‘Mwafisokolwela ku Tunya’
PALAMENI KULI LESA
‘Mwafisokolwela ku Tunya’
Bushe mulafwaya ukwishiba icine pali Lesa? Lesa nani, finshi atemwa kabili finshi apata? Mu Cebo cakwe Baibolo, e mo Yehova Lesa aisokolola. Nangu cibe fyo, te bonse ababelenga Baibolo abengomfwikisha icine icabamo. Mulandu nshi? Pantu ishuko lya kumfwikisha icine talyapeelwa ku bantu bonse. Natumone bamo abo Yesu atile e bengomfwikisha icine.—Belengeni Mateo 11:25.
Mateo 11:25, itendeka na mashiwi ayatila: “Pa nshita ilya, Yesu atile.” Ukwishiba ifyacitike ilyo Yesu ashilalanda aya mashiwi kuti fyalenga twaishiba abo Yesu alelandapo. Yesu alikalipile abantu abashalefwaya ukuba abasambi bakwe abaleikala mu misumba itatu iya mu citungu ca Galili uko acitile ifipesha amano. (Mateo 11:20-24) Nalimo kuti mwapapa amuti, ‘Bushe umuntu kuti amona ifipesha amano ifyo Yesu acitile e lyo akaana ifyo asambilishe kabili akaana no kuba umusambi wakwe?’ Abantu abakeene ukumukonka, baali ne mitima iyakosa.—Mateo 13:10-15.
Yesu alishibe ukuti pa kuti umuntu omfwikishe icine icaba mu Baibolo, kano Lesa amwafwa e lyo akwata no mutima uusuma. Alondolwele ukuti: “Ndemulumbanya, mwe Tata, Mwe bene ba muulu ne sonde, pantu mwalifisa ifi fintu ku ba mano na bacenjela no kufisokolwela ku tunya.” Bushe mwamona umulandu ukumfwikisha icine icaba mu Baibolo kushapeelelwa ku bantu bonse? Yehova, ‘Umwine wa muulu ne sonde,’ kuti afisa nelyo ukusokolola icine ku o alefwaya. Lelo ici tacilepilibula ukuti Lesa alikwata akapatulula. Cinshi cilenga ukuti asokolwele icine bamo lelo bambi akaana ukubasokolwela?
Yehova alitemwa abaicefya, lelo aba matutumuko alibapata. (Yakobo 4:6) Tasokolwela icine aba “mano na bacenjela,” e kutila abantu abasambilila sana abakwata icilumba, abashifwaya Lesa ukubafwa ukwishiba icine. (1 Abena Korinti 1:19-21) Lelo asokolwela icine ku “tunya,” e kutila abantu abafwaisha ukusambilila kabili abaicefya nga baice. (Mateo 18:1-4; 1 Abena Korinti 1:26-28) Umwana wa kwa Lesa, Yesu, alishibe abaali ne cilumba e lyo na baali abaicefya. Intungulushi sha mapepo abasambilile sana kabili abaali aba cilumba, tabaumfwikishe umwalolele ubukombe bwa kwa Yesu, lelo abalondo bena abaali abaicefya, balyumfwikishe umwalolele bulya bukombe. (Mateo 4:18-22; 23:1-5; Imilimo 4:13) Kwali abantu bambi abali ne fyuma kabili abasambilile sana, lelo abaicefeshe icine cine kabili abaishileba abasambi ba kwa Yesu.—Luka 19:1, 2, 8; Imilimo 22:1-3.
Natubwelele ku cipusho twipwishe pa kubala: Bushe mulafwaya ukwishiba icine pali Lesa? Nga ca kuti mulafwaya, nalimo mwalatemwa ukwishiba ukuti Lesa tatemwa abantu abaimona ukuti ba mano. Lelo, atemwa abasuulwa kuli balya abantu abaimona ukuti ba mano muli ici calo. Nga muli abaicefya pa kusambilila Icebo ca kwa Lesa, ninshi na imwe mukaba pa bantu abo Yehova akapeela ubupe bwacindama ubwa kwishiba icine pali ena. Ukwishiba icine ku kamulenga ukuba aba nsansa ino nshita e lyo no kwisakwata “umweo wine wine,” e kuti umweo wa muyayaya mwi sonde ilipya ilyo Lesa atulaya nomba line umukaba ubulungami. *—1 Timote 6:12, 19; 2 Petro 3:13.
Amalembo ya kubelenga mu January
[Futunoti]
^ para. 7 Inte sha kwa Yehova kuti bamwafwa ukwishiba icine pali Lesa no kufwaya kwakwe. Balasambilisha Baibolo ukwabula ukulipilisha, ukubomfya icitabo citila Bushe Cinshi Baibolo Isambilisha?
