PALAMENI KULI LESA

“Lifunde Nshi Ilya Ntanshi Pali Yonse?”

Finshi tufwile ukucita pa kuti tusekeshe Lesa? Bushe kwaliba amafunde ayengi sana ayo tufwile ukulakonka? Awe nakalya. Ukulingana na fintu Yesu Kristu Umwana wa kwa Lesa alandile, ifyo tufwile ukucita pa kusekesha Lesa kuti fyalandwa fye mwi shiwi limo.—Belengeni Marko 12:28-31.

Natumone icalengele ukuti Yesu alande aya mashiwi. Pa bushiku bwa Nisani 11, ninshi kwashala fye inshiku shinono ukuti bamwipaye, Yesu ali mwi tempele alesambilisha abantu. Lyena abalwani bakwe batendeke ukumwipusha ifipusho fya kumwesha pa kuti afilwe ukwasuka. Lyonse ilyo balemwipusha alebasuka fye mu kulungatika, ica kuti balefilwa no mwakulosha. Basukile bamwipusha ati: “Lifunde nshi ilya ntanshi pali yonse?”—Icikomo 28.

Ici cipusho cali icayafya nga nshi. AbaYuda bamo balepaashanya ukuti lifunde nshi pa mafunde ukucila pali 600 ayali mwi Funde lya kwa Mose ilyali ilya ntanshi, e mu kuti ilyali ilya cindama sana? Lelo bambi balemona kwati amafunde yonse yali ayacindama kabili calilubene ukucindikishapo yamo ukucila aya nankwe. Bushe Yesu ayaswike shani ici cipusho?

Yesu pa kubasuka talandile fye pe funde limo, lelo alandile pa mafunde yabili. Intanshi atile: “Muletemwa Yehova Lesa wenu no mutima wenu onse, no mweo wenu onse, no kutontonkanya kwenu konse, na maka yenu yonse.” (Icikomo 30; Amalango 6:5) Amashiwi ya kuti “umutima,” “ukutontonkanya,” “umweo,” na “maka” kuti yapilibula ne fintu fimbi. * Kanshi ici cilepilibula ukuti fyonse ifyo umuntu acita e lyo ne fyo atontonkanya fifwile ukulanga ukuti alitemwa Yehova. Icitabo cimo icilanda pali Baibolo citila: “Tufwile ukutemwa Lesa muli fyonse.” Kanshi nga mwalitemwa Lesa kabili mulafwaya ukulamusekesha, mufwile ukulacita ifyo afwaya cila bushiku.—1 Yohane 5:3.

Ica bubili, Yesu atile: “Uletemwa umunobe nge fyo waitemwa we mwine.” (Icikomo 31; Ubwina Lebi 19:18) Nga twalitemwa Lesa tufwile no kutemwa abanensu. Ukutemwa Lesa e kulenga tuletemwa abantu banensu. (1 Yohane 4:20, 21) Nga twalitemwa abanensu nge fyo twaitemwa, kuti tulebacitila ifyo na ifwe twingafwaya baletucitila. (Mateo 7:12) Nga twacita ifi, tulanga ukuti twalitemwa Lesa uwatupangile bonse mu cipasho cakwe.—Ukutendeka 1:26.

Bushe aya amafunde yabili yacindama shani? Yesu atile: “Takwaba ifunde limbi ilyacila aya.” (Icikomo 31) Mu lyashi lyapalanako, Yesu atile pali aya amafunde yabili e pashimpwa amafunde yonse.—Mateo 22:40.

Ukucita ifyo Lesa afwaya takwayafya. Fyonse ifyo afwaya ukuti tulecita kuti fyalandwa fye mwi shiwi limo, ukutemwa. Lyonse Lesa afwaya ukuti bakapepa ba cine baleba no kutemwa. Uku te kutemwa kwa kulanda fye pa kanwa nelyo ukumfwila fye abantu uluse, lelo kufwile ukumonekela na mu fyo tucita. (1 Yohane 3:18) Tulemukoselesha ukusambilila ifyo mwingatemwa Lesa e lyo ne fyo mwingalanga ukuti mwalitemwa Lesa ‘uwakwata ukutemwa.’—1 Yohane 4:8.

Amalembo ya kubelenga mu March

Marko 9–Luka 6

[Futunoti]