ICIPANDE ICIKALAMBA: BUSHE LESA MUNKALWE?

Mulandu Nshi Abantu Bamwena Kwati Lesa Munkalwe?

BUSHE nacimupapusha ukumfwa icipusho icili pa nkupo ya ino magazini? Bamo nga baumfwa ici cipusho balapapa, lelo abengi tabaishiba nampo nga Lesa munkalwe nelyo iyo. Mulandu nshi?

Bamo abapusuka mu tuyofi balepusha ukuti: “Mulandu nshi Lesa asuminishisha utuyofi ukucitika? Bushe Lesa tabikako amano ku fitucitikila? Nelyo bushe munkalwe?”

Bambi na bo nga babelenga ilyashi ililanda pali Noa ne Lyeshi balapapa, balepusha ukuti, ‘Mulandu nshi Lesa uwakwata ukutemwa alofeshe abantu bafula ifi? Bushe munkalwe?’

Bushe na imwe inshita shimo, mulatontonkanyapo pa mepusho ya musango yu? Nelyo bushe tamwishiba ifya kwasuka abashaishiba nampo nga Lesa munkalwe nelyo iyo? Natulande pa cipusho cimbi icingatwafwa ukwishiba ifya kwasuka.

MULANDU NSHI TWAPATILA UBUNKALWE?

Twalipata ubunkalwe pantu Lesa atupangile na kampingu iitwafwa ukwishiba ifisuma ne fibi. Pa mulandu wa kuti twalikwata kampingu, calilenga ukuti tupusaneko ku nama. Kabumba wesu atupangile “mu cipasho cakwe.” (Ukutendeka 1:27) Bushe ifi Lesa atupanga mu cipasho cakwe, calola mwi? Ifyo Lesa atupangile filanga fye ukuti alafwaya tuleba ne mibele iisuma iyo na o akwatako e lyo tulekonka amafunde yakwe kabili tuleishiba icisuma ne cibi. Natulangilile: Nga ca kuti Lesa e watupeele kampingu kabili ilatulenga ukupata ubunkalwe, bushe ninshi na o tapata ubunkalwe?

Baibolo na yo ilalanda ukuti Lesa alipata ubunkalwe, pantu atweba ukuti: ‘Inshila shandi shalicila inshila shenu, kabili ukutontonkanya kwandi kwalicila ukutontonkanya kwenu.’ (Esaya 55:9) Nga twatila Lesa munkalwe, bushe ninshi tatuletila ifwe twalilungama ukumucila? Kanshi kuti cawama ukufwailisha ifishinka ilyo tushilatendeka ukutontonkanya ukuti Lesa munkalwe. Nalimo kuti cawamapo ukutontonkanya pa mulandu fimo ifyo Lesa acita fimonekela kwati munkalwe ukucila ukusondwelela fye ukuti munkalwe. Pa kuti twishibe icilenga bamo balemona kwati Lesa munkalwe, natubale tulande pa fyo cipilibula ukuba “umunkalwe.”

Nga twatila umuntu munkalwe ninshi tuletila ifyo apanga mu mutima fibi. Umunkalwe alomfwa bwino ukumona uko bambi balecula kabili tabomfwilako uluse nga balecula. Ku ca kumwenako, wishi uutemwa ukukalifya umwana ilyo alemufunda, ninshi munkalwe. Lelo wishi uufunda umwana pa kutila amusambilishe nelyo amucingilile ku fibi, ninshi musuma umutima. Ilingi line tatwishiba icilenga abantu ukucita ifintu fimo, ne ci cilalenga twalabamona kwati tababa bwino.

Natulande pa tuyofi utucitika muno nshiku e lyo ne fyalembwa mu Baibolo ifilanda pa fyo Lesa akandile abantu ifilenga bamo baletontonkanya ukuti munkalwe. Bushe cine cine kwaliba ifishinka ifilanga ukuti Lesa munkalwe?

[Icikope pe bula 3]

Mu cifyalilwa fye tulafwaya ukuba no luse kuli bambi kabili tatufwaya ukuba abankalwe