ABABELENGA INO MAGAZINI BALEPUSHA UKUTI . . .

Bushe Yesu alaile ncitatubi ukuti akaba nankwe ku muulu?

Abengi balepusha ici cipusho pantu Yesu alaile ncitatubi uwali no kufwila pamo nankwe ukuti akaba nankwe mu Paradaise. Yesu atile: “Cine cine ndekweba lelo nati, uli no kuba na ine mu Paradaise.” (Luka 23:43) Pa kulanda aya mashiwi, Yesu talandile uko iyi Paradaise ikabela. Bushe apilibwile ukuti akaba na ncitatubi ku muulu?

Natubale tumone nga ca kuti uyu ncitatubi alikumanishe ififwaikwa pa kuti aye ku muulu. Abantunse abaya ku muulu balabatishiwa mu menshi na ku mupashi wa mushilo kabili ici cipilibula ukuti balaba abasambi ba kwa Yesu kabili Lesa alabasala ukuba abana bakwe. (Yohane 3:3, 5) Abaya ku muulu bafwile no kulakonka amafunde ya kwa Lesa no kukwata imibele iisuma pamo nga bucishinka, icitetekelo, e lyo ne cikuuku. (1 Abena Korinti 6:9-11) Bafwile ukutwalilila ukuba aba cishinka kuli Lesa na Kristu ukufikila imfwa. (Luka 22:28-30; 2 Timote 2:12) Nga bakumanisha ififwaikwa e lyo bengalanga ukuti na balinga ukubuushiwa kabili kuti babomba ne milimo Lesa akabapeela iya kuteka abantunse imyaka 1000. Abakaya ku muulu bakabomba pamo na Kristu nga bashimapepo ne shamfumu.—Ukusokolola 20:6.

Ukupusanako na bakaya ku muulu, ncitatubi ali cipondo kabili afwile fye icipondo. (Luka 23:32, 39-41) Ca cine ukuti alilombele Yesu mu mucinshi ati: “Mukanjibukishe ilyo mukaba imfumu.” (Luka 23:42) Nangu cibe ifyo ncitatubi tabatishiwe, tasubilwe no mupashi wa mushilo pa kutila abe umusambi wa kwa Yesu, kabili takuli ifyo acitile mu bumi bwakwe ifyalangile ukuti ali ne mibele iisuma e lyo ne citetekelo cakosa. Bushe cine cine Yesu kuti alaya uyu ncitatubi ukuteka pamo na basambi bakwe abali aba cishinka ukufika ne mfwa yabo?—Abena Roma 2:6, 7.

Natulangilile: Nga ca kuti umuntu uwamwibile indalama alomba ukuti mumwelele, nalimo te kuti mutwalilile ukumupinda indalama amwibiile. Lelo bushe kuti mwacetekela uyo muntu ukutila e o aletungulula ubukwebo bwenu nelyo alemusungila ulupwa? Kuti mwapeela uyu mulimo ku bantu fye abo mwacetekela sana. E cimo na kubakaya ku muulu, na bo bafwile ukulanga imibele iisuma iingalenga Lesa ukubacetekela ukuti cine cine kuti bateka abantu banabo mu bulungami. (Ukusokolola 2:10) Nangu ca kuti ncitatubi alilapile ukufuma pa nshi ya mutima ilyo ali na Yesu, tapaali ifyo acitile kale ifyalangile ukutila kuti bamucetekela.

Lelo bushe Yesu talaile ulya ncitatubi ukuti akaba nankwe ku muulu bulya bwine bushiku? Iyo, pantu Yesu taile ku muulu bulya bwine bushiku afwile. Lelo ali “mu kati ka mushili,” e kutila mu nshishi, pa nshiku shitatu. (Mateo 12:40; Marko 10:34) Nangu fye ni lintu abuukile, Yesu ali pa calo pa nshiku 40 ilyo ashilaya ku muulu. (Imilimo 1:3, 9) E co kanshi, te kuti tutile ulya ncitatubi ali na Yesu ku muulu bulya bwine bushiku.

Ni kwi kukaba Paradaise iyo Yesu alaile ncitatubi? Ncitatubi nga abuushiwa, akaba muli Paradaise pano pene pe sonde kabili Yesu e ukalateka. (Imilimo 24:15; Ukusokolola 21:3, 4) Nga mulefwaya ukusambilila na fimbi pali iyi Paradaise na pa fyo Lesa afwaya, kuti cawama ukulanshanya ne Nte ya kwa Yehova.