Palameni Kuli Lesa

“Inko Shikeshiba Ukuti Nine Yehova”

BUSHE kuti mwaumfwa shani nga ca kutila bamubepeshe umulandu uo mushacitile? Kabili kuti mwaumfwa shani nga ca kutila umulandu bamubepeshe walilenga abantu abengi ukucula, ukubikako fye na bantu aba kaele? Ukwabula no kutwishika kuti mwafwaya ukucitapo fimo pa kutila umuseebanya ufume pe shina lyenu! Bushe mwalishiba ukuti Yehova na o balimubepesha ubufi ubwapala ubu? Abantu abengi muno nshiku balabepesha Lesa ukuti e walenga ulufyengo no kucula ifyaba muli cino calo. Bushe Yehova alafwaya ukufumyapo umuseebanya pe shina lyakwe? Ee alafwaya! Tontonkanyeni pa fyalembwa mwi buuku lya kwa Esekiele.—Belengeni Esekiele 39:7.

Yehova atile: “Nshakaleke bakaseebanye ishina lyandi ilya mushilo na kabili.” Abantu nga balepeela Lesa umulandu wa kuti e walenga kube ulufyengo, ninshi baleseebanya ishina lyakwe. Baliseebanya shani? Muli Baibolo, ilingi line ishiwi lya kuti “ishina” lipilibula ifyo umuntu aishibikwa. Icitabo cimo citila ishina lya kwa Lesa lilosha ku fyo “aishibikwa, e kutila, ifyo aisokolola; na kabili lilosha ku fyo alumbuka, e lyo na ku fyo acindama.” Mwi shina lya kuti Yehova musansha ne fyo aishibikwa. Bushe Yehova amona shani ulufyengo? Alilupata! Na kabili alomfwila uluse abo bafyenga. * (Ukufuma 22:22-24) Abantu nga balelanda ukuti Lesa e walenga ukuti ifyabipa filecitika, filya fine atila alifipata, ninshi balemonawila ishina. Na kabili ninshi ‘balesaalula ishina lyakwe.’—Amalumbo 74:10.

Nga namumona, Yehova alandile amashiwi ya kuti “ishina lyandi ilya mushilo” imiku ibili. (Icikomo 7) Muli Baibolo, ilingi ishina lya kuti Yehova lyendela pamo na mashiwi ya kuti “bumushilo” na “uwa mushilo.” Ishiwi lya kuti “uwa mushilo” lipilibula ukupaatulwa; lipilibula no kuti ubusaka no kusanguluka. Ishina lya kwa Lesa ilya kuti Yehova lya mushilo pantu umwine wa ili shina wa mushilo, alipaatukako ku lubembu na kuli conse icakowela. Bushe mwamona umulandu twingasosela ukuti abantu abatila Yehova e walenga ububifi pano calo balaseebanya sana ‘ishina lyakwe ilya mushilo’?

Ilyashi ilikalamba ilyo Baibolo ilandapo sana lya kuti Yehova afwaya ukufumya umuseebanya uwaba pe shina lyakwe. Pa kucita ifi akabomfya Ubufumu bwakwe. Ili lyashi lyalilandwapo sana mwi buuku lya kwa Esekiele umo balandapo imiku iingi ukuti “ne nko shikeshiba ukuti nine Yehova.” (Esekiele 36:23; 37:28; 38:23; 39:7) Nga namumona, inko tashakasalepo ishiine ukwishiba Yehova nelyo ukukanamwishiba. Lelo “shikeshiba” ukuti ni Yehova. Mu nshila imbi kuti twatila Yehova akacitapo fimo ifikalenga inko pano calo ukwishiba ukuti ni Yehova, Shikulu Mulopwe nga filya fine umwine alanda ukuti e fyo aba, uo ishina lyakwe limininako fyonse ifya mushilo, ifyasanguluka kabili ifya busaka.

Amashiwi ayo Yehova alandapo mu kubwekeshabwekeshapo aya kuti “ne nko shikeshiba ukuti nine Yehova,” yaba ni mbila nsuma kuli bonse abafwaya ukuti ulufyengo no kucula fikapwe. Nomba line, ifi Yehova alandile fili no kucitika kabili ali no kufumyapo umuseebanya onse pe shina lyakwe. Akafumyapo ububifi na bonse abacita ifyabipa, lelo akapususha bonse abaishiba ishina lyakwe, abalicindika, kabili abaishiba no mo lyalola. (Amapinda 18:10) Bushe te kuti mutemwe ukusambilila ifyo mwingapalama kuli Yehova, Lesa wa mushilo, ‘uwatemwa umulinganya’?—Amalumbo 37:9-11, 28.

Amalembo ya kubelenga mu September:

◼ Esekiele 39-48–Daniele 1-3

[Futunoti]