Ifyo Icebo ca kwa Lesa Ica Maka Ca-afwile Ulupwa lwa BaHindu

Abashimika ili lyashi ni ba Nalini Govindsamy

NSHAKATALELABA ubushiku bwa pali Cimo ulucelo pa 22 August, 2005 ilyo ulupwa lwesu lonse lwalongene pamo ku kulya ica kulya ca lucelo. Apo balinsangile na kansa ya kuli bongobongo, namwene fye kwati nshakapusuke. Ilyo abena mwandi ba Krishna bapepele, nalyebele balupwa lwandi ifyo nalefwaya ukubeba.

Nabebele nati: “Ndi no kukwata opareshoni iikalamba sana kabili nshishibe nga nkapusuka, e co mufwile ukwenekela icili conse. Nga ca kuti nafwa, nimpekanya ifyo icililo candi cifwile ukuba. Ndelomba mwe bapepa Yehova ukuti mukatwalilile fye ukumupepa. E lyo na imwe bambi mukatendeke ukusambilila Baibolo no kulapepa ne Nte sha kwa Yehova. Nga mwacita ifi, ninshi na imwe mukaba ne subilo ilyo ababomfi ba kwa Lesa abacishinka bakwata ilya kuba no bumi busuma muli paradise pe sonde ku ciyayaya.”

Ilyo nshilalondolola ifyo cali pa numa ya opareshoni, lekeni nondolole ifyo nakulile e lyo ne fyo naishileishiba Lesa wa cine.

Nali UmuHindu

Twaleikala mu ng’anda iikalamba iyapangilwe ne mbao e lyo na malata. Yakuulilwe pa muulu wa lupili mu musumba wa Durban, ku South Africa. Pa kufika pa geti ya malata iyali ku ntanshi ya ng’anda yesu, twaletala twaninika amastepu 125 ukufuma mu musebo ukalamba e lyo twapita mu kashila katondo. Ku lubali lumo ulwa geti kwali itempele lya bamama umwaiswile ifikope ne filubi fya balesa ba baHindu. Bamama balenjeba ukuti uli “mwana wa pe tempele” (e kuti mandir kī baccā, mu ciHindi) no kuti balesa twalepepa e balengele ukuti mfyalwe. Ku lubali lumbi ulwa geti e kwali amastepu ayengi ayaile ku mwinshi wa ng’anda uwa ku ntanshi. Ing’anda twaleikalamo yali iikalamba kabili yali na paseji iikulu e lyo na kicini iikulu umwali ne citofu ca malasha. Yakwete imiputule ya kusendamamo 7 e lyo no muputule umbi pa nse uwasuntinkene ku ng’anda. Muli iyi ng’anda twaleikalamo abantu 27, bashikulu na bamama, batata na baice babo batatu abaume, na baice babo abanakashi bamo e lyo ne ndupwa shabo.

Tacayangwike ukusakamana ulupwa lwakula ifi. Lelo ukwikala abengi kwalengele ulupwa lwesu ukwikatana no kuba aba nsansa. Bamayo na bacufi banabo batatu baleafwana imilimo ya pa ng’anda pamo nga ukuwamya e lyo no kwipika. Bashikulu e baletungulula ulupwa kabili e baleshita ne fya kulya fya lupwa lonse. Cila mulungu pali Citatu, bashikulu na bamama baleya ku maliketi mu kushita inama, ifisabo e lyo ne misalu yalekanalekana ifya kulya umulungu onse. Twalitemenwe ukwikala mwi samba lya mulemu uwali pa lupili apo twalelolela bashikulu na bamama ukufuma ku maliketi. Nga twamona fye baikila muli basi nabasenda na ma basiketi, twalebakonkela ulubilo ukutentemuka amastepu 125 pa kuti twabafwako ukusenda ifyo bashitile.

Mwi bala lyesu mwali umuti wa kancindu uwali uutali umo ifyuni ifyo beta ati mynah fyalepangila ifinsa. Twalemona uko ifi fyuni fyaleangala muli ici cimuti kabili twaleumfwa ne congo fyalepanga. Bamama balitemenwe ukwikala pa mastepu ayali ku ntanshi ya ng’anda kabili baletushimikila amalyashi ayo balelanda kwati nabeshiba ifyo utuni twalepanga icongo  twalelanda. Ala twaleikala bwino kabili twali-ipakishe ukwikala pamo ngo lupwa pali ilya ng’anda! Twaleseka, twalelila, twaleangala, twalemwentula, kabili twaleakana ifintu. Ne cacilapo ukuwama ca kuti ni pali iyi yine ng’anda e po twaishibile Kabumba, Yehova, e lyo no Mwana wakwe, Yesu Kristu.

