BAIBOLO ILAALULA ABANTU

“Nali uwa lubuli sana”

Abashimika ili lyashi ni ba Esa Leinonen

UMWAKA BAFYELWE: 1960

ICALO: FINLAND

IFYO BALI: BALELISHA INYIMBO SHA CONGO SANA

INKULILO YANDI: Nakuulile mu musumba wa Turku, umwaba icabu kabili umwikala abapiina sana. Batata bali ni bakalapashi mu bwangalo bwa kupoosa inkonya, kabili ine no mwaice wandi twalitemenwe sana ukwangala ubu bwangalo. Ilyo nali ku sukulu, nali sana uwa lubuli. Kabili lintu nali umusepela, natendeke ukwangala na bacintomfwa, ne ci calengele ukuti ncilemo ukucita ulubuli. Natendeke ukulakutika sana ku nyimbo sha congo kabili natampile ukufwaisha ukuba kalisha wa filimba uwalumbuka.

Nalishitile ifilimba kabili twalipangile akalibumba ka bakemba ba nyimbo. Tapakokwele natendeke ukutungulula aka kalibumba twapangile. Nga tulelisha ifilimba, naleba fye icibebebe. Pa mulandu wa kuti inyimbo twalelisha shali isha congo kabili na fwe baleimba twalemoneka fye cimbi cimbi, twalishibikwe sana. Nga tulelisha ifilimba, abantu abengi balesangwako sana. Twalikopele inyimbo shimo shimo kabili isho twalekelesheko ukukopa, abengi balishitemenwe sana. Ku kupwa kwa ba 1980, twaile ku America ku kulisha ifilimba pa kutila tulumbuke. Ibumba lyesu lyalishishe ifilimba mu New York na ku Los Angeles kabili ilyo tushilabwelelamo ku Finland, twalilanshenye no twampani twalekanalekana utukopa inyimbo.

Nangu ca kuti nalitemenwe ukuba muli ili ibumba lya bakemba ba nyimbo, nshali ne nsansa, e co nalefwaisha sana ukuba ne nsansa. Nalipatile sana ifyo bakemba abengi balecimfyanya ne fyo bali abalubuli ne fyongo kabili calenkalipa nga namona ifyo imikalile yandi yabipile. Naleyumfwa ukuti nali umuntu umubi icine cine kabili naletiina ukuyapya mu mulilo wa pe. Natendeke ukufwailisha ifyasuko ku mepusho nakwete mu fitabo fyalekanalekana ifya mapepo. Nangu ca kuti naleisuula ukuti teti nsekeshe Lesa, ukupepa kwena nalepepa sana ukuti angafwe.

IFYO BAIBOLO YA-ALWILE UBUMI BWANDI: Pa kusanga ifyo nalekabila, nalebomba pa post office iyabelele uko twaleikalila. Bushiku bumo naishileishiba ukuti uo nalebomba nankwe ali ni Nte ya kwa Yehova. Nalimwipwishe ifipusho ifingi kabili nalitemenwe sana ifyo aleasuka bwino ukubomfya Baibolo,  ne ci calengele nsumine ukulasambilila Baibolo nankwe. Pa numa ya kusambilila Baibolo pa milungu fye iinono, ibumba lyesu balilipeele ishuko lya kwimba ku kampani kamo kabili batile nalimo kuti batukopesesha ne nyimbo ku America. Namwene ukuti ili lyali lishuko ilishimonaika.

Naebele Nte walensambilisha ukuti ico nalefwaisha, kufumya inyimbo na shimbi ishakulekeleshako, e lyo pa numa nkatendeke ukukonka ifyo Baibolo ilanda. Tanjebele ico mfwile ukucita, lelo anjebele fye ukubelenga amashiwi Yesu alandile ayaba pali Mateo 6:24 apatila: “Takuli uwingabombela bashikulu babili.” Ala nalipapile ilyo naishibe umwalolele aya amashiwi! Lelo ilyo papitile inshiku ishinono, uwalensambilisha Baibolo na o alipapile sana ilyo namwebele ukuti apo nalefwaya ukuba umusambi wa kwa Yesu, nalilekele ukulisha ifilimba.

Baibolo yali kwati cilola pantu yalenenga ukwishiba ifilubo nalepanga. (Yakobo 1:22-25) Naishilemona ukuti nali uwa lubuli sana, uwa cilumba kabili nalefwaisha sana no kulumbuka. Naletukana, kabili nalekolwa sana. Nalyumfwile sana ububi ukuti imikalile yandi yalipusene sana ne fyo Baibolo isambilisha. Nangu ca kuti calyafishe ukwaluka, nalefwaisha sana ukwalula imibele yandi.—Abena Efese 4:22-24.

Pa kubala, nalecula sana na matontonkanyo pa filubo nacitile kale. Lelo, Nte uwalensambilisha alingafwile sana. Anangile ifyo Baibolo ilanda pali Esaya 1:18 apatila: “Imembu shenu nelyo shakashika ce, shikabuuta tuutu kwati butonge.” Ili ilembo e lyo na malembo yambi yalengele ukuti nshininkishe ukuti Shifwe wa ku muulu wa luse kabili alafwaisha ukundapa abacula na matontonkanyo lelo abalapila pa filubo bacitile.

Ilyo naishibe bwino Yehova no kumutemwa, napingwilepo ukumubombela. (Amalumbo 40:8) Mu 1992 pa kulongana kukalamba ukwa Nte sha kwa Yehova ukwali mu St. Petersburg ku Russia, nalibatishiwe. BaNte abasangilwe pali uku kulongana bafumine mu fyalo fyalekanalekana.

IFYO NANONKELAMO: Nalikwata abanandi abengi abapepa Yehova. Ilingi line tulaipakisha ukulisha na bo inyimbo ishisuma, ishaba bupe ukufuma kuli Lesa. (Yakobo 1:17) Ala Lesa alimpaala pa kumpeela umwina mwandi uo natemwisha, Kristina! Ndalanshanya nankwe ifintu ifingi ifindetela insansa, amafya nkwata e lyo ne fintu fimbi ifiba ku mutima.

Nga nshali Inte ya kwa Yehova, nalimo ino nshita nga nalifwa. Kale tapalepita inshita ninshi naba mu bwafya. Ino nshita naliba ne nsansa kabili nshisakamikwa no kusakamikwa.