Ababelenga Ino Magazini Balepusha Ukuti . . .

Mulandu nshi bamo bashisefeshako Krisimasi?

▪ Mu calo conse abantu nalimo amabilioni yabili balasefya Krisimasi pa 25 December, cila mwaka. Bambi nabo 200 milioni balasefya ukufyalwa kwa kwa Yesu Kristu pa 7 January. Na lyo line, kwaliba abantu abengi na bambi abashisefyako Krisimasi. Cinshi bashisefeshako?

Ni co bamo tabaaba mu macalici ya batila Bena Kristu. Limbi kuti baYuda, baHindu nelyo baShinto e lyo ne filonganino fya mapepo fimbi. Bambi ni balya abashacindika Lesa e lyo bambi nabo batila takwaba Lesa, nelyo tabafwaya ukusumina ifyo abanabo basuminamo. Bambi basumina ukutila, kuti baikala fye bwino nangu tabalepepa. E lyo bambi bena bamona amalyashi ya pali Krisimasi ukuti ni nshimi fye.

Ku ca kupapusha abantu abengi abasumina muli Yesu, tabakonka ifyo abantu bacita mu nshita ya Krisimasi. Mulandu nshi? Kwaba imilandu 4 iyo bashicitila ifyo.

Ica kubalilapo, tabasumina ukuti Yesu afyelwe mu December nelyo mu January. Baibolo tailanda ubushiku ilyo Yesu afyelwe. Ilanda fye ukuti: “Kabili muli cilya calo cimo cine mwali bakacema abali mu mpanga balelonda ifitekwa fyabo ubushiku. Awe apo pene malaika wa kwa Yehova aiminine apo bali, . . . malaika atile kuli bena: ‘. . . Namufyalwa Umupusushi wenu, uyu e Kristu Shikulu.’”—Luka 2:8-11.

Ifishinka filanga ukuti Yesu afyelwe mu kubangilila kwa October pantu e lyo bakacema bengaba mu mpanga ubushiku ne fitekwa fyabo. Ku ncende shimo ku Betelehemu kulaba sana impepo mu December na mu January. Kanshi pa kuti ifinama fiba sana ne mpepo balefingishako umwakaba.

Icalenga bubili: Yesu aebele abasambi bakwe ukulaibukisha fye imfwa yakwe, tabebele ukulasefya ukufyalwa kwakwe, kabili ukwibukisha imfwa yakwe takwayafishe, bali no kulaibukisha ilyo baleliila pamo. (Luka 22:19, 20) Na kabili, amabuuku ayalanda pa Mbila Nsuma aya kwa Marko na Yohane tayalandapo nangu cimo pa kufyalwa kwa kwa Yesu.

Icalenga butatu: Takwaba ubushininkisho nangu bumo mu malyashi ya kale ubulanga ukuti Abena Kristu bakubalilapo balesefya ukufyalwa kwa kwa Kristu. Lelo baleibukisha fye imfwa yakwe. (1 Abena Korinti 11:23-26) Na kuba palipitile imyaka ukucila pali 300 ukutula apo Yesu afyalilwe ukufika pa nshita aba mu macalici ya batila Bena Kristu batendekele ukulasefya Krisimasi pa 25 December. Muli ba 1600, ing’anda ya mafunde yalibindile ukusefya Krisimasi mu England. Mu America namo Icilye ca ku Massachusetts na co calibindile ukusefya Krisimasi. Cinshi calengele? Icitabo ca The Battle for Christmas, citila: “Takwaba ifishinka muli Baibolo nangu mu malyashi ya kale ifilanda ukuti Yesu afyelwe pa 25 December.” Icitabo cimo cine citila, abaipeeleshe ku fya mapepo balemona, “Krisimasi ukuti mutebeto wa basenshi fye uo balesefya kwati nalimo wa Bena Kristu.”

Icalenga bune: Uko Krisimasi yafumine takwawama. Cimoneka kwati Krismasi yafumine ku mitebeto ya basenshi ba mu Roma iyo balesefya pa kucindika lesa wa bulimi Saturn e lyo na lesa wa kasuba Sol Invictus nelyo Mithra. Abasambilila sana pa mikalile ya bantu pamo nga Christian Rätsch na Claudia Müller-Ebeling abalembele icitabo icitila Pagan Christmas, batile: “Nga filya fine cali ku mitebeto ne fisumino ifingi ilyo takulaba Ubukristu, ukusefya kwa cila mwaka uko balesefya ukubwela kwa kasuba bakusangwile ukuba ukusefya kwa kufyalwa kwa kwa Kristu.”

Bushe nomba mwamona ico Abena Kristu ba cine bashisefeshako Krismasi?

[Amashiwi pe bula 10]

Yesu aebele abasambi bakwe ukulaibukisha fye imfwa yakwe, te kufyalwa kwakwe