AMASUKO KU MEPUSHO YA MU BAIBOLO

Mulandu nshi abantu bafililwa ukuleta umutende?

Baibolo ilanda ukuti kwaba ifintu fibili ifyalenga ukuti mu calo mwiba umutende. Ica kubalilapo, nangu ca kuti abantu balicita ifintu ifisuma, Lesa tabapangile ukuti baleiteka. Ica bubili, abantu balafilwa ukucita ifyo bapanga ukucita pa mulandu wa kuti “icalo conse calaala mu maka ya mubifi,” Satana Kaseebanya. Kanshi e calenga ukuti nangu abantunse babombeshe shani, te kuti balete umutende pano calo.—Belengeni Yeremia 10:23; 1 Yohane 5:19.

Bukaitemwe e lyo no kufwaisha ukulumbuka na fyo fyalilenga abantu ukufilwa ukuleta umutende pano calo. Ubuteko ubwingasambilisha abantu ukulacita ifisuma no kulasakamana bambi, e bwingaleta fye umutende pano calo.—Belengeni Esaya 32:17; 48:18, 22.

Ni nani akaleta umutende pano calo?

Lesa Wa Maka Yonse alilaya ukuleta ubuteko ubukateka abantunse bonse. Bukafumyapo amabuteko ya bantunse yonse, no kutendeka ukuteka. (Daniele 2:44) Yesu Umwana wa kwa Lesa kabili Cilolo wa Mutende, e ukalateka. Akafumyapo ububifi bonse pano calo kabili akasambilisha abantu ukuba no mutende.—Belengeni Esaya 9:6, 7; 11:4, 9.

Pali ino nshita Yesu aleafwa abantu abengi ababomfya Icebo ca kwa Lesa Baibolo, ukusambilisha abantu ifya kuba no mutende. Nomba line fye pa calo conse pakaba umutende.—Belengeni Esaya 2:3, 4; 54:13.

Nga mulefwaya ukubelengelapo fimbi, moneni icipandwa 3 muli ici citabo, Bushe Cinshi Baibolo Isambilisha? icalembwa ne Nte sha kwa Yehova

[Icikope pe bula 16]

Ubuteko ubwingalula imitima ya bantu e bwingaleta fye umutende pano calo

[Abatusuminishe]

Fatmir Boshnjaku