ICIPANDE ICIKALAMBA MULANDU NSHI TUCULILA IFI? NI LILALI TUKALEKA UKUCULA?

Abantu Abengi Aba Kaele Balifwa

Ka Noelle kalitemenwe sana abantu kabili kalitemenwe ne fya kulengalenga. Bushiku bumo ilyo kaleangala ku numa ya ng’anda, kaponeene mu cishiba ca kusambilamo no kunwena. Pali ubu bushiku, ninshi kwashala fye imilungu ibili ukuti kakumanishe imyaka 4.

Pa 14 December mu 2012, icipondo calipeye abantu 26 pe sukulu lya mu Connecticut ku America. Pa bantu abafwile pali na bana 20 abaali ne myaka 6 nelyo 7. Abaice bamo abafwile ni Charlotte, Daniel, Olivia na Josephine . . . Ilyo kwali ukwibukisha abafwile muli ubu busanso, kateka wa ku America, Obama, aitile amashina ya bana abafwile no kweba abantu abaleloosha ukuti: “Takufwile ukuba amansanso ya musango uyu na kabili.”

Mu 1996, Bano no lupwa lwakwe bafumine ku calo ca Iraq no kukuukila ku calo ca Norway. Pali ilya nshita Bano ali ne myaka 18. Abanankwe balemwita ati Sun Rays ukupilibula ukuti aali ni mbeeka. Ku ca bulanda, pa 22 July, mu 2011, Bano balimwipeye capamo na bantu bambi 76 ku cipondo icaleitasha no kuitasha aciti: “Naumfwa ububi ukwipaya fye abanono . . . nacilafwaya ukwipaya abengi.”

Amalyashi ya musango uyu ayakalifya umutima yaliseeka mu fyalo ifingi. Abantu balabipilwa sana no kumfwa ubulanda nga kwaba inkondo, ukusansa kwa tupondo, utuyofi, bumpulamafunde na masanso yambi. Ilingi line, abaculilamo no kufwa, bantu bakaele.

Abantu bamo balapeela Lesa umulandu pa fyo tucula, batiila Kabumba wesu tatubikako amano. Bambi na bo batila Lesa alamona ifyo tucula, lelo ku mufulo tafwaya fye ukutwafwa. Bambi na bo batila amasanso ya musango uyu yalilingilwa kabela. Cimoneka kwati abantu batontonkanya ifyalekanalekana pali Lesa. Ni kwi twingasanga ifyasuko fya cine kabili ifingatufika pa mutima? Mu fipande ifyalakonkapo, twalamona ifyo Icebo ca kwa Lesa, Baibolo, cilanda ukuti e filenga ukuti tulecula e lyo ne fyo ukucula kukapwa.