BAIBOLO ILAALULA ABANTU

“Nomba Nalishiba Ukuti Te Kuti Njalule Ifintu mu Calo”

Abashimika ili lyashi ni ba Jukka Sylgren

UMWAKA BAFYELWE: 1966

ICALO: FINLAND

IFYO BALI: BALEFWAISHA UKUTI IFINTU FIWAME MU BWIKASHI

INKULILO YANDI: Ukufuma fye ku bwaice, nalitemwa sana ifintu ifyo Lesa apanga. Ulupwa lwesu lwalitemenwe ukuya mu kwangala ku mpanga ukwali ifimuti ifisuma na ba bemba. Iyi impanga e yashingulwike itauni twaleikalamo ilya Jyväskylä mu Central Finland. Nalitemwa sana inama ica kuti ilyo nali umwaice nalefwaya ukufukatila imbwa nelyo bapushi bonse abo namona! Nshaletemwa ukumona ifyo abantu balecusha inama. Ici calengele naingila mu kabungwe kalolekesha pa fyo inama shifwile ukulasungwa bwino, umo nasangile abantu na bambi abatemenwe inama nga ine.

Twatendeke ukupitamo ukweba abantu ukuti tabafwile ukulacusha inama, lelo bafwile ukulashisunga bwino. Na kabili twalesabankanya ifyebo no kupita mu misebo tuleilishanya pa fyo inama baleshicusha ku bakwete amatuuka umo baleshitisha amasako ya nama e lyo na ku balepima inama ukumona nga nashilwala. Twalipangile na kabungwe akalelolekesha pa fya kucingilila inama. Pa mulandu wa kuti twalefwaisha ukucingilila inama, ilingi line twalecita ifintu ifyalelenga tulepusana na ba mu buteko. Balinjikete imiku iingi no kuntwala ku cilye.

Cimbi icalensakamika sana, mafya ayo nalemona mu calo. Ici calengele ukuti njingile mu tubungwe twalekanalekana ukubikako fye na kabungwe ka Amnesty International e lyo na kabungwe ka Greenpeace. Nalebombesha sana muli utu tubungwe. Nalelandilako abapiina na balecula ku nsala e lyo na bo balefyengelesha.

Na lyo line, naishilesanga ukuti te kuti njalule ifintu mu calo. Nangu ca kuti utu tubungwe twalepwisha amafya yamo ayanono, amafya ayakalamba yena yalefulilako fye. Cali kwati imipashi yabipa e yaleteka icalo conse kabili takwali uwalesakamana pa fyalecitika. Nshaishibe ifyo nali no kucita.

 IFYO BAIBOLO YA-ALWILE UBUMI BWANDI: Naleumfwa ububi pa mafya yalecitika mu calo, lelo apo nshaishibe ifya kucita, natendeke ukutontonkanya pali Lesa na Baibolo. Inshita imo nalisambilileko Baibolo ne Nte sha kwa Yehova. Nangu ca kuti nalitemwene ifyo baNte baali aba cikuuku e lyo ne fyo bambikileko amano, nshalefwaya ukuleka ifyo nalecita. Lelo ili lyena nalefwaisha ukucitapo fimo.

Natendeke ukubelenga Baibolo kabili ifyo nalebelenga fyalenkosha sana. Nalisangile Amalembo ayengi ayalanda pa fyo tufwile ukulasunga bwino inama. Ku ca kumwenako, pa Amapinda 12:10 patila: “Umulungami asakamana umweo wa citekwa cakwe.” Nasambilile ukuti Lesa te ulenga ukuti abantu balecula. Lelo amafya yalifulilako mu calo pantu tatukonka ifyo Lesa atufunda. Nalitemenwe sana ilyo nasambilile ukuti Yehova alikwata ukutemwa kabili alashishimisha.—Amalumbo 103:8-14.

Nasangile akapepala apo balelanda pa citabo citila Bushe Cinshi Baibolo Isambilisha? kabili nalikatumine ku maofeshi ya Nte sha kwa Yehova pa kuti bantumineko ici citabo. Tapakokwele baNte balintandalile kabili nalisumiine ukusambilila na bo Baibolo. Na kabili, nalitampile ukuya ku kulongana kwa Bwina Kristu ukwalebela pa Ng’anda ya Bufumu. Ici calengele kuti ntemwe sana ifyo nalesambilila mu Baibolo.

Ala nalitemwa sana ifi Baibolo yalenga ukuti njaluke! Nalileka ukupeepa fwaka no kunwesha ubwalwa no kulanda ifibi kabili ino nshita ndamoneka bwino e lyo ndacindika na ba mu buteko. (Abena Roma 13:1) Ndatasha ukuti nalileka ukucita ubulalelale pantu nshaletiina ukucita ifi.

Nalemona kwati utubungwe twalekanalekana utushili twa buteko e twingawamya ifintu mu calo. Ukuleka ukutontonkanya ifi e kwankoseele sana. Palipitile inshita iikalamba pa kuti ndeke ukulabomba no tu tubungwe. Pa kubalilapo fye, naletontonkanya ukuti nga naleka ukubomba no tu tubungwe, cikaba kwati nshaba na cishinka. Na lyo line, nalitemenwe ukwishiba ukuti Ubufumu bwa kwa Lesa fye e bukafumyapo amafya yonse. Napingwilepo ukulabombesha ukutungilila Ubufumu bwa kwa Lesa no kulasambilishako bambi.—Mateo 6:33.

IFYO NANONKELAMO: Apo nalelandilako abantu pa nsambu bakwata, naleti fye onse uo natontonkanya ukuti mubi umutima, ninshi apo pene fye namupata. Nomba ndatasha sana pa fyo nasambilila mu Baibolo ukukanapata abantu bambi. Lelo ndesha ukuba no kutemwa kwa Bwina Kristu ku bantu bonse. (Mateo 5:44) Ndalanga ukutemwa ku bantu ilyo ndebashimikila imbila nsuma pa Bufumu bwa kwa Lesa. Ndomfwa bwino ukumona ifyo umulimo tubomba uwa kushimikila ulenga abantu ukuba no mutende ne nsansa no kulenga abantu ukukwata isubilo lya kuti ifintu fikawama.

Nomba nshisakamana sana pantu nalishiba ukuti ni Yehova fye uukawamya ifintu. Nalicetekela ukuti apo e Kabumba, takaleke abantunse bakatwalilile ukucusha abantu banabo ne nama nelyo ukonaula isonde. Lelo, ukubomfya Ubufumu bwakwe, akawamya ifintu fyonse. (Esaya 11:1-9) Nalitemwa ukuti nomba nalishiba icine kabili ndaafwa na bantu bambi ukwishiba icine ca mu Baibolo. Nomba nalishiba ukuti te kuti njalule ifintu mu calo.

[Abatusuminishe 12]

Animalia