ICIPANDE ICIKALAMBA: BUSHE KWALIBA ICILONGANINO CA MAPEPO ICO MWINGACETEKELA?

Umulandu Mulingile Ukwishibila uko Mupepa nga Kwaliba fye Bwino

Tutile namulwala ubulwele bwabipisha e lyo mulefwaya ukuti bamucite opareshoni, bushe te kuti mufwaye dokota uwaishiba sana uyu mulimo kabili uo mwacetekela sana ukuti e o amubombele?

E fyo caba na ku fya mipepele, mufwile ukwishiba uko mupepa nga kwaliba fye bwino. Icilonganino ca mipepele muyako kuti calenga mukakwate umweo wa muyayaya nelyo iyo.

Yesu alilandilepo fimo ifingalenga twishibe nampo imipepele yesu ya cine nelyo iyo. Atile: “Umuti onse bawishibila ku fisabo fya uko.” (Luka 6:44) Ku ca kumwenako, nga mwatontonkanya pa baba mu mipepele imo, bushe fisabo nshi nelyo mibele nshi bakwata? Intungulushi sha muli iyi mipepele, bushe shilanda sana pa ndalama? Bushe abapepa kuli iyi mipepele balakonka ifyo Baibolo ilanda pa nkondo na pa kukwata imibele isuma? Bushe kwalibako icilonganino ca mapepo ico mwingacetekela? Tulemukoselesha ukubebeta ifili mu fipande fikonkelepo.

[Amashiwi pe bula 3]

“Umuti onse bawishibila ku fisabo fya uko.”—Luka 6:44