AMEPUSHO YA MU BAIBOLO YA-ASUKWA

Mulandu nshi Yesu etilwa ukuti Umwana wa kwa Lesa?

Lesa takwata umukashi wa cine cine uo akwata nankwe abana. Ni Kabumba wa fintu fyonse. Lesa apangile abantu mu nshila ya kuti balepashanya imibele yakwe. E mulandu wine umuntu Lesa abalilepo ukubumba Adamu, etilwa ati “umwana wa kwa Lesa.” Yesu na o bamwita ukuti “Umwana wa kwa Lesa” pantu Lesa amubumbile ne mibele akwatako.—Belengeni Luka 3:38; Yohane 1:14, 49.

Ni lilali Yesu bamubumbile?

Lesa abalilepo ukubumba Yesu ilyo ashilabumba Adamu. Na kuba, Lesa atalile abumba Yesu e lyo amubomfya mu kupanga ifintu fyonse ukubikako fye na bamalaika. E mulandu wine Baibolo ilandila ukuti Yesu “e beli pa fibumbwa fyonse” ifya kwa Lesa.—Belengeni Abena Kolose 1:15, 16.

Ilyo ashilafyalwa mu Betelehemu, Yesu ali cibumbwa ca mupashi ku muulu. Ilyo inshita yafikile, Lesa akuushishe ubumi bwa kwa Yesu ukufuma ku muulu ukwisa mwi fumo lya kwa Maria pa kuti akafyalilwe mu buntu.—Belengeni Luka 1:30-32; Yohane 6:38; 8:23.

Mulandu nshi Lesa alefwaila ukuti Yesu afyalilwe pano calo mu buntu? Mulimo nshi uwacindama uo Yesu abombele? Kuti mwasanga amasuko kuli aya mepusho mu Baibolo. Amasuko mukasanga yakalenga mukeshibileko na fimbi ifya mu Baibolo, kabili mukatemwa sana nga mwaishiba ifyo Lesa na Yesu bamucitila.

Nga mulefwaya ukwishibilapo na fimbi, belengeni icipandwa 4 muli ici citabo, Bushe cinshi Baibolo Isambilisha?, icalembwa ne Nte sha kwa Yehova

[Icikope pe bula 16]

Yesu ali icibumbwa ca mupashi ku muulu ilyo ashilafyalwa mu Betelehemu