ulufyengo; ica bubili, alomfwila uluse abantu aba kaele abo bafyenga. Lesa tayaluka. (Malaki 3:6) Alilaya ukuti nomba line ali no kufumyapo ulufyengo na bantu bonse aba lufyengo. (Amapinda 2:21, 22) Bushe te kuti mutemwe ukusambilila na fimbi pali Lesa ‘uwatemwa umulinganya’ ne fyo mwingapalama kuli ena?—Amalumbo 37:28.

Amalembo ya kubelenga mu August:

◼ Esekiele 21-38

[Amashiwi pe bula 27]

Yehova alilandile mu kulungatika ukuti intungulushi tashilingile ukubomfya amaka bubi bubi