Amafisakanwa Yakapwa!

“Lolela Yehova no kusunga inshila yakwe . . . Ilyo ababifi bakalofiwa, ukamonako.”—AMALUMBO 37:34.

BUSHE na imwe, mumona ukuti amafisakanwa tayakabale ayapwa? Abengi e fyo batontonkanya. Ukutula fye na kale, abantu balyesha imitekele yalekanalekana. Na lyo line balifilwa ukupwisha amafisakanwa. Bushe kukabako inshita ilyo abantu bonse bakaba abacishinka?

Icawama ca kuti Baibolo ilanda ukuti kukaba inshita ilyo abantu bonse bakaba abacishinka. Itwebo kuti nomba line fye Lesa akafumyapo amafisakanwa. Akacita shani ifyo? Akabomfya Ubufumu bwakwe ubwa mu muulu. Pali Mateo 6:10, Yesu atile: “Ubufumu bwenu bwise. Ukufwaya kwenu kucitwe pano isonde nga mu muulu.”

Baibolo ilanda pali Yesu Kristu, Kateka wa ubu Bufumu ukuti: “Akapususha umulanda uulekuuta mutuule, No wacula na onse uushakwata wa kumwafwa. Akomfwila ubulanda umulanda no mupiina, Kabili akapususha imyeo ya bapiina. Akalubula imyeo yabo ukufuma ku ba mutitikisha na ku ba bunkalwe.” (Amalumbo 72:12-14) Moneni  ukuti pano Baibolo yatila Yesu akalangulukilako bonse abo bacusha pa mulandu wa mafisakanwa kabili ali no kucitapo cimo pa mutitikisha! Bushe tamusansamwike pa kumfwa aya mashiwi?

Ilyo iyi Mfumu ya maka kabili iya luse ikalateka, Ubufumu bwa kwa Lesa bukafumyapo amafisakanwa pano calo. Bukayafumyapo shani? Ni pa kufumyapo ifintu fitatu ifyalenga kube amafisakanwa.

Ulubembu

Ino nshita bonse tulashomboka no lubembu ululenga tulefwaisha fye ukucita ifingatuwamina. (Abena Roma 7:21-23) Na lyo line kwaliba abantu abafwaya ukucita icisuma. Balicetekela mu mulopa we lambo lya cilubula ilya kwa Yesu kabili imembu shabo shile-elelwa. * (1 Yohane 1:7, 9) Abantu ba musango uyu bakaba ne shuko lya kunonkelamo mu fyo Lesa alangile ukutemwa kwakwe ukukalamba nga fintu tubelenga pali Yohane 3:16. Patila: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”

Lesa ali no kucitila abantu bacishinka icintu icisuma sana. Mu calo cipya, Lesa akafumyapo fyonse ificitika pa mulandu wa lubembu kabili panono panono abantunse abacishinka bakafika ku kupwililika kabili bakaba abalungama. (Esaya 26:9; 2 Petro 3:13) Ulubembu talwakalenge abantu ukucita amafisakanwa na kabili. Mu Bufumu bwa kwa Lesa, abantu bacishinka bakalubuka ku busha bwa kubola.

Icalo Twikalamo

Ku ca bulanda muno nshiku abantu abengi balacusha abanabo ku mufulo fye. Balacusha abalanda na bapiina kabili balatunka na bantu bambi ukucita cimo cine. Baibolo ilakoselesha abantu ba musango uyu ukuti: “Lekeni umubifi aleke inshila shakwe, no mubi aleke ukutontonkanya kwakwe.” Nga ca kuti abantu ba musango uyu balapila, Baibolo yalaya ukuti Lesa ‘akabelela nga nshi.’—Esaya 55:7.

Lelo nga ca kuti abantu ba musango uyu bakaana ukwaluka ku mufulo fye, Lesa akabakanda. Ukupitila mu Bufumu bwa kwa Lesa, ifyo Baibolo yalaya fikafikilishiwa. Itila: “Lolela Yehova no kusunga inshila yakwe . . . Ilyo ababifi bakalofiwa, ukamonako.” * (Amalumbo 37:34) Ilyo ababifi bashifwaya ukwaluka bakalofiwa, bakapepa bacishinka aba kwa Lesa tabakabale abacula ku mafisakanwa.

Satana Kaseebanya

Satana Kaseebanya e mubembu wakamamo na menshi. Icawama ca kutila nomba line Yehova akalesha Satana ukutunka abantu ukucita ifyabipa. Kabili mu kupelako, Lesa akonaula Satana Kaseebanya. Ici cishimweshimwe tacakabale acikwata amaka ya kutunka abantunse ukulacita amafisakanwa.

Lelo, abantu bamo bamona kwati ukulanda ukuti Lesa akafumyapo fyonse ifilenga abantu ukulacita amafisakanwa, malandakanwa fye. Napamo kuti mwaipusha ukuti, ‘Bushe cine cine Lesa alikwata amaka ya kufumyapo ifi fintu? Nga alikwata, mulandu nshi tafifumishapo palya ponse?’ Ukwipusha ifi caliba fye bwino, kabili Baibolo ilasuka bwino aya mepusho. * Tulemulomba ukuimwena mwe bene ifyo Baibolo isambilisha pa fyo inshita ya ku ntanshi ikaba, ilyo amafisakanwa yonse yakapwa.

[Amafutunoti]