BAIBOLO ILAALULA ABANTU

“Abengi Balimpatile”

Abashimika ili lyashi ni ba Waldo Moya

UMWAKA BAFYELWE: 1978

ICALO: CHILE

IFYO BALI: BALI ABALUBULI SANA

INKULILO YANDI: Nakuliile mu Santiago, umusumba ukalamba uwa calo ca Chile ku ncende ukwafulile sana bampulamafunde, ifipondo e lyo na balebomfya sana imiti ikola. Ilyo nali ne myaka 5, batata balibepeye. Ilyo bafwile, bamayo balyupilwe na kabili. Abo baupilweko, baali abankalwe icine cine ica kuti baletupuma sana. Ncili ndomfwa ububi nga naibukisha ifyo baletucusha.

Ifyo baletucusha, fyalengele na ine ndekula uwa lubuli sana. Natendeke ukunwa sana ubwalwa, ukukutika ku nyimbo sha bacintomfwa isho batila heavy-metal e lyo limo nalebomfya ne miti ikola. Nalelwa sana na baleshitisha imiti ikola kabili imiku iingi balefwaya no kunjipaya. Bushiku bumo, ibumba lya bacintomfwa limbi lyalyumene akapi ne cipondo icalumbwike sana pa kuti cinjipaye, lelo nalipuswike, cancenene fye. Ubushiku bumbi na bo, ifipondo ifyaleshitisha imiti ikola fyalinsotele imfuti mu mutwe kabili fyafwaile no kunkulika.

Mu 1996, nalitemwanene na Carolina, kabili mu 1998 twalyupene. Ilyo twakwete umwana wa kubalilapo umwaume, natendeke ukusakamikwa ukuti apo nali uwa cifukushi sana, nalimo kuti nalacusha ulupwa lwandi nga filya abaupile bamayo baletucusha. Naile ku cipatala uko baafwa abantu ukwalula imibele. Nangu ca kuti balimpeele imiti kabili balibomfeshe ne nshila shimbi isha kung’undapilamo, fyonse tafyabombele. Nalefulwa na pa tuntu fye utunono kabili nali fye cimbi cimbi. Natontonkenye ukuti pa kuti ndeke ukucusha ulupwa lwandi mfwile fye ukuipaya. Lelo icaweme ca kuti nshayipeye.

Pa myaka iingi nshasumine ukuti Lesa eko aba, lelo ili lyena nalefwaisha ukwishiba nga e ko aaba. E co natendeke ukulapepa kwi calici lya Evangelical. Pali ilya nshita, umwina mwandi alesambilila Baibolo ne Nte sha kwa Yehova. Nalipatile sana baNte kabili ilingi line nalebapontela. Lelo nalipapile ukuti nangu nalebapontela, tabalefulwa.

Bushiku bumo, Carolina anjebele ukubelenga Amalumbo 83:18 muli Baibolo yandi. Ili ilembo lilanda ukuti ishina lya  kwa Lesa ni Yehova. Calimpapwishe ukuti ku calici nalepepa batusambilishe fye ukuti kwaliba lesa, lelo tabatusambilishe ukuti Lesa wa cine ni Yehova. Mu mwaka wa 2000, nalitampile ukusambilila Baibolo ne Nte sha kwa Yehova.

IFYO BAIBOLO YA-ALWILE UBUMI BWANDI: Ilyo nasambilile ifingi mu Baibolo, nalitemenwe ukwishiba ukuti Yehova wa luse kabili alelela. Ku ca kumwenako, Baibolo pa Ukufuma 34:6, 7, ilondolola Yehova ukuti ni “Lesa wa luse kabili uwa mutembo, uukokola ukukalipa kabili uwafulisha icikuuku ne cine, uutwalilila ukulanga icikuuku ku ba makana, uwelela ifilubo na bumpulamafunde no lubembu.”

Nangu nasambilile fyonse ifi, calingafishe ukulacita ifyo nalesambilila. Nalemona kwati nshakaleke ukuba uwa lubuli. Lyonse nga nafilwa ukucita ifyo nalesambilila, Calorina alenkoselesha. Alenjeba ukuti Yehova alemona ifyo nalefwaisha ukucita ubufwayo bwakwe. Ifyo alenkoselesha fyalengele nkosepo ukucita ifyo Yehova afwaya, nangu ca kuti ilingi nalemona kwati nshakaluuke.

Bushiku bumo, ba Alejandro, abalensambilisha Baibolo, banjebele ukubelenga Abena Galatia 5:22, 23. Ili ilembo lilanda pa fisabo fya mupashi wa mushilo ifyaba “kutemwa, ukusekelela, umutende, ukushishimisha, icikuuku, ubusuma, icitetekelo, ukufuuka, no kuilama.” Ba Alejandro banondolwelele ukuti umupashi wa mushilo e wingangafwa fye ukuba ne yi imibele ilembo lyalandapo. Ifyo nasambilile muli ili ilembo fyalilengele nayaluka.

Mu kupita kwa nshita, nalisangilwe ku kulongana kukalamba ukwa Nte sha kwa Yehova. Takwali icimfulumfulu, abantu baleumfwana, bali aba busaka e lyo ne cifulo twalelonganinapo na co cali ica busaka. Ifyo namwene fyalengele nashininkisha ukuti nalisangile ukupepa kwa cine. (Yohane 13:34, 35) Mu February mu 2001, nalibatishiwe.

IFYO NANONKELAMO: Yehova alingafwa ukuleka ulubuli kabili ndomfwa bwino sana pa fyo angafwa no kuleka ukucita ifintu fimbi ifyabipa. Abengi balimpatile lelo nshumfwa ububi pa fyo bampatile. Ino nshita ndomfwa bwino ukubombela Yehova capamo no mwina mwandi e lyo na bana bandi abaume babili.

Balupwa lwandi e lyo na bo naleangala nabo balafilwa ukushininkisha nga bamona ifyo nayaluka. Ici calilenga abengi ukufwaisha ukulasambilila Baibolo. Nalitemwa ukuti nalyafwa abengi ukwishiba Yehova. Ala ndomfwa bwino ukumona ifyo Baibolo ya-afwa abantu abengi ukwaluka!

[Amashiwi pe bula 13]

Nalitemwa ukwishiba ukuti Yehova wa luse kabili alelela

[Icikope pe bula 13]

Ndomfwa bwino ukusambilishako bambi Icebo ca kwa Lesa

[Icikope pe bula 13]

Ine no lupwa lwandi, tulabombela Yehova ne nsansa