Ilyo tushilasambilila pali Yehova, twalekonka intambi ishingi isha mipepele ya ciHindu. Ilingi line twaleita abantu abengi ku kusefya ukukalamba uko bonse abalesangwako balepepa balesa balekanalekana. Limo nga kuli ukusefya kwa musango yu, bamama balemona ifimonwa no kulanshanya ne mipashi kabili pa kati ka bushiku, kwaleba ukupeela amalambo ya nama pa kuti basekeshe imipashi. Bashikulu na bo balishibikwe pantu baleafwilisha sana mu fya makuule e lyo ne fyalekabilwa mu masukulu na mu matempele ya baHindu.

Ifyo Twasambilile Icine Pali Yehova

Mu 1972, bashikulu balilwele kabili balifwile. Papitile fye imyeshi iinono, bacufi banabo ba bamayo ba Indervathey, abo twaleita ati ba Jane, balipokele magazini ya Ulupungu lwa kwa Kalinda na Loleni! kuli ba Nte babili. Balyumfwile ububi ukuti tababengishe mu ng’anda pa kuti balanshanye na bo. Lyonse ba Nte nga batutandalila twalebatamfya. Lelo ilyo babwelele, balibengishe mu ng’anda kabili balibebeleko no bwafya bakwete mu cupo pa mulandu wa kuti abalume balekolwa sana ubwalwa. Abena mupalamano e lyo na balupwa balebakoselesha ukuti balekane na batata mwaice. BaNte balibalondolwelele ifyo Lesa amona icupo. (Mateo 19:6) Bamayo ba Jane balitemenwe sana ifyo Baibolo ifunda ne fyo ilanda ukuti abantu bakekala bwino pano isonde. * Bapingwilepo ukukanalekana na batata mwaice kabili batendeke ukusambilila Baibolo lyonse ne Nte sha kwa Yehova. Nga balesambilila Baibolo na baNte mu muputule wa kutushishamo, bacufi banabo balekutika ku fyo balelanshanya ninshi bali mu miputule yabo.

Bamayo pamo na bacufi banabo bonse basukile batendeka ukusambilila Baibolo. Bamayo ba Jane baleshimikilako bambi ifyo balesambilila kabili balitemenwe ukutubelengela no kutulondolwela amalyashi ya mu citabo citila Ukukutika kuli Kasambilisha Mukalamba. * Ilyo abaice ba batata bonse baishibe ukuti abena mwabo balesambilila Baibolo, balitendeke ukutulesha ukusambilila. Batata mwaice bamo balyocele ifitabo fyonse ukusanshako fye na Baibolo. Nga twaya mu kupepa, baletucusha no kutushobaula. Ni batata fye e bashaletucusha no kutushobaula nangu fye ukutukanya ukusambilila pali Yehova. Bamayo pamo na bacufi banabo bonse balitwalilile ukulaya mu kupepa pamo ne Nte sha kwa Yehova kabili baile baletemenwako fye Yehova Lesa.

Mu 1974, bamayo ba Jane, balibatishiwe no kuba Inte ya kwa Yehova kabili tapakokwele bamayo pamo na bacufi banabo bambi balibatishiwe. Mu kupita kwa nshita bamama nabo balilekele imipepele ya ciHindu. Pa myaka iingi na ine nalekonka ku kulongana konse ukwa Nte sha kwa Yehova. Lyena pa kulongana kukalamba ukwa Nte sha kwa Yehova ba Shameela  Rampersad Inte ya kwa Yehova, balinjipwishe ukuti “Ni lilali ukabatishiwa?” Nabaswike nati, “Te kuti mbatishiwe pantu takwaba uunsambilisha Baibolo.” Banjebele ukuti bakulansambilisha. Pa 16 December, 1977 pa kulongana kukalamba ukwakonkelepo, nalibatishiwe. Pa bantu 27 aba mu lupwa lwesu abaleikala ing’anda imo, 18 e babatishiwa. Pa nshita naile ku opareshoni, ninshi batata bacili baHindu.

“Mwisakamikwa Nangu Kamo”

Amashiwi yaba pa Abena Filipi 4:6, 7 yalingafwa sana, maka maka ilyo bansangile na kansa kuli bongobongo. Yatila: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” Ala calyafya ‘ukukanasakamikwa,’ sana sana nga bakweba ukutila inshita iili yonse kuti wafwa! Ilyo banjebele ukuti nali na kansa nalelila fye, nangu cibe ifyo nalepepa kuli Yehova. Ukufuma fye ilya nshita, natendeke ukumfwa ukuti “umutende wa kwa Lesa uwacila amatontonkanyo yonse” wali na ine.

Cali kwati Yehova Lesa nanjikata ku kuboko kwandi ukwa ku kulyo kabili naleumfwa ukuti cine cine alengafwa. (Esaya 41:13) Yehova alingafwile ukuba uwakosa pa kulondolwela ababomfi bacipatala ifyo nalefwaisha ukukonka ifunde lya mu Baibolo ilya kutaluka ku mulopa. (Imilimo 15:28, 29) Ici calengele ukuti badokota basumine ukundepula ukwabula ukubomfya umulopa. Pa numa ya kundepula, badokota batile opareshoni yalyendele fye bwino kabili balifumishe na kansa yali kuli bongobongo. Badokota batile tababalile abamonapo umulwele uo bacitile opareshoni iikalamba iya kuli bongobongo uwapolele bwangu nga fintu cali kuli ine.

Ilyo papitile imilungu itatu, natendeke ukutungulula isambililo lya Baibolo ninshi ncili umulwele, ndala fye mu busanshi. Pa numa ya milungu 7 nalitendeke ukwensha motoka na kabili, naleya mu kushimikila kabili nalitendeke no kuya mu kupepa ne Nte sha kwa Yehova na kabili. Nalitashishe ifyo bamunyinefwe na bankashi ba mu cilonganino baIengafwa ukubomba umulimo wa kushimikila. Baleshininkisha ukuti nshaleba neka no kuti nimfika bwino ku ng’anda. Ukwabula no kutwishika icalengele ukuti mpole bwangu, kukutika ku malyashi ya mu Baibolo ayo bakopele e lyo no kutontonkanya pa busuma nasanga mu kwishiba Yehova.

Nalitemenwe ukuti pa numa ya kundepula, batata balisumine ukusambilila Baibolo ne Nte sha kwa Yehova. Babatishiwe ilyo bali ne myaka 73, ino nshita balabombesha mu mulimo wa kwa Yehova. Balupwa lwandi bambi 40 nabo balisa mu kupepa Yehova pamo na ifwe. Nangu ca kuti ilinso lyandi ilya ku kuso talyaba bwino kabili inshimbi e shaikatilila amafupa ya ku mutwe, ndafwaisha ukwisaikala mu paradaise pe sonde umo Yehova akalenga “ifintu fyonse ukuba ifipya.”—Ukusokolola 21:3-5.

Lesa alimpaala pa kumpeela abena mwandi abantemwa kabili ababomba bueluda mu cilonganino ca Bwina Kristu kabili nalikwata no mwana umukashana umusuma, ishina lyakwe ni Clerista. Clerista alantungilila sana ilyo ndetwalilila ukubomba umulimo wa kushimikila inshita iikalamba. Yehova Lesa alipaala sana umulimo wa kushimikila uo momba. Ukufika pali ino nshita nalyafwa abengi abo nasambilila na bo Baibolo ukumona ifyo Icebo ca kwa Lesa cakwata maka ya kwalula bumi bwabo. Pali aba, 30 bali-ipeela kuli Lesa kabili balibatishiwa.

Ndafwaisha ukwisamona uko Yehova akafumyapo ukucula muli cino calo cabipa no kutupeela paradaise pano isonde.

[Amafutunoti]

[Icikope pe bula 10]

Bamayo nabanjimya

[Icikope pe bula 10]

Ing’anda umo twaleikala

[Icikope pe bula 10]

Lwa mupepi na mastepu 125

[Icikope pe bula 11]

Ine na bena mwandi (ku kuso), umwana wandi umwanakashi, e lyo na bafyashi bandi