BAIBOLO ILAALULA ABANTU

“Nalisuka Nasanga Ubuntungwa bwa Cine Cine”

Abashimika ili lyashi ni ba Brian Hewitt

UMWAKA BAFYELWE: 1981

ICALO: UNITED STATES

IFYO BALI: UMWANA WALUBILE

INKULILO YANDI: Nafyalilwe mwi tauni lya Moundsville ilyaba mu lulamba lwa mumana wa Ohio, ku kapinda ka ku kuso aka West Virginia. Twafyelwe 4 kabili nine cikonka ibeli. Apo twafyelwe abaume batatu e lyo umwanakashi umo, mu ng’anda mwalewama sana kabili mwaleba sana ne congo. Abafyashi bandi balebombesha, bali aba cishinka kabili balitemenwe abantu. Nangu ca kuti tatwali abakankaala, twalekumanisha fyonse ifyo twalekabila. Apo abafyashi besu bali ni ba Nte, balibikileko sana amano ukutusambilisha Baibolo ukutendeka fye ilyo twali abaice.

Lelo, ilyo naleya ndekula, nalilekele ukukonka ifyo abafyashi balensambilisha. Natendeke ukutwishika nga ca kuti ukukonka ifyo Baibolo isambilisha kuti kwalenga umuntu ukuba ne nsansa. Naletontonkanya ukuti pa kuti imbe ne nsansa, kano nalacita ifyo ndefwaya. Tapakokwele nalilekele ukusangwa ku kulongana kwa Bwina Kristu. Umukalamba wandi e lyo no mwaice wandi nabo batendeke ukucita ifyabipa. Abafyashi besu balyeseshe sana ukutwafwa, lelo twalikeene ukubomfwila.

Nshaishibe ukuti ubuntungwa ubo nalefwaya bwali no kunenga ukuba umusha. Bushiku bumo ilyo nalefuma ku sukulu, umunandi alimpeele fwaka. Nalipokele kabili ukutula bulya bwine bushiku, natendeke ukucita ifintu ifingi ifyabipa. Mu kuya kwa nshita, natendeke ukubomfya imiti ikola, ukunwesha ubwalwa e lyo no kucita ubulalelale. Pa myaka iingi, nalebomfya imiti ikola iyabipisha ica kuti nasukile nakunkuma. Apo nalitekelwe sana ubusha ku miti ikola, natampile ukushitisha imiti ikola pa kusanga indalama sha kushitamo imiti ikola iya kuti ndebomfya.

Nangu ca kuti nalyeseshe ukusuula ifyo kampingu yalenjeba, kampingu yalenshinina ukuti ifyo nalecita fyali ifyabipa. Naleyumfwa ukuti nalicitile sana ifyabipa kabili nalemona kwati teti njaluke. Nangu ca kuti naleba na bantu abengi ku maparte na ku fiila, ilingi line naletalalilwa kabili nshalesansamuka. Inshita shimo, naletontonkanya pa fyo abafyashi bandi baali abasuma kabili calempapusha ukumona ifyabipa ifyo nalecita.

 IFYO BAIBOLO YA-ALWILE UBUMI BWANDI: Nangu ca kuti naleimona kwati te kuti njaluke, bambi balemona ukutila kuti nayaluka. Mu 2000, abafyashi bandi balinjitile ukusangwa ku kulongana kukalamba ukwa Nte sha kwa Yehova. Nangu ca kuti nalishimunwike, ukuya kwena naliile. Nalipapile ukuti umukalamba wandi na nkashi yandi abapondweke, nabo balisangilweko ku kulongana.

