Nomba Nalishiba Lesa uo Mpepa

Abashimika ili lyashi ni ba Marieta Manuel Bacudio

Bushiku bumo shimapepo uwa ku Pentekoste uo baleti alikwete amaka ya kundapa, alitutandalile. Ilyo anjikete, naliponene pa nshi no kufwa icipuupu. Naliwililwe no mupashi. Ilyo naishilepuupuutuka, natendeke ukumfwa kwati ninkwata amaka ayo nalefwaya ukukwata, amaka ya kundapa. Cali shani pa kuti ica musango uyu cincitikile, kabili cakumine shani ubumi bwandi? Ilyo nshilamweba icacitike, lekeni nondolole ifyo nakulile.

NAFYELWE pa 10 December, mu 1968 mwi tauni lya Ilocos Norte ku Philippines. Nine mwana walenga 7 mu lupwa umwaba abana 10. Filya fine caba ku ba Filipino abengi, na ifwe bene twakuulile mu Katolika. Napwishishe isukulu lya ku sekondari mu 1986 kabili nalefwaya sana ukuba nasi. Lelo, ifi te fyo caishileba pantu nalishilelwala ubulwele ubwabipisha. Nalemona fye kwati nshakapusuke. Pa mulandu wa kulwala, natampile ukulomba kuli Lesa ukuti nga napola, nkalamubombela ubumi bwandi bonse.

Pa numa ya nshita iikalamba, nalipolele kabili naibukishe ifyo nalaile Lesa. E ico, mu June 1991, natampile ukusambilila pa sukulu lya ba Pentekoste apo basambilisha ifya mapepo. Pa fyo baletusambilisha pali ne fya kucita pa kukwata “umupashi wa mushilo.” Nalefwaisha ukukwata amaka ya kundapa. Ku sukulu baletusambilisha ati kuti wakwata amaka ya kundapa nga ulepepa sana no kuleka ukulya. Bushiku bumo, pa kulanga ukuti nalikwete ica “bupe ca kuposha,” mu bumfisolo naile mu kona no kulakutika uko umo uo twalesambilila nankwe alepepa. Ilyo ali mupepi no kupwisha ipepo lyakwe, nalibwelelemo bwangu bwangu no kusunsumana apo nalepepela. Pa numa, nalimwebele fyonse ifyo alelomba mwi pepo, kabili ici calengele asumine ukuti nomba nalikwete umupashi wa mushilo!

Lintu nali pa sukulu lya fya bupasta, nalikwete amepusho ayengi. Ku ca kumwenako, pali Mateo 6:9, Baibolo ilanda pali “Shifwe” na pe “shina” lyakwe. Naleipusha amepusho pamo nga, “Ni Shifwe nshi uo Yesu alandilepo?” kabili “Lishina lya kwa nani ilifwile ukuba ilya mushilo?” Amasuko ya bakafundisha besu tayaleumfwika kabili naleyatwishika. Baleti muli Lesa umo mwaba abene batatu abo ushingeshiba bwino. Ici cisambilisho calemfulunganya sana. Na lyo line, nalikonkenyepo fye ukusambilila ifya bupasta.

Ifyo Naishibe Inte sha kwa Yehova

Kwi sukulu lya bapasta, batusambilishe ukuti Inte sha kwa Yehova e mipepele ya bufi sana. Na kabili baleti ba Nte tabasumina ukuti Yesu e Kristu. Natendeke ukumona ukuti iyi mipepele ya makankamike.

Ilyo twali pa kutuusha mu mwaka wa bubili uwa kusambilila ifya bupasta, naile ku ng’anda mu kumonako abafyashi bandi. Ba Carmen, abakalamba bandi abanakashi, na bo balishile ilyo baumfwile ukuti ninjisa mu kutandalila abafyashi. Pali iyi nshita ba Carmen bali Inte ya kwa Yehova iyabatishiwa, kabili balepoosa  inshita iikulu mu kushimikila imbila nsuma. Ilyo bafwaile ukunsambilisha pali Lesa, nalibaswike mu bukali, nati: “Nalishiba kale Lesa uo mpepa!” Nalibasaalwile, kabili nshatalile mbasuminishapo ukulanda na ine pa fya kwa Lesa.

Ilyo nabwelelemo ku sukulu, ba Carmen bantumiine broshuwa ya Bushe Ulingile Ukusumina Muli Bulesa Butatu? * Apo pene fye nali-ifungenye no kuyoca. Pali iyi nshita ninshi ncili nimbafulilwa.

Natendeka Ukupepesha

Ilyo natwalilile na masambililo ya fya bupasta, nalyalwile bamo ukuba ba Pentekoste. Nalitemenwe sana ilyo bamayo no mukalamba wandi umwaume baishiletendeka ukupepa na ine ku Pentekoste.

Mu March 1994, e lyo napwishishe amasambililo ya bupasta pe sukulu lya ba Pentekoste. Nga fintu nandile kale, kwali shimapepo watutandalile. Bonse fwe balepwisha amasambililo twalefwaisha ukuba nankwe pantu twalicetekele ukuti aali na maka ya kundapa. Twali nankwe pa cisebele, uku ninshi tuletoloka no kutoota ukukonka mu nyimbo isho ibumba lya bakalisha wa filimba balelisha. Lyena onse uo aikata alepona pa nshi, kwati awilwa no mupashi. * Ilyo anjikete, na ine naliponene pa nshi no kufwa icipuupu. Ilyo napuupuutwike, nalitiinine, lelo natendeke ukumfwa ukuti nomba ninkwata amaka ya kundapa, e co nalitemenwe sana.

Tapakokwele, nabomfeshe amaka aya yene ku kundapa umwana uwalekaba sana umubili. Ilyo namupepelele, ilyo line fye umwana atendeke ukupiba kabili alipolele. Nomba naishileishiba ukutila kuti nafikilisha ifyo nalaile Lesa. Na lyo line, nshaleyumfwa uwa nsansa. Kwena, mu mutima naishibe ukuti kwaba Lesa umo fye, lelo nshamwishibe bwino. Na kabili naletwishika ifisambilisho ifingi ifya mu calici.

Ifyalengele Ukuti Njaluke

Pa mulandu ne fyacitike, ulupato nakwatile ba Nte lwalikuliileko. Nga nasanga fye ifitabo fya ba Nte, naleoca. Lyena icintu cimo ico nshale-enekela calicitike. Nalipapile sana ukuti bamayo balefwaya ukuleka ukupepa ku Pentekoste. Ba Carmen balesambilila Baibolo na bamayo! Nalifuliilwe sana ba Carmen.

Lyena nasangile magazini ya Loleni! ku ng’anda kuli bamayo. Nga ni kale nga naliyocele. Lelo apo nalefwaisha ukwishiba ifyo balebelenga, natendeke ukumona ifyalimo. Naishilemona icipande icalelanda pa muntu uwacetekele sana ifyo balesambilila ku calici ku mwabo. Lelo, ilyo atendeke ukubelenga Baibolo ne fitabo fyalemba Inte sha kwa Yehova, aishileishiba no kusumina ukuti Baibolo taisambilisha ukuti muli Lesa umo mwaba abene batatu, taisambilisha ukuti kwaliba umulilo wa pe, no kuti umweo taufwa. Ala ifi fyebo fyalimfikile pa mutima! Ifi fine fyalembelwe muli ici cipande e fyo na ine nalefwaya ukwishiba. Ukufuma apo nabelengele cilya cipande, nalefwaisha ukumfwikisha icine icaba mu Baibolo.

Pa numa ya kubelenga ilyashi na limbi muli magazini ya Loleni! ilyalelanda pa fyo  ukusambilila Baibolo kwalengele umuntu uwakunkwime ku bwalwa na ku miti ikola ukwaluka, natendeke ukubelenga sana ifitabo fya ba Nte. Muli broshuwa itila Ishina lya Bulesa Ilikatwalilila Kuli Pe na Pe, e mo nabelengele ukuti ishina lya kwa Lesa ni Yehova. * Nalitemenwe sana ukwishiba icine pali Lesa wa cine!—Amalango 4:39; Yeremia 10:10.

Nalikonkenyepo ukubelenga mu bumfisolo kabili nalisambilile ifingi ifyo Baibolo isambilisha. Ku ca kumwenako, ku sukulu lya ba Pentekoste bansambilishe ukuti Yesu ni Lesa, lelo nomba nalisambilila muli Baibolo ukuti “Mwana wa kwa Lesa wa mweo.”—Mateo 16:15, 16.

Na-aluka

Ilyo naishilemonana na ba Carmen na kabili, balipapile sana lintu nabalombele broshuwa itila Ishina lya Bulesa Ilikatwalilila Kuli Pe na Pe, e lyo ne fitabo fimbi ifya ba Nte. Nangu ca kuti nalipoosele imyaka iingi pa sukulu lya ba Pentekoste, nshasambilile icine nangu panono. Icine nalesambilila mu Baibolo canengele ukuba ne nsansa icine cine. Amashiwi ya kwa Yesu aya kuti: “Mukeshiba icine, ne cine cikamulenga ukuba abantungwa,” yalimfikile sana pa mutima. (Yohane 8:32) Ifyo nasambilile e fyalengele ukuti ntendeke ukwaluka.

Lelo, nalemona kwati kuti napepa Yehova mu bumfisolo e lyo pa nshita imo ine no kulapepesha ku Pentekoste. Nomba tapakokwele, nalilekele ukusambilisha ifisumino ifingi ifye calici lya Pentekoste. Na lyo line, nalesakamana. Nga ca kuti nalilekele ukusambilisha mu calici, ni kwi nali no kulafumya indalama sha kuliilamo? Bushe aba mu calici bali no kumfwa shani nga baishibe ukuti kasambilisha wabo nomba ni Nte ya kwa Yehova? Mwandini cali no kuleta umuseebanya! E ico, nalitwalilile no mulimo wandi uwa kusambilisha mu calici, lelo pa kusambilisha nalesengauka ifisumino fya bufi ifye calici.

Ilyo naishilemonana na ba Carmen na kabili, banjipwishe nga kuti natemwa ukutendeka ukulongana na ba Nte. Apo ilingi line naleya ku Musumba wa Laoag, ukwabelele icalici lyesu ilikalamba, mu bumfisolo natendeke ukufwaya ukwabela Ing’anda ya Bufumu iya Nte sha kwa Yehova. Kulya e ko naishileishibana na ba Alma Preciosa Villarin, abalepoosa inshita iikalamba mu kushimikila. Abengi balebeta fye ati “Precious.” Nangu ca kuti na pali iyi yine inshita nalipatile ba Nte, nalisumine ukuti ba Precious batendeke ukunsambilisha Baibolo.

Ba Carmen balintekanishishe sana pa kunsambilisha icine ca mu Baibolo. Ifi fine e fyo na ba Precious baali. Balingafwile sana ukumfwikisha Baibolo, nangu ca kuti limo nalekalipa, nalekansana na bo e lyo limo nalepampamina fye pa fyo naishibe. Pa kulanda nalesansula ishiwi. Imibele ya ba Precious ne ya ba Nte bambi  pamo nga ukuicefya, ukufuuka, e lyo ne fyo bantemenwe fyalimfikile pa mutima. Fyonse ifi fyalengele mfwaishe ukulapepa Yehova.

Mu July 1995, naishilemona ukuti pa kusekesha Lesa nalingile fye ukuleka umulimo wa kupepesha mu calici. Mulandu nshi? Pa Ukusokolola 18:4, Baibolo yabomfya amashiwi ya mampalanya ilyo ilanda pa mipepele ya bufi, itila: “Fumenimo muli ena, mwe bantu bandi, nga tamulefwaya ukuwila mu membu shakwe, kabili nga tamulefwaya ifinkunka fyakwe ukwisa pali imwe.” Nomba nali no kulafumya kwisa indalama sha kuliilamo? Pa AbaHebere 13:5 nasambilile ukuti nga ndecita ifyo Lesa afwaya, Lesa alaya ukuti: “Nshakakushe nakalya nangu ukukulekelesha nakalya.”

Nangu ca kuti batata na bakalamba bandi abaume tabalefwaya nangu panono ukuti mbe Nte, imilungu ibili ilyo nshilabatishiwa, nalishipile kabili naile ku ng’anda no kuyaoca fyonse ifyo nalebomfya mu mulimo wa bupasta. Pa numa ya koca fyonse ifi, nailwike ukuti amaka yonse aya kundapa ayo nakwete nomba yapwa. Akale, nga ninsendama, naleumfwa kwati kuli icintu cimo icilentintikisha pa nshi. Nomba fyonse ifi fyalilekele. Icinshingwa ico nalemona pa windo, naco calilekele ukumoneka. Ilyo nalesambilila Baibolo, naishileishiba ukuti muno nshiku, amaka ya kundapa tayafuma kuli Lesa lelo yafuma ku fibanda. Naliba ne nsansa ukuti nomba nshitungululwa ne fibanda. Ndomfwa bwino kwati ni filya fyaumfwile umukashana uo baundepe kuli Paulo “uwali no mupashi wa kubuka.”—Imilimo 16:16-18.

Ala mwandini nalitemenwe ilyo ine na bamayo twabatishiwilwe pamo mu September 1996! Pa numa fye ya kubatishiwa, natendeke ukupoosa inshita iikalamba mu mulimo wa kushimikila imbila nsuma, umulimo uo natemwa ukubomba pa myaka iingi.

Pali ino nshita nalyupwa kuli ba Silver. Tulabombela pamo nabo ukusambilisha umwana wesu umukashana icine ica mu Baibolo. Bandume yandi na bankashi nandi bamo balitampa ukubombela Yehova pamo na ifwe. Nangu ca kuti ndalanguluka sana ukuti pa myaka iingi nshaishibe Lesa bwino bwino, pali ino nshita naliba ne nsansa ukuti nomba nalishiba Lesa uo mpepa.

[Amafutunoti]

[Amashiwi pe bula 13]

Nabomfeshe amaka aya yene ku kundapa umwana uwalekaba sana umubili

[Amashiwi pe bula 14]

Ifyo nasambilile e fyalengele ukuti ntendeke ukwaluka

[Amashiwi pe bula 15]

Nalitemenwe sana ukwishiba icine pali Lesa wa cine!

[Icikope pe bula 13]

Napwisha amasambililo ya bu pasta

[Icikope pa mabula 14 na 15]

Ba Precious e balensambilisha Baibolo

[Icikope pe bula 15]

Ine na bamayo twabatishiwa

[Icikope pe bula 15]

Momba umulimo wa kushimikila imbila nsuma inshita iikalamba

[Icikope pe bula 15]

Ine na bena mwandi, umwana wesu, na balupwa lwandi abatendeka ukupepa Yehova