Yehova “Taba Na Kapaatulula”
PALAMENI KULI LESA
Yehova “Taba Na Kapaatulula”
Bushe balimukankambapo? Nelyo bushe balimukaninapo ukumucitila icintu nelyo ukukanamuposako amano pa mulandu wa mushobo, ifyo mumoneka nelyo pa mulandu wa ko mwafuma? Ala te imwe mweka ifi fyacitikilapo! Nangu ca kuti akapaatulula kaliseeka sana, icawama ca kuti Lesa ena taba na kapaatulula. Umutumwa wa Bwina Kristu Petro, alilandile ukwabula no kutwishika ukuti: “Lesa taba na kapaatulula.”—Belengeni Imilimo 10:34, 35.
Petro alandiile aya mashiwi mu ng’anda ya kwa Korneli, umwina Fyalo. Petro aali muYuda. Pali ilya nshita, abaYuda balemona abena Fyalo ukuti tabasanguluka kabili tabafwile ukulaumfwana na bo. Nomba cinshi calengele ukuti Petro abe mu ng’anda ya kwa Korneli? Ni co Yehova Lesa alyebele Petro ukuya kuli Korneli. Petro alimwene icimonwa ukufuma kuli Lesa umo bamwebele ukuti: “Ifyo Lesa asangulwile, witila fyalikowela.” Petro na o taishibe ukuti ubushiku bwafumineko, Korneli na o alimwene icimonwa umo malaika amwebele ukuyamonana na Petro. (Imilimo 10:1-15) Ilyo Petro aishibe ukuti ni Yehova wapekenye fyonse ifi, calengele alande amashiwi ayalangile ukuti Lesa taba na kapaatulula.
Atile: “Cine cine nomba nashininkisha ukuti Lesa taba na kapaatulula.” (Imilimo 10:34) Ishiwi lya ciGriki ilyapilibulwa ukuti “akapaatulula” lipilibula “uulolesha pa menso.” (Ukulingana na Baibolo ya The Kingdom Interlinear Translation of the Greek Scriptures) Uwasoma umo alandile pali ili ishiwi ukuti: “Lilosha kuli kapingula uulolesha fye umuntu pa menso pa kupingula umulandu ukwabula ukukonka ifyo umulandu uli.” Lesa tatemwa abantu pa mulandu fye wa mushobo, icalo bafumako, ifyo baishibikwa mu bwikashi nelyo ifyo bamoneka.
Lelo, Yehova amona ifyaba mu mitima yesu. (1 Samwele 16:7; Amapinda 21:2) Petro akonkenyepo ukulanda ukuti: “Umuntu uwa mu luko lonse uutiina Lesa no kucita icalungama alapokelelwa kuli ena.” (Imilimo 10:35) Ukutiina Lesa cipilibula ukumucindika no kumutetekela no kukanacita fyonse ifingamufulwisha. Ukucita icalungama kuitemenwa ukucita ifyo Lesa afwaya. Yehova alitemwa umuntu uwakwata akatiina, uushifwaya ukucita ifingamufulwisha.—Amalango 10:12, 13.
Nga ca kuti balimukankambapo, amashiwi Petro alandile pali Lesa kuti yamukosha. Yehova alekula abantu ba mu nko shonse ukwisa ku kupepa kwa cine. (Yohane 6:44; Imilimo 17:26, 27) Alakutika ku mapepo ya babomfi bakwe no kubafwa te mulandu no mushobo, icalo bafumako nelyo ifyo baishibikwa mu bwikashi. (1 Ishamfumu 8:41-43) Ukwabula no kutwishika, Yehova amona fye abantu bonse ukuti tabapusana, luko fye lumo. Bushe kuti mwatemwa ukwishibilapo na fimbi pali uyu Lesa uushakwata kapaatulula?
Amalembo ya kubelenga mu June
[Amashiwi pe bula 8]
Yehova amona fye abantu bonse ukuti tabapusana, luko fye lumo
