ICIPANDE ICIKALAMBA | BUSHETULAKABILA LESA?

Tulakabila Lesa

Abasambilila pa fyo abantu batontonkanya batila, abantu tabakabila fye imikalile isuma pa kuti babe ne nsansa. Bamo bamona kwati ububumbo, ifya kulengalenga no kubasabasa, inyimbo e lyo ne fintu fimbi kuti fyabaletela insansa. Lelo ifi fyonse, tafilenga baba ne nsansa sana.

Abatemwa ukubelenga Icebo ca kwa Lesa tabapapa nga baishiba ukuti mu cifyalilwa fye, fwe bantu tulakabila sana Lesa. Ifipandwa fya kubalilapo mwi buuku lya Ukutendeka filanga ukuti ilyo Lesa apangile Adamu na Efa, alelanshanya na bo sana pa kuti abe cibusa wabo. (Ukutendeka 3:8-10) Lesa tapangile abantu ukuti baleitungulula, lelo abapangile ukuti balekonka amafunde ya kwa Kabumba wabo. Baibolo yalilandapo sana ukuti abantu balakabila ubutungulushi bwa kwa Lesa.

Ku ca kumwenako, Yesu atile: “Balipaalwa abaishiba ukuti balakabila ifya kwa Lesa.” (Mateo 5:3) Aya amashiwi yalanga ukuti pa kuti tube ne nsansa, tufwile ukwishiba Lesa. Kuti twacita shani pa kuti twishibe Lesa? Yesu atile: “Te ku fya kulya fyeka umuntu ekalila no mweo, lelo na ku mashiwi yonse ayafuma mu kanwa ka kwa Yehova.” (Mateo 4:4) Bushe amashiwi ya kwa Lesa nelyo amafunde yakwe ayaba mu Baibolo yatwafwa shani ukuba ne mikalile isuma no kuba ne nsansa? Natulande pa fintu fitatu ifyacindama ifingatwafwa.

Tulakabila Ubutungulushi Ubusuma

Muno nshiku kwaliba abantu abasambilila sana, abaafwa abantu ukwishiba ifyo bengacita pa kutila baleumfwana na ba mu lupwa na bantu bambi. Na kabili balafwa abantu ukwishiba ifyo bengaleka ukukangana e lyo ne fyo bengaba ne nsansa. Lelo bushe kwaliba umuntu uwingafunda  bwino abantu muli ifi twalandapo ukucila pali Yehova Lesa, Kabumba wesu?

Natulangilile: Nga mwashita kamera nelyo kompyuta iipya, lyonse kulaba akapepala nelyo akatabo akalondolola ifyo mufwile ukukonka pa kuti icipe mushitile cilebomba bwino. Baibolo nayo yaba nga aka akatabo. Muli Baibolo e mo Kabumba atulondolwela ifyo tulingile ukukonka pa kuti tube ne nsansa.

Nga filya fine akatabo tulandilepo umo balondolola bwino ifya kubomfya icipe kaba, Baibolo nayo ilatucinkulako ku fyabipa ifingonaula ubumi bwesu. Abantu bamo kuti batupandako amano pa fintu fimo kabili ifyo bengalanda kuti fyaumfwika kwati fili bwino sana, lelo tufwile ukwishiba ukuti Kabumba fye e wingatutungulula bwino pa kuti tuleba ne nsansa.

Nangu ca kuti Yehova Lesa alitupeela amafunde tufwile ukukonka, tatupatikisha ukuyakonka. Na lyo line apo alitutemwa kabili alafwaya tuleba ne nsansa, alatweba ukuti: “Ine, ne Yehova, nine Lesa obe, uukusambilisha ifingakuwamina, uukwensha mu nshila iyo ufwile ukwendamo. Nga wabika fye amano ku mafunde yandi, umutende obe kuti waba ngo mumana, no bulungami bobe nga mabimbi ya pali bemba.” (Esaya 48:17, 18) Ukwabula no kutwishika, nga twakonka amafunde ya kwa Lesa, tukaba ne nsansa. Mu mashiwi yambi kuti twatila nga tulefwaya ukulaikala bwino e lyo no kuba ne nsansa, tufwile ukuleka Lesa ukulatutungulula.

