Ku Babelenga Ino Magazini
Ku Babelenga Ino Magazini
Magazini mulebelenga batendeke ukuisabankaya mu July 1879. Ukufuma ilya nshita ifintu fyalyaluka, kanshi na magazini nayaluka. (Moneni ifikope ifili pa muulu.) Ukutendekela na ino ine magazini, mwalamona ukuti kuli ifyalwike mu fyo Ulupungu lwa kwa Kalinda lwa kulaba. Finshi fyalwike?
Moneni ifilimo pe bula 2, apo mwalasanga umutwe uuleti, “Belengelenipo na fimbi pa Intaneti.” Cila mweshi pali uyu mutwe mwakulamona imitwe ya fipande ifikalaba fye pa Intaneti pa www.pr418.com. Mulandu nshi twakulabikila ifipande fimo pa Intaneti?
Mu fyalo ifingi, abantu abengi na batemwa sana ukubelenga ifyebo pa Intaneti kabili cilabangukila ukusanga ifyebo. Nga baya pa Intaneti balasanga ifyebo fimo, ifisangwa fye pa Intaneti. Kuti babelenga ifitabo, magazini, e lyo na ma nyunshipepala pa Intaneti.
Apo abantu abengi na batemwa sana ukubelenga ifyebo pa Intaneti, natwalula ifingi pali adresi yesu iya pa Intaneti iya www.pr418.com, ne ci cakulamwangukila ukusanga ifyebo kabili mukalatemwa ukufibelenga. Abakulaya pa adresi yesu iya pa Intaneti bakulabelenga impapulo shesu ishalembwa kale mu ndimi ukucila pali 430. Lelo, ukutendeka uno wine mweshi, abakulaya pa adresi yesu kuti babelenga ne fipande fimo ifiba lyonse muli magazini yesu iyo bapulinta ifyakulaba fye nomba pali adresi yesu iya pa Intaneti. *
Apo ifipande ifingi fyakulaba pa Intaneti, kanshi ukutendekela na ino magazini, Ulupungu lwa kwa Kalinda ulwa bantu bonse lwakulakwata fye amabula 16. Pali ino nshita Ulupungu lwa kwa Kalinda lwaba mu ndimi 204. Apo talwakulakwata amabula ayengi, kanshi nalimo lwa kulapilibulwa mu ndimi ukucila pali 204.
Tulesubila ukuti ukwaluka mu milembelwe ya iyi magazini, kukalenga abantu abengi ukumfwa ubukombe bwa mu Baibolo ubukalenga bakapusuke. Tulefwaisha ukutwalilila ukulasabankanya ifyebo ifisuma ifyo ababelenga impapulo shesu bengatemwa ukubelenga no kusambililako ifingi. Ifyebo ifyakulaba muli magazini yesu iyo bapulinta e lyo ne fyakulaba pali adresi yesu iya pa Intaneti fya kulanonsha abantu abengi abacindika Baibolo kabili abafwaya ukwishiba ifyo isambilisha.
Abalemba Ino Magazini
[Futunoti]
^ para. 5 Ifipande fimo ifyakulaba pa Intaneti ni fi: “Icipande ca Baice,” ica kulalembelwa ukwafwa abacaice ukusambilila ifyaba mu Baibolo, e lyo pa kulaba ne cipande citila “Amasambililo ya mu Baibolo,” ica kula-afwa abafyashi ukusambilisha abana aba myaka itatu no kucepako.
[Icikope pe bula 3]
PA INTANETI
Tambeni vidio iileti “The Watchtower—Published Since 1879”
(Moneni mu ciNgeleshi apaleti NEWS/The Watchtower—No Other Magazine Comes Close)