Ilyo twali pa kulongana, naibukishe ukuti umwaka wafumineko naliishile kuciila ukwali inyimbo sha congo sana muli ici cine cifulo twalelonganinamo. Ubupusano bwalipo pa fyo namwene fyalinjikete sana ku mutima. Ilyo twaishile ku ciila, ifisoso no tushiki twa fwaka fyali fye mpanga yonse. Abengi abaishile ku ciila bali abaifinya kabili amashiwi yali mu nyimbo nayo yaleleta ubulanda. Lelo pa kulongana, nali na bantu abali aba nsansa nga nshi. Balimpokelele bwino sana nangu ca kuti twamonene nabo kale sana. Icifulo twalonganinepo cali ica busaka kabili amalyashi yalandile pa fintu ifisuma ifikacitika ku ntanshi. Ilyo namwene ubusuma bwaba mu kukonka ifyo Baibolo isambilisha, natendeke ukulanguluka icalengele ukuti nsuule ifyo isambilisha!—Esaya 48:17, 18.

Ilyo twapwile fye ukulongana, napingwilepo ukutendeka ukulongana ne Nte sha kwa Yehova na kabili. Umukalamba wandi no mwaice wandi nabo balitemenwe ifyo ba bapokelele ne fyo bamwene pa kulongana, ica kuti nabo balitendeke ukulongana na kabili. Bonse batatu twalitendeke ukusambilila Baibolo.

Ilembo ilyamfikile sana pa mutima, lilembo lya kwa Yakobo 4:8, ilitila: “Palameni kuli Lesa, na o akapalama kuli imwe.” Nailwike ukuti pa kuti mpalame kuli Lesa, mfwile ukuleka ukucita ifyabipa. Ifyabipa ifyo nalekabila ukuleka, kupeepa fwaka, ukubomfya imiti ikola no kuleka ukunwesha ubwalwa e lyo ne fintu fimbi.—2 Abena Korinti 7:1.

Nalilekele ukwangala na banandi naleangala nabo kale kabili natampile ukwangala na bapepa Yehova. Munyinefwe, eluda uwalensambilisha Baibolo alingafwile sana. Ilingi line alentumina foni kabili alepita na pa ng’anda pa kuti eshibe ifyo ndi. Na ino ine nshita, uyu munyinefwe, ni cibusa wandi uo natemwisha sana.

Pa kulanga ukuti twali-ipeele kuli Lesa, mu April mu 2001, ine, umukalamba wandi e lyo no mwaice wandi twalibatishiwe. Kanshi kuti mwaelenganya ifyo abafyashi na ndume yesu umwaice uwatwalilile ukubombela Lesa, batemenwe ilyo bonse mu lupwa twatendeke ukupepa Yehova.

IFYO NANONKELAMO: Nalemona kwati ifyo Baibolo itusambilisha filalenga umuntu ukukanakwata ubuntungwa, lelo nasanga ukuti ifyo isambilisha filatucingilila icine cine. Baibolo yalingafwile ukuleka ukubomfya e lyo no kushitisha imiti ikola kabili yalilenga naba umuntu umusuma.

Nalikwata ishuko lya kuba pa lupwa lwa ba bwananyina aba mwi sonde lyonse abapepa Yehova. Inte sha kwa Yehova balitemwana icine cine kabili balikatana mu kupepa Lesa. (Yohane 13:34, 35) Pa ba bwananyina nalisangapo no mwina mwandi, Adrianne, uo natemwisha sana no kucindikisha. Twaliba ne nsansa sana pa kubombela Kabumba wesu capamo.

Mu nshita ya kulacita ifintu ifya kuisekesha fye, ino nshita ndapoosa inshita iikalamba ukushimikila no kusambilisha abantu ifyo nabo benganonkelamo mu kusambilila Icebo ca kwa Lesa. Ala uyu umulimo ulandetela insansa icine cine! Ukwabula no kutwishika Baibolo yalyalula ubumi bwandi. Nalisuka nasanga ubuntungwa bwa cine cine.

[Amashiwi pe bula 11]

“Baibolo yalingafwile ukuleka ukubomfya e lyo no kushitisha imiti ikola kabili yalilenga naba umuntu umusuma”