Tufwile Ukwishiba Umulandu Tuculila

Bamo bamona kwati tabakabila Lesa pa mulandu wa fintu ifingi ifyabipa ifitucitikila ifyo bamona ukuti tafifwile ukubako nga ca kuti kwaliba Lesa uwaba no kutemwa. Ku ca kumwenako, bamo nalimo kuti baipusha ukuti: ‘Mulandu nshi abantu abasuma baculila?’ ‘Mulandu nshi abana abashicita ifyabipa bafyalilwa abalemana?’ ‘Cinshi abantu bamo bekalila bwino e lyo cinshi bambi baculila?’ Kuti cawama ukwishiba ifyasuko kuli ifi fipusho fyacindama pantu ifyasuko kuti fyalenga twa-aluka mu fyo nalimo tutontonkanya. Na lyo line, mu nshita ya kupeela Lesa imilandu pa mafya tukwata, natumone ifyo Icebo ca kwa Lesa calandapo pali ili lyashi.

Mu Ukutendeka icipandwa 3, tubelengamo ilyashi lilanda pa fyo Satana abomfeshe icisoka pa kutunka umwaume no mwanakashi wa ntanshi ukukanaumfwila ifunde Yehova Lesa abapeele ilya kukanalyako ku muti wa kwishiba ubusuma no bubi. Satana aebele Efa ati: “Ukufwa tamwakafwe. Pantu Lesa alishiba ukuti mu bushiku mukalyako e mo amenso yenu yakashibulwa kabili mukaba nga Lesa, mukeshiba ubusuma no bubi.”—Ukutendeka 2:16, 17; 3:4, 5.

Ifi Satana alandile, aleti Lesa wa bufi kabili tatungulula bwino abantunse. Satana Kaseebanya alefwaya abantu ukumona kwati nga bamumfwila, e lyo bali no kulaikala bwino sana. Pa kuti  Yehova ashinine Satana e lyo na bonse beshibe ukuti ifi alandile fya bufi, pali no kupita inshita. Ifi Lesa acitile, alefwaya Satana na bantu bakwe ukuimwena abene nampo nga kuti baiteka nelyo iyo.

Bushe mutontonkanya ukuti ifyo Satana alandile fya cine? Bushe cine cine abantunse kuti baikala bwino no kuiteka bwino ukwabula Lesa? Pa myaka iingi abantu balicula, balifyengwa, balalwala, no kufwa. Balimona inkondo, ukwipayana kwa ba mitundu iyalekanalekana, imisoka, e lyo no tuyofi tumbi kabili balimona uko imibele ya bantu ilebipilako. Ifi fyonse filanga ukuti abantu balifilwa ukuiteka. Kanshi tatufwile ukupeela Lesa imilandu pa fyo abantunse baculila. Baibolo itweba ukuti icalenga sana ni co: “Umuntu atekela umuntu munankwe ku kumucusha.”—Lukala Milandu 8:9.

Bushe ifi twalandapo tafilanga ukuti tufwile ukulomba Lesa ukutwafwa ukwishiba icilenga ukuti ifyabipa filecitika e lyo ne fyo akacita pa kupwisha ukucula konse? Finshi Lesa akacita?

Tulakabila Lesa Ukulatutungulula

Pa myaka iingi abantu balibombesha no kupoosa inshita iikalamba e lyo ne ndalama ishingi pa kuti belalwala ukukota no kufwa. Bamo batontonkanya ukuti nga balelya nelyo ukunwa fimo nelyo nga baleikala ku ncende imo iyaibela, te kuti bakote. Lelo nangu bacita ifi fyonse, balifilwa ukufumyapo aya mafya.

Lesa afwaya abantunse baleba ne nsansa e lyo no kwikala bwino. Ifi e fyo alefwaya na lintu fye ababumbile kabili ku ntanshi akalenga abantu ukuba ne nsansa no kwikala bwino. (Ukutendeka 1:27, 28; Esaya 45:18) Yehova Lesa alilaya ukuti nangu cibe shani akafikilisha fyonse ifyo alaya. (Esaya 55:10, 11) Baibolo itweba ukuti Lesa akalenga icalo ukuba nga filya fine Paradaise yali iyo abafyashi besu aba kubalilapo bapanishe. Mwi buuku lya Ukusokolola, Yehova Lesa atila: “Akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.” (Ukusokolola 21:4) Bushe Lesa akafikilisha shani ubu bulayo kabili finshi tulingile ukucita pa kuti tukanonkelemo?

Yesu Kristu, Umwana wa kwa Lesa asambilishe abasambi bakwe ukupepa ukuti ukufwaya kwa kwa Lesa kukacitwe. Ili Ipepo lya We Shifwe, abantu abengi balilishiba kabili balalibwekeshabwekeshapo. Litila: “Shifwe wa mu muulu, ishina lyenu libe ilya mushilo. Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:9, 10) Yehova Lesa akabomfya Ubufumu bwakwe ukufumyapo ifyabipa fyonse ifyo imitekele ya bantunse yaleta kabili akaleta icalo cipya ico alaya umukaba ubulungami. * (Daniele 2:44; 2 Petro 3:13) Finshi tulingile  ukucita pa kutila tukanonkelemo mu fyo Lesa atulaya?

Yesu Kristu atile: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.” (Yohane 17:3) Kanshi Lesa e wingalenga twaikala umuyayaya mu calo icipya. Isubilo lya kwikala umuyayaya kuti lyalenga twasumina ukuti cine cine tulakabila Lesa.

Ino E Nshita Tufwile Ukwishiba Lesa

Ilyo Paulo alelanda ku bena Atena pa Areopagi nelyo Ulupili lwa Mars, napapita imyaka 2,000. Abena Atena balishibe sana ifintu ifingi lelo balesambilila na ku fyo bambi baishibe. Paulo abebele ukuti: “[Yehova] e upeela abantu bonse umweo no mupu na fyonse. Pantu e walenga ukuti tube no mweo, ukuti tule-enda no kuti tubeko, nga filya bakalemba wa mishikakulo bamo muli imwe batila, ‘Pantu na ifwe tuli bana bakwe.’”—Imilimo 17:25, 28.

Ifyo umutumwa Paulo aebele abena Atena fya cine. Kabumba wesu e utupeela umwela, ifya kulya e lyo na menshi. Te kuti tube aba mweo ukwabula ifi fintu ifisuma ifyo Yehova atupeela. Nomba mulandu nshi Lesa atupeelela ifi fyonse, kumo na bantu abashitasha? Paulo atile ni ‘pa kuti bafwaye Lesa, nalimo kuti bapampanta no kumusanga, nangu line kwena taba kutali kuli ifwe umo umo.’—Imilimo 17:27.

Bushe kuti mwatemwa ukwishibilapo na fimbi pa fyo Lesa afwaya ne fyo engatwafwa pa kuti tuleikala bwino e lyo no kwisaikala umuyayaya? Nga kuti mwatemwa, kuti cawama mwalanda na bacimupeela ino magazini nelyo ukulembela abalemba ino magazini. Bakatemwa sana ukulanshanya na imwe.

[Futunoti]

[Icikope pe bula 7]

Lesa afwaya abantunse ukuba ne nsansa pali nomba e lyo no muyayaya

[Icikope pe bula 4]

Baibolo ilatwafwa ukwishiba ifya kucita pa kuti tube ne nsansa nga filya fine akatabo umo balondolola bwino ifya kubomfya icipe kaba

[Amashiwi pe bula 5]

“Ine, ne Yehova, nine Lesa obe, uukusambilisha ifingakuwamina, uukwensha mu nshila iyo ufwile ukwendamo. Nga wabika fye amano ku mafunde yandi, umutende obe kuti waba ngo mumana, no bulungami bobe nga mabimbi ya pali bemba.”—Esaya 48:17, 18

[Icikope pe bula 6]

Baibolo kuti yatwafwa mu mikalile yesu