Insansa Ishaba mu Kupeela

“Mwaba insansa ishingi mu kupeela ukucila ishaba mu kupokelela.”—IMILIMO 20:35.

Umulandu bamo basefesha Krisimasi.

Nga fintu Yesu alandile, ukupeela kulalenga uulepeela e lyo no uulepokelela ukuba ne nsansa. Apo abantu balafwaya ukuba ne nsansa, abengi bamona kwati ukupeelana ifya bupe pa Krisimasi e cintu icacindama sana ico bafwaila ukusefesha Krisimasi. Nangu fye ni lintu kwali amafya ya fya ndalama mu calo conse uyu mwaka wapwile, abafwailisha basangile ukuti mu calo ca Ireland, cila ng’anda bale-enekela ukupoosa indalama ukucila pa madola ya ku America 660 (K3,300,000.00) ukushitamo ifya bupe fya pa Krisimasi.

Mulandu nshi ifyo bafwaya fishibombela?

Abengi basanga ukuti ukupeela ifya bupe pa Krisimasi takubalenga ukuba ne nsansa sana, lelo kubasakamika fye. Mulandu nshi twalandila ifi? Abengi abapeela ifya bupe pa Krisimasi balapatikishiwa ukushitila bambi ifya mutengo ifyo bashingakwanisha. Apo mu nshita ya Krisimasi abengi balashita sana ifintu, kanshi mu matuuka mulaba sana abantu ica kuti baleminina pa milongo pa nshita iitali, ne ci cilabakalifya.

Kufunda nshi ukwaba mu Baibolo ukwingabafwa?

Yesu atile, “mulepeela.” (Luka 6:38) Ilyo alandile aya mashiwi, tapilibwile ukuti abantu bafwile ukulapeelana fye ifya bupe pa nshita imo iya mwaka lintu abengi benekela ukulapeelana ifya bupe. Lelo, Yesu akoseleshe abasambi bakwe ukulapeelana ifya bupe pa nshita fye iili yonse kabili bafwile ukulacita ifyo lyonse.

“Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.” (2 Abena Korinti 9:7) Icitabo cimo icilanda pali Baibolo calandile ukuti, icishinka cili muli uku kufunda ca kuti, ‘umuntu tafwile ukupeela mu “kupatikishiwa,” tafwile ukulayumfwa ukuti bamupatikishe fye ukupeela.’ Umuntu “uupeela ne nsansa” tayumfwa ukuti afwile fye ukupeela ica bupe ku muntu pa nshita imo ine iya mwaka nga filya bapeelana ifya bupe pa Krisimasi.

“Pantu nga cine cine mulefwaya ukusangula, Lesa akapokelela ubupe bwenu nga mwapeela ukulingana na po mukwatile te pa fintu mushikwete.” (2 Abena Korinti 8:12) Lesa tafwaya Abena Kristu ukuibika mu nkongole pa kuti fye bashite ifya bupe ifya mutengo. Lelo umuntu nga apeela ‘ukulingana napo akwatiile,’ ubupe bwakwe tabuba fye ubwafye lelo Lesa ‘alabupokelela.’ Kanshi ifyo Baibolo yalanda fyalipusana sana ne filanda abasabankanya amakwebo mu nshita ya Krisimasi abatila, “kongoleni e lyo mukalipile pa numa!”