Kalata Ukufuma ku Greece

Ukushimikila ku Kapinda ka ku Kulyo aka ku Bulaya

ILYO ubwato twanininemo bwalelungama ku ncende iyabatama iyaba pali bemba wa Meditererranean, twalemona uko ulupili ulusuma nga nshi ulwa Levká ulwaba pa cishi ca Crete lwaleya lulemoneka fye akashiminina. Bonse fwe bali mu bwato twali 13 kabili twalefwaisha sana ukuya mu kushimikila pa cishi ca Gavdos. Ici icishi icabela ku kapinda ka ku kulyo aka ku Bulaya pali mapu cimoneka fye kwati kalitoni.

Apo cali ni mu lusuba ninshi no kukaba na kukaba, bonse twamwene ukuti nangu cibe shani twalaenda fye bwino. Lelo tapapitile nshita kwaishile icipuupu ca mwela icatendeke ukusunkanya ubwato. Nalisakamikwe nga nshi, ica kuti naibukishe ne lyashi lya mu Baibolo ililanda pa fyo umwela wa cipuupu wasendele ubwato umo umutumwa Paulo aninine. Ici cacitike kale sana ilyo icishi ca Gavdos balecita ati Kauda. (Imilimo 27:13-17) Na lyo line, nalicetekele ukuti nangu cibe shani twali no kufika fye bwino ku Gavdos.

Awe twasukile twafika pa cishi ca Gavdos, apaba sana ifimabwe ifyashinta na muli bemba. Pali ici icishi icabatama kabili icasansuka amamita 300, tapaba impili shine shine. Paba fye imiti ya milemu iingi ne fimpusa. Mu ncende shimo imiti ya mikupri yalifika na mu lulamba lwa bemba.

Pa nshita imo pali ici icishi paleikala abantu nalimo 8,000. Pali lelo abantu abekalapo tabafika na 40. Pa cishi ca Gavdos tapalaba ubuyantanshi. Nangu ca kuti amato ayakalamba ayasenda ifintu yalapita kuli iyi ncende, te lingi aya mato yafika ku Crete pa mulandu wa kuti imiceele ilalenga amato ukucelwa ukufika nelyo ukufilwa ukufikako.

Twaishile kuno ku Gavdos ku kulanda na bantu pa lyashi ilisuma nga nshi pa fyo tukekala bwino ku ntanshi ne fyo tukakwata ubumi bwa muyayaya. Ilyo ubwato bwesu bwali mupepi no kufika, twalefwaisha ukuyashimikila iyi mbila nsuma ku bantu.

Pa mulandu ne cikuuku ca mwela icali pali bemba pa ma-awala yane na hafu, ulwendo lwesu lwalyafishe sana ica kuti ilyo twafikile calemoneka fye ukuti natunaka. Lelo pa numa ya kulaalako panono no kunwako kofi, twalyumfwileko bwino. Twabelengele ilyashi lya mu Baibolo ililanda pa lwendo lwa mutumwa Paulo, twalipepele, e lyo twatendeke no kushimikila.

 Abena Gavdos ba nsansa kabili balapokelela abeni. Balitupokelele mu mayanda yabo no kutupeelako ifya kulya. Tatwabashimikile fye imbila nsuma lelo twalibafwileko utumilimo tumo tumo pa kulanga ukuti twalitashishe pa fyo batupokelele. Ilyo twalelanshanya no mwanakashi pa cifulo acitila amakwebo yakwe, munyinefwe umo uwaishiba ifya malaiti amwene icipe cimo icaonaike no kumulungishishako. Umwanakashi alitemenwe sana, alisumine ukupoka impapulo kabili alitutashishe na pa mulimo wesu uwa kushimikila imbila nsuma. Umwanakashi na umbi alitashishe ica kuti atile, “Lesa e umitumine ukubomba uyu mulimo te bantu iyo, pantu namwisa mu kutushimikila kuli cino cishi icaba ukutali.”

Abantu balitemenwe sana impapulo shilanda pali Baibolo isho twabatwaliile. Umwaume umo alipokele Ulupungu lwa kwa Kalinda na Loleni! kabili alombele impapulo na shimbi isha kubelenga mu nshita ya mpepo. Umwaume na umbi alombele ukuti tumupeele impapulo na shimbi isha kubika mwi tuuka lyakwe pa kuti abaleisa mu kushita balebelengamo. Alitupeele adresi yakwe pa kuti tulemutuminako magazini cila mweshi. Aba mu lupwa lumo balitemenwe nga nshi ilyo baishibe ukuti icishi bekalapo balicilandapo na muli Baibolo. Na bo bene balipokeleko magazini.

Nangu ca kuti twalitemenwe ifyo abantu bayankwileko ku mbila nsuma, bamo pali ifwe twalyumfwile ubulanda ilyo twaibukishe ifyacitike kale pali ici icishi ca Gavdos. Pa Cinshoko ca Sarakínico, pali icikuulwa umo abantu abakwete imilandu ku buteko babutukiile. Ba Emmanuel Lionoudakis, Inte ya kwa Yehova, nabo bene balibatwele kuli ici cikuulwa ku kupwa kwa ba 1930 pa mulandu wa kushimikila. * Icishi ca Gavdos bacilondolola ukuti pali ilya nshita cali kwati ‘pali bakaling’ongo abakalipisha, pantu abantu abengi . . . balefwa ku nsala, balecula sana e lyo bambi balefwa na ku malwele. Te kuti tupape umulandu ici cishi balecitila ukuti cishi ca mfwa.’ Ba Lionoudakis balelya fye isabi ilyo baleloba, kabili apo e bali fye ba Nte beka, baleshimikila na ku bafungwa bambi. Ilyo umwana wabo umwanakashi no mwina mwakwe e lyo no mwishikulu wabo, bamwene icikuulwa umo ba Lionoudakis baikele apapitile nalimo imyaka 70, balyumfwile ubulanda nga nshi. Ica kumwenako ca ba Lionoudakis cilatusambilisha ukuti tulingile ukutwalilila aba cishinka no kulashimikila lyonse.

Gavdos cali cishi icabipa sana kuli balya basungile bunkole. Lelo ifwe, twalitemenwe sana ukushimikila pa cishi conse. Mu nshiku fye shibili, twashalike magazini 46 na ma broshuwa 9. Tulafwaisha sana ukuyamona ifibusa fyesu na kabili!

Ala kwaliweme sana ica kuti twamwene kwati inshita ya kubwelelamo yalifikile bwangu! Nalyo line twalingile ukubwelelamo. Lelo, imiceele yalibipile ica kuti twalifililwe ukwima pa 17:00 hrs. Twaimine pa kati ka bushiku no kutendeka ukupekanya ubulendo na bumbi ubwayafya. Twasukile twaima pa 3 koloko ya ku maca, kabili pa numa ya kwenda pa mumana apali sana icimwela pa ma-awala nalimo 5, twafikile ku Crete. Ilyo twafumine mu bwato, twalinakile icibi ica kuti twaleikula fye pa kwenda, lelo twali ne nsansa pantu twalilengele ishina lya kwa Lesa ukwishibikwa pa cishi ca Gavdos. (Esaya 42:12) Bonse abo twali nabo batile ala caliweme ukuti twaliile ku Gavdos. Tukalaba ifyo twaculile pali ulu lwendo, lelo tatwakatale atulaba ifisuma ifyacitike.

[Futunoti]

[Icikope pe bula 24]

Trypití Cape, iyabela ku kapinda ka ku kulyo aka ku Bulaya

[Icikope pe bula 25]

Icinshoko ca Sarakínico, apali icikuulwa ne cipampa apo balembele abaikele muli ici cikuulwa

[Abatusuminishe Ukubomfya Icikope pe bula 25]

Courtesy of Hellenic